القاضي المتهم

خرجت كوثر تنظر إلى النيل ولاحت ابتسامة حزينة على وجهها عندما تذكرت حياتها قديما مع زوجها منذ خمسة وعشرون عاما

Flash
خرجت من عملها وقامت الأتصال ب صديقتها الوحيدة
-شهيرة انا خلصت شغل وهروح عشان مروان مش مبطل عياط وبعد ماتخلصي عدي عليا
على الجانب الآخر أجابتها شهيرة
-تمام ياكوثر، قدامي شوية هراجع عليهم واكلمك
وصلت كوثر إلى منزلها بعد يوم عمل طويل
-مروان عامل ايه يا فايزة
اجابتها العاملة:
أكلته ياهانم وماسكتش غير لما الأستاذ مالك جه وأخده مني
تحركت متجهة للداخل وجدته يغفو بجوار ابنهما، حملت الطفل واتجهت به لغرفته مع أخته، وجدت ابنتها تغفو بسلام، وضعت طفلها وانحنت تطبع قبلة على جبينها، رجعت بعد قليل إلى زوجها
-مالك حبيبي ايه ال رجعك بدري من الشغل …فتح عيناه بإرهاق ثم تحدث
-مكنش فيه شغل كتير، اعتدل على فراشه وهو ينظر بشرود، جلست بجواره، تربت على كتفه
-مالك ياحبيبي حاسة إنك مضايق ومهموم
سحب كفيها وأجلسها بجواره
-كوثر عندي قضية كبيرة، والقضية دي لو كسبتها هتنقلني نقلة كبيرة
ضيقت مابين حاجبيها متسائلة:
-ودا ال مزعلك ومخليك حزين كدا
تراجع بجسده للخلف وهو. يطالعها بصمت حاذر:
-القضية دي لرجل أعمال
اومأت تنظر بعينها تنتظر حديثه
-آه وبعدين، فين المشكلة
نهض واتجه يشعل سيجاره وبدأ ينفثه بتمهل قائلًا:
-قضية رجل أعمال اسمه صفاء الزيني، تحركت إلى أن توقفت أمامه محاولة استيعاب حديثه
-قصدك صفاء الزيني صاحب شركات الاستيراد والتصدير، الراجل دا بتاع اللحوم الفاسدة
استدار يومأ برأسه قائلًا:
-الناس بتقول ياكوثر، بس احنا بنسمع، ومش متأكدين
رفرفرت بأهدابها مصدومة بحديث زوجها
-بجد يامالك انت مصدق كلامك، دي مصانعه كلها اتشمعت بالشمع الأحمر

اتجه إليها وجلس بجوارها
-إنتِ عارفة لو كسبت القضية دي هاخد كام..نهضت منتصبة بوقفتها وربعت ذراعها
-لو ميت مليون يامالك، الراجل دا سمعته وحشة، وشغله مشبوه، غير عدواته مع صديق عمرك هاني القاضي ، انت ناسي بلاويه مع هاني

كاد أن يتحدث، أشارت بسبباتها
-ولادي مش هدخل عليهم قرش حرام سمعتني يامالك، احنا مش هنعيش على موت الناس، الراجل دا لازم يتحاسب، ومتنساش هاني يامالك
كتم غيظه من اتهاماتها محاولا السيطرة على أعصابه فأردف:
-لو زي ما بتقولي كدا كان زمان الحكومة قفلت مصانعه وسجنوه..
زوت مابين حاجبيها قائلة بإستنكار:
-اومال هو فين دلوقتي مش مسجون..سحبت نفسا قويا وتحدثت بهدوء:
-أنا عارفة انا بتكلم من غير دلائل بس اقنعني يامالك ماهو مفيش دخان من غير نار، والراجل دا من زمان وأعماله كلها مشبوهة، لو سمحت يامالك احنا مش محتاجين نكون في موقف شبهة، ولا ندخل على ولادنا فلوس بدم الناس، وبعدين هتوقف قدام صاحب عمرك، ناسي هاني بيحاربه
ظل صامتا وكأنه يفكر بحديثها، فتحدث بعد لحظات من الصمت قائلًا:
-خلاص ياكوثر، هبعد عن القضية حاضر، وهكلم عز