العذراء ٤

…………………

مساءاً داخل شقة \بدر العطار
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

واثناء تواجد آيات بالمسجد لاقامة صلاة التراويح

صعدت كاميليا بمفردها الى رقية

وبالطبع لم تصعد منى برفقتها نظراً للحظر الذى فرضة والدها عليها

لِما بدر منها من افعال مشينة جعلتة يمنعها من الذهاب الى اى مكان

تحدثت كاميليا وهى ترتشف من كوب الخروب………

صحيح اللى سمعناة دة يا رقية انتوا هتجوزوا آيات لإياد

رقية مبتسمة …….اة هنجوزهم

ضربت كاميليا على صدرها وهى تقول بإستنكار ……..يالهوى

هتجوزى ابنك لواحدة كانت متجوزة قبل كدا وكمان ارملة

زفرت رقية الهواء المشحون بداخلها

فلقد سأمت من نفس الحديث الذى يتكرر عندما يعلم احداً بالموضوع

فتحدثت بجدية قائلة……….ايوة وفيها اية يعنى إياد اولى واحد بيها

كاميليا بإستياء………ياقلبك بقى هتجوزى ابنك لواحدة وشها نحس زى دى

دى اخدت عمر مصطفى وهو فـ عز شبابة ياعينى

استاءت رقية قائلة……استغفرى ربك الاعمار بيد الله وحدة

كاميليا بتبرم………انتى كدا هتخسرى ابنك التانى

البت دى نحس على ولادك اسمعى منى

رقية بحب……انا مش هخسر ابنى انا هكسب بنت تانية للعيلة

آيات زى ولاء بالظبط وهتكون خسارة بصحيح لو سبتها تمشى من البيت دة

وياعالم لو مشيت هيكون اية مصيرها

كاميليا بإستخفاف……..مصير اية يااختى

دى اول ما تمشى من هنا هتروح تعيش مع امها

وتبتدى تدور على نفسها وتعيش حياتها

وتشوفلها واحد تتجوزة ماهى مش معقول هتعيش من غير جواز كدا

خصوصاً انها حلوة ولسة صغيرة

تجهم وجة رقية وهى تقول……..اسكتى يا كاميليا انتى متعرفيش حاجة

آيات مش هتمشى من البيت دة انا مش ممكن اتخلى عنها ابدا

كاميليا بمضض……يااختى انا هتجنن انتى متبتة فيها

بإديكى وسنانك كدا لية ما تسيبيها تغور

رقية بإمتعاض…….اية اسيب بنتى

شهقت كاميليا بإستخفاف ومن ثم قالت……..اية بنتك ,, هى علشان

بتقولك ياماما بقت بنتك خلاص ,, دا ضحك ع الدقون وسهتنة بنات اسألينى انا

رقية بمحبة…….ايوة بنتى اللى مشلتهاش فـ بطنى

بنتى اللى مربتهاش بنتى اللى مرضعتهاش من صدرى

بنتى اللى مش شايلة اسمى

لكنها شايلة محبتى فـ قلبها آيات حنينة وطيبة وبتحبنا كلنا

ببراءتها وطيبة قلبها قدرت تكسب محبتنا ليها

آيات بنت قلبى ياكاميليا بنتى ومرات ابنى