مريم 1

-مالكش في الزغلاليل إللي زيي صح ؟ .. طيب أتجوزتني ليه يا عثمان !!

ضحك بحرارةٍ و قال :

-نانسي أنا بشيد بذكائك. ماتخيبيش ظني فيكي.. إيه يا حبيبتي إنتي نسيتي أنا أتجوتك إزاي ؟ مش ليه ؟!!

انتابها الغضب و إنعكس بعينيها و هما تلتقيان بعينيه القاتمتين، ليستطرد هو بعد برهةٍ رافعًا ذقنه و مسبلًا نظراته قليلًا :

-بس للحق.. في جزء في سؤالك له إجابة عندي… أنا فعلًا إتجوزتك لسبب !

ابتلعت ريقها بتوتر، بينما يضيف بهدوءٍ :

-أنا محمّل نفسي جزء من ذنبك.. عارف إن يمكن ماليش علاقة و إن ده كان إختيارك… بس مش قادر أتجاهل مسؤوليتي تجاهك.. تصدقي و لا لأ يا نانسي.. أنا أتجوزتك عشان أنقذك. عشان أرجعك تاني زي ما كنتي زمان.. إديتك إسمي. و كان عندي استعداد أحاول معاكي لحد ما تتعافي و تبقي كويسة… بس إنتي و لا مرة إدتيني فرصة. و واضح إنك مش هاتعملي كده أبدًا

كانت تحملق فيه بتجهمٍ، أصغت لكل كلمة قالها بتمعنٍ.. حتى فرغ …

لم تدري كيف إنفجرت ضاحكة فجأة.. فأجفلته و جعلته ينظر إليها مستنكرًا بشدة، لتقول من بين ضحكاتها :

-آه.. آااااه بجد.. ضحكتني يا عثمان… ضحكتني.. بقى أتجوزتني عشان تصلح مني هه ؟ يعني مايمشيش معاك عشان الفيديو بتاع عمك و الفضيحة ؟!

تجاهل ضحكها و سخريتها منه و قال بغلظةٍ :

-فيديو إيه يا بت إللي بتكلميني عنه ؟ إوعك تكوني مفكراني خايف بجد من الفيديو.. سبق و قولتلك بليه و إشربي مايته. لو عاوزة تنشريه من بكرة إعملي كده. و لا يهز مني شعرة. ده أنا كمان ممكن أسجنك بيه.. إصحي يا نانسي لكلامك و فوقي كده. إنتي شكلك لسا ماتعرفنيش

ابتسمت بمرارةٍ و قالت :

-بالعكس.. ده أنا دلوقتي بس عرفتك كويس أوي. يمكن قبل كده ماكنتش واضح.. لكن بعد الكلمتين بتوعك دول. التهذيب و الإصلاح إللي وصيت نفسك بيهم عليا… شكلك إنت إللي لسا ماتعرفنيش يا عثمان. ماتعرفش أنا مريت بإيه.. ماتعرفش إللي أنا فيه ده وصلتله إزاي. مع إنه بسببك. مهما أقنعت نفسك بعكس ده.. كله بسببك. و في الأخر بتتعالى عليا. مستكبر حتى تبصلي بعين الرضا. قرفان مني صح ؟ حقك

احتدمت نظراته و هو يقول بصرامةٍ :

-نانسي.. إياكي. إياكي تلعبي على الوتر ده. فكك من الصعبانيات. مش بتاكل معايا.. أنا مش هالمسك. مش هاربط نفسي بيكي أبدًا.. ماعنديش إستعداد نهائي أجيب لإبني أخ أو أخت من واحدة زيك إنتي فاهمة ؟؟؟