للهوي راي اخر ج الاخير
للهوي راي اخر ج الاخير
ثم صمت كلاهما بعد حديث طويل،
فقالت رقية بحنو:
_ليه شايفة التردد ده بعيونك؟
لا تعرف هل تخبرها أنها لأول مرة تخشى شيء، وأن أهم ما تخشاه هو خسارة تلك العائلة، وأقسى ما تخشاه هو والدتها التي لن تهدأ لفكرة نبذها عن حياتها، وأن ما تملكه من غضب سيطفو على السطح ربما يتحول للهب يحرق أمانيها الوليدة…
لم تجد دهب إجابة منمقة لتخبر بها تلك السيدة الجميلة أمامها، فترسمت ابتسامة حقيقية إليها قائلة:
_موسى أخذ قوة والده… وحنانك.
بادلتها رقية ابتسامتها وهي تعدل من وشاحها الأبيض حول رأسها:
_انتي وموسى، كل شخص فيكم جواه شيء محتاج إنه يتكمل ومفتقده، متهيألي ده سبب انجذابكم اللي أنا شايفاه مختلف.. وزي ما قولت قبل كده، أنا مش بحب أقف مكاني، برمي ورا ضهري وأكمل حياتي، انتي كمان اعملي كده يا دهب.
…….
كانت تركض خلفه تحاول إيقافه وعدوله عن القرار الذي اتخذه في وجود عمها، فبمجرد ما أبدت موافقتها حدد ميعاد الزفاف على الفور بعد ثلاثة أيام. هتفت به بضيق ليتوقف، فالتفت إليها متصنعًا عدم الفهم وقال:
_في إيه يا فيروز؟ إيه معصبك كده؟
جزت على أسنانها بغيظ وهتفت به:
_إيه معصبني؟ وانت شايف إن مافيش حاجة تعصب، إزاي تحدد ميعاد الفرح من غير ما ترجعلي؟
اقترب منها قاسم، فارتدت للخلف بمنتصف الممر حتى اصطدمت بالحائط خلفها، وأجابها بخفوت:
_علشان لو اعتمدت عليكي مش هنعمله غير بعد سنتين تلاتة، أنا بحاول أكسر حاجز قلقك وناخد الخطوة دي.
ثم برقة وصدق أكمل:
_فيروز، كفاية الوقت اللي ضاع، خلينا نبتدي من جديد ونبدأ حياتنا. لو اختياري للوقت مضايقك، مافيش مشكلة، اختاري أنتِ الوقت اللي يناسبك وأنا راضي.
سكتت فيروز لبرهة وأجابت بما تفكر به:
_حابة ناخد أي قرار سوا، في خطوة زي دي أنت اخدت القرار واخترت الوقت من غير ما ترجعلي.
_صح، عندك حق، خلاص اختاري الوقت اللي يناسبك. بس ممكن تيجي معايا مشوار مهم؟
_مشوار إيه؟
لم يجيبها بالكلام، بل تحرك بها حتى خارج القصر لوجهة غير معلومة لها. توقفت سيارته أمام أكبر الأتيليهات الخاصة بفساتين الزفاف والسهرة في إحدى المولات الشهيرة، انبهرت فيروز من الواجهة وكم الفساتين المعروضة. همس لها قاسم بأذنها:
_وافقت إنك تحددي الميعاد بمزاجك، ممكن تدخلي وتختاري الفستان، وتلبسيه الوقت اللي تختاريه.
