مريم 1
مريم 1
-هو إنت إيه إللي في إيدك ده ؟!
كان وجه “عثمان” مجللًا بقناعٍ محكمٍ من القساوة و الغضب… رأته يفلت مقبض الحقيبة لتسقط أسفل قدمه.. و أجفلت عندما تحرك فجأة متقدمًا نحوها بضعة خطواتٍ
أبقى مسافة بينهما، ثم فتح فمه و قال أخيرًا بلهجةٍ قاتمة :
-سايبك.. قصدي سايبلك الأوضة تقعدي فيها براحتك. لأني متأكد لو فضلت معاكي مش ضامن ممكن أعمل فيكي إيه
عبست “سمر” قامعة إنفعالٍ سببته كلماته، ثم قالت بأنفة :
-لأ و على إيه سيادتك تسيب أوضتك.. أنا إللي ضيفة عندك. و أنا إللي لازم أسيبهالك لو حبيت تبقى لوحدك.. خمس دقايق ألم حاجتي و مش هاتشوف وشي تاني !
و استدارت من حوله لتقصد حجرة الملابس، لكنه أعترض طريقها بجسمه الضخم.. لم يضع يده عليها، لكنها تراجعت خطوة في خشية تلقائيًا …
-إتقي شري يا سمر ! .. هكذا قدم لها النصيحة بلهجة هادئة و عينين حمراوين
ازدردت ريقها بتوترٍ و قالت مغالبة اضطرابها :
-أنا عايزة أريحك
رفع حاجبه معلقًا بحدة :
-تريحيني ! .. ده لا إنتي. و لا الدنيا دي كلها ممكن توصلوني للشعور ده
كتفت ذراعيها أمام صدرها و هي تقول متشدّقة :
-يا سلام ! للدرجة دي.. عشان إيه ده كله يعني ؟ إنت بتقلب الترابيزة زي ما بيقولوا ؟ أنا عملتلك إيه ؟!!
صدرت حشرجة خشنة من حنجرته.. و إلتمعت عيناه ببريق حقدٍ لأول مرة تراه يخصّها به، ثم قال بصوتٍ ملؤه الغضب :
-بسببك إنتي.. و لأول مرة في حياتي. أمي مدت إيدها عليا. بسببك إنتي !!!
ارتعدت بخوفٍ على إثر صياحه العنيف في أخر عبارته… بينما يطبق جفنيه بشدة، ثم يفتحهما بعد برهةٍ، يسحب نفسًا عميقًا ثم يقول بلهجة أكثر هدوءً :
-بصي.. نقطة و من أول السطر يا سمر !
و غمز لها بعينه …
-إيه ده يعني ! .. تمتمت بعدم فهم
-قصدك إيه هاتعمل إيه يعني ؟!!
فرك كفيه ببعضهما قائلًا و قد تلبسته روحه المغرورة :
-لأ من ناحية هاعمل ف هاعمل كتير.. القلم إللي نزل على وشي من إيد أمي بسببك ده. قسمًا بالله لادفعك تمنه يا سمر. و بطريقة مش هاتتخيليها حتى. زي ما قولتيلي مرة إيدك سابقة لسانك. و أنا بردو قولتلك غباءك سابق تفكيرك. كنا متعادلين.. لكن دلوقتي عليا واحد. قريب هانتعادل تاني يا سمر… تصبحي على خير !
و إلتفت ليأخذ حقيبته، ثم مضى خارجًا و هو يشد الباب في يده مقفلًا إياه بهدوء أرابها أكثر مِمّ لو صفقه بعنف …
