للهوي راي اخر ج الاخير
للهوي راي اخر ج الاخير
خرج من الغرفة في نفس وقت خروجها من المرحاض، مرتدية ملابس بيتية مريحة والتي لا تملك غيرها هنا، وشعرها المبتل يتساقط من أطرافه قطرات الماء دون اهتمام منها، شهقت متفاجئة لظهوره المفاجئ، رجل في صالة منزلها يقف بثقة، عار الصدر يبتسم لها. لو كان أحد أخبرها بحدوث هذا يومًا، لسخرت منه وأكدت له أنه ضرب من الجنون.
لكنه واقع، وموسى رشيد واقف في صالة منزلها بالفعل.
قال لها بمرح:
_سلامتك من الخضة.
على غير عادتها ارتبكت قليلاً قائلة:
_أصل لسه مش أخده إن في حد معايا، وخصوصًا إنك طالع من الأوضة كده.
_كده إزاي؟
بتردد أشارت لصدرة العالي وهي تمر بجانبه الغرفة:
_من غير هدومك.
شهقت بعد ما شعرت بمن يحملها من خصرها قائلاً:
_والله أنا حر، وبعدين إيه قومك من جمبي.؟
ضحكت دهب بعدما ألقي بها على الفراش وقالت:
_استني بس، كنت عايزة اعملك زي الستات وأحضرلك الفطار.
ارتفع إحدى حاجبيه بعبث يقول:
_ودهب هانم بتعرف تطبخ أصلاً؟
صححت له ورفعت أصبعها السبابة:
_فطار، هو الفطار طهي؟
سقط فوقها وداعبها موسى:
_بلاش أحسن، يجيلنا تلبك معوي.
ضربته بكتفه بقوة وبغيظ هتفت:
_تلبك معوي ليه؟ إن شاء الله، هو انت فاكرني ست فاشلة؟
مال عليها أكثر وقال هامسًا:
_قطع لسان اللي يقول إنك فاشلة، بس برضو انتي شاطرة في حاجات وحاجات.
تساءلت وهي منحنية لقربه وبخفوت صوته:
_إزاي؟
_شاطرة في إنك حلوة، وواثقة في نفسك، شاطرة في إنك عرفتي تخليني أدور حوالين نفسي لما غبتي عني، وإني وقتها عرفت إنك ما ينفعش تبعدي، وإنك عرفتي تخلي موسى رشيد يسيب بيته وشغله اللي رقم واحد في حياته، ويظل معاك هنا ومش عايز يمشي.
أغمضت دهب عينيها، وكلماته تنساب لأذنيها فتلمس روحها، لامست جانب وجهه بحب ظاهر في عينيها. هل التعبير عن الحب تحكيه نظرة واحدة؟
هذا ما شعر به موسى من عينيها التي زلزلته، وبنهم أراد موسى المزيد، ونسى الأشياء الأخرى…
…………………
كانت سعيدة، تستمع إليه وهو يسرد على مسامعها ما فعله في اجتماع اليوم، قراره كان صائبًا وأيدته على الفور، ربما بدأ بالفعل في إصلاح ما حوله، من علاقته لشقيقته، وتجنب العدوات والإحساس بالآخرين، وعمل ما بوسعه في جعلها راضية وتحسين علاقتهم.
انتهى قاسم من حديثه، فقالت فيروز مشجعة:
_أحسن حاجة عملتها بصراحة، تكسب محبتهم أحسن بكتير ما تكسب عداوتهم.
