دموع ممنوعه ٥ الاخير

… مفيش داعى ، انا قلت احود اطمن عليكى قبل ما اروح الشغل ، عاملة ايه انهارضة …

.. الحمد لله ، فيما عدا الحرب اللى بينى وبين عادل على الأكل والشرب ، يبقى كل حاجة تمام …

… ههههههههههههههه ، انا عارف ان عادل هو إللى هيظبطك …

… بتضحك على ايه ، ده بقت حاجة تزهق …

… هانت ، فاضل سبع شهور بس …

..، اه تصدق هانت ، هفضل فى العذاب ده سبع شهور بس …

… خدى بالك من نفسك ياحبيبتى ، واسمعى الكلام ، انتى عارفة انه خايف عليكى …

… هتمشى ولا ايه …

. …يادوب …

… بس هتيجى تانى …

استوقفته كلمتها فإبتسم وقال ..، انتى عايزانى اجى تانى …

ابتسمت فريدة قائلة … أكيد …

قبلها من جبهتها ، ثم استقل سيارته ، وألقى عليها نظرة بعدها ابتسم لها وعاد بسيارته للخلف ليستدير وينطلق بها للخارج وقلبه يغمره الفرحة كلما رآها ، صحيح أنها لم تناديه إلا بدكتور حتى الآن ، إلا أنه يكفيه سماحها له بالدخول لحياتها مرة أخرى ، وأيضا بعض النظرات الحانية من آن لآخر ،

أما فريدة تأملت سيارته وهى تبتعد ، بعدها جلست على الدرجات الرخامية أمام باب الفيلا الداخلى ، تتنهد قائلة بينها وبين نفسها

… مش زعلانة منك ياماما ، حقيقى مش زعلانة ، يمكن اللى عملتيه واللى قولتيله هو إللى عمل فريدة اللى موجودة دلوقتى ، بنى جوايا القوة والتحدى اللى قدرت أواجه بيه الدنيا ، وأتمنى انى أفضل كدة ،
وهربى ابنى أو بنتى على كدة ، القوة والانفراد والمواجهة والتحدى ،
الفرق الوحيد بينى وبينك ، انا هملى قلوبهم فرح وحب ، مش زى ما عملتى معايا ، زرعتى جوايا الحزن والكره والإنتقام ،
وللأسف من غير دموع ، مليتى قلبى منهم لدرجة انى مبقتش عارفة أبكى ، بس دلوقتى خلاص ، بقيت أبكى كتير ، تعرفى أن فعلا الدموع بتخفف الحزن وتغسل القلب زى ما بيقولوا ، غير ان بقى عندى القدرة انى ابدل المشاعر دى بمشاعر إيجابية أفضل بكتير ، ومهما حصلى فى الدنيا دى تانى ، اكيد عمرى ما هرجع للى كنت عايشاه ،
من الاخر كدة صالحت نفسى وصالحت الدنيا ياأمى ، بقيت فريدة بجد …

تمت والحمد لله.