حمزة

السكوت خيم على الأوضة، تقيل ومكتوم. حمزة عضلات فكه اتشنجت، وبص لبدور بغضب كأنه كان عايز يبلعها مكانها لإنها فلتت السر، وبعدين رجع بص لنور، ومكنش قادر ينكر ولا يحط عينه في عينها:

— مكنش هينفع ترجع السرايا من غير ورقة  وتخرس لسان الناس، عشان خاطر ياسين بس.. مكنش قدامي غير كده.

نور نزلت إيدها بالراحة، طقم اللولي اللي على رقبتها كان باين إنه بيتحرك مع كل نفس مقهور بيخرج من صدرها، بس دموعها وقفت، ونظرتها اتحولت من صدمة لجمود يقطع زي الموس:

— تمام.. يعني أنا كنت مجرد واجهة، كوبري تستر بيه عمايلك وترضي بيه كبرياء عيلتك.

لفت ضهرها بكل هدوء ومشيت لحد الدولاب، سحبت شنطة سفر جلد كبيرة ورزعتها على السرير المفرود بملايات الفرح:

حمزة اتخض من حركتها، عيونه وسعت وهو شايفها بتسحب هدومها بعنف وبتحدفها جوة الشنطة، من غير حتى ما تطبقها، كأنها بتلم قشاية نجاة عشان تهرب من حريقة.

قرب منها بخطوات سريعة، ومسك إيدها بقوة عشان يمنعها، بس نور نفضت إيده بعصبية رجعته خطوة لورا وصوتها كان بيتحشر في حلقها من كتر القهرة:

— إياك تلمسني! إيدك دي متتحطش عليا بعد النهاردة.. إنت سامع؟!

حمزة بلع ريقه، ونبرة صوته اللي كانت دايماً متسلطة هديت فجأة، وحل مكانها نبرة ترجي متغلفة بعند صعيدي مبيعرفش يوطي راسه بسهولة:

— اهدي يا نور.. اسمعيني الأول وافهمي، الحركة دي مش هتحل حاجة، أنتي كده بتهدي المعبد علينا كلنا!

نور ضحكت بمرارة، وعينيها بتلمع بدموع رافضة تنزل:

— أهد المعبد؟! هو كان فيه معبد أصلاً عشان أهده؟! إنت بنيت قصرك الجديد على أنقاض كرامتي من أول ليلة.. جاي تقولي اهدي؟!

حمزة قفل درفتين الدولاب بكفه، ووقف حاجز بينها وبين الهدوم، بص في عينيها بصة طويلة فيها حيرة حقيقية:

— والله العظيم الحكاية مش زي ما الست دي سممت دماغك! بدور دي ماض ومات وشبع موت، ولا يمكن يرجع في يوم من الأيام. الورقة دي.. الورقة دي حبر على ورق، مجرد إجراء عشان أعرف أخد الواد بحكم محكمة لو لوت دراعي تاني، وعشان خواله ميمسكوش عليا ذلة إن أمه قاعدة في بيتي وهي غريبة عني!

نور شاورت بإيدها على السرير وعلى الباب المشترك، وصوتها اتكسر بوجع حقيقي:

— وبنت الأصول اللي شارياك وجاية تبني معاك بيت، تكسرها وتصغرها في نظر الخدم والبلد كلها؟ طب ليه متكلمتش يا حمزة؟ ليه مقولتش في وشي قبل ما ندخل هنا إنك هتردها، وسبتني أنا اختار؟ خفت لا أرفض وأضيع من إيدك؟ ولا استهونت بيا وقولت دي هتوافق وتطاطي زي غيرها؟!