حمزة

صينية القهوة وقعت من إيد الشغالة ورنت على الرخام رنة فزعت الكل، أول ما البوابة الحديد اتفتحت على مصراعيها ودخل «حمزة» وهو ماسك في إيده ولد صغير عنده يدوب ست سنين، ومن وراه ماشية «بدور» طليقته وبنت عمه، لابسة عبايتها السودا المطرزة وماشية تبص في أركان البيت بعينين مليانة ثقة وبرود يقهر. «نور» اتسمرت مكانها على نص السلم، بفستان الصباحية الأبيض وطقم اللولي اللي حوالين رقبتها حاساه فجأة حبل مشنقة خانق نفسها. ليلة امبارح عدت أصلاً تقيلة وباردة، بس مكنش يجي في بالها أبداً إنها تصحى على المنظر ده. حمزة قرب من نص الصالة، وصوته الرخيم طالع بكل حسم ولا كأنه حاسس إنه عامل مصيبة: — الولد كان واصل من مصر عند خواله من امبارح وسخن مولع.. وقولتلك يا نور من الأول، «ياسين» ده خط أحمر ومفيش حاجة في الدنيا تغلى عليه، وكان لازم أنزل بنفسي أجيبه هو وأمه عشان يستقر في جناحه هنا. إيد نور كانت بتترعش وهي كابسة على درابزين السلم، بس بلعت غصتها وردت بصوت عالي حاولت تخليه ثابت وميتكسرش قدام الخدم اللي باصين ومبرقين: — وابنك ده، مكنش ينفع يجي غير في صبحية جوازنا؟! ومع مين.. مع اللي طلبت الطلاق بنفسها من سنتين وقالت بالصوت الحياني ملكش عيشة معايا؟ وش حمزة قلب دم، وطلع كام درجة على السلم وعينيه بتطق شرار: — نووور! صوتك ميعلاش على أم ابني، ومتحشريش مناخيرك في اللي ملكيش فيه! أنتي دخلتي البيت ده مراتي على عيني وراسي، بس مالكيش كلمة على مين يعتب الباب ده ومين يخرج منه، مفهوم؟! أمه، الحاجة حليمة، قامت تجري ومسكت حمزة من دراعه عشان تلم الليلة قبل ما تفلت: — خلاص يا حمزة، ادخل مع الولد وخلي الحكيم يشوفه.. وانتي يا عروسة اطلعي أوضتك، الكلام ده ميتقالش على عينك يا تاجر وعيون الخدم مفتحة زي الشياطين. نور لفت وشها وطلعت السلم جري، كاتمة دموعها بالعافية عشان متتهزمش قدامهم، ودخلت الجناح ورزعت الباب وراها بكل قوتها. مفيش خمس دقايق، وسمعت تكة مفتاح بيلف في قفل الباب الداخلي المشترك بين الجناحين—الباب اللي كانت فاكراه مقفول وملوش لازمة. الباب اتوارب ودخلت منه «بدور»، رافعة راسها وبتلعب في ميدالية مفاتيح نحاس قديمة في إيدها. نور اتنفضت مكانها وزعقت بجنان: — أنتي اتجننتي؟! ازاي تفتحي باب أوضتي وتدخلي عليا كده؟! بدور ضحكت ببرود يفرس، ومشت بالراحة لحد التسريحة، مسكت إزازة البرفان بتاعة نور، شمتها وحطتها مكانها تاني: — أوضتك؟ قصدك أوضتي القديمة اللي حمزة غير دهانها عشان يراضيكي بيهم كام يوم؟ مفاتيح السرايا دي كلها في جيبي من قبل ما عيلتكم تحلم أصلاً تناسب عيلة المنشاوي. نور قربت منها ووشها في وشها من كتر الغيظ: — اطلعي برة بكرامتك أحسنلك.. حمزة اتجوزني أنا على سنة الله ورسوله، وأنتي هنا مجرد ضيفة عشان ابنك.. فاهمة يعني إيه ضيفة؟ بدور مالت على ودنها وبصوت واطي زي سم التعبان، همست: — حمزة مبيكسرش كلمتي لما الموضوع يخص ياسين.. وعلى فكره كتبنا الكتاب امبارح أنا وهو عشان ارضى اجى معاه تانى وشوفي بقى مين فينا اللى هيبقى ضيف هما ووجوده مسألة وقت انا لو منك ماخليهوش يقرب منى واحافظ على نفسى الكلمة نزلت على ودن نور زي مية مغلية، حست للحظة إن الأرض بتميد بيها وإن الهوا اتسحب من الأوضة، بس كبريائها اللي بينزف كان الحبل الوحيد اللي ساند طولها. ضحكت نور ضحكة قصيرة طالعة من قاع مرارتها، وقربت خطوة واحدة من بدور وعينيها مثبتة في عينيها من غير ما ترمش: — كتب كتاب؟! بالسرقة زي الحرامية يعني؟ لو كان راجل وعملها في النور مكنش جابك تتسحبى في من الباب الخلفي. أنتي فاكرة إنك كده كسرتيني؟ أنتي بس بتفكريني أنك رخصتي نفسك للمرة المليون عشان ترجعي لواحد رماكي وراح اتجوز غيرك في الزفة والعلن. وش بدور اتمقع، وملامح البرود اتهزت لثانية وظهر بدالها غل حقيقي، وقبل ما تمد إيدها أو ترد، صوت حمزة رن وراهم وهو بيزق الباب المشترك لآخره: — بتعملوا إيه هنا؟! بدور في لحظة، وبحركة تمثيل ، سحبت ملامح الانكسار على وشها، ونزلت عينيها في الأرض وصوتها اتبح كأنها بتعيط: — أنا بس كنت جاية أعتذر للعروسة يا حمزة، عشان متفتكرش إني جاية أنغص عليها عيشتها ولا أهد فرحتها.. بس هي شكلها مش متقبلة وجودي، وأنا وابني ملناش مطرح هنا خلاص. حمزة عيونه كانت حمرة من التعب وقلة النوم، بص لبدور بلوم وعصبية عميا: — روحى اوضتك ومره تانيه تانيه ماتخرجيش غير بإذن منى ؟ نور مدت صباعها في وشه، وكل ذرة خوف أو تردد جواها اتبخرت، وصوتها كان بيهز أركان الجناح: — مكان إيه اللي ألزمه؟! الست دي بتقول إنك رديتها امبارح! انطق يا حمزة.. الكلام ده حقيقي؟! عملتها في نفس اليوم اللي دخلت بيا فيه؟! السكوت خيم على الأوضة، تقيل ومكتوم. حمزة عضلات فكه اتشنجت، وبص لبدور بغضب كأنه كان عايز يبلعها مكانها لإنها فلتت السر، وبعدين رجع بص لنور، ومكنش قادر ينكر ولا يحط عينه في عينها: — مكنش هينفع ترجع السرايا من غير ورقة وتخرس لسان الناس، عشان خاطر ياسين بس.. مكنش قدامي غير كده. نور نزلت إيدها بالراحة، طقم اللولي اللي على رقبتها كان باين إنه بيتحرك مع كل نفس مقهور بيخرج من صدرها، بس دموعها وقفت، ونظرتها اتحولت من صدمة لجمود يقطع زي الموس: — تمام.. يعني أنا كنت مجرد واجهة، كوبري تستر بيه عمايلك وترضي بيه كبرياء عيلتك. لفت ضهرها بكل هدوء ومشيت لحد الدولاب، سحبت شنطة سفر جلد كبيرة ورزعتها على السرير المفرود بملايات الفرح: حمزة اتخض من حركتها، عيونه وسعت وهو شايفها بتسحب هدومها بعنف وبتحدفها جوة الشنطة، من غير حتى ما تطبقها، كأنها بتلم قشاية نجاة عشان تهرب من حريقة. قرب منها بخطوات سريعة، ومسك إيدها بقوة عشان يمنعها، بس نور نفضت إيده بعصبية رجعته خطوة لورا وصوتها كان بيتحشر في حلقها من كتر القهرة: — إياك تلمسني! إيدك دي متتحطش عليا بعد النهاردة.. إنت سامع؟! حمزة بلع ريقه، ونبرة صوته اللي كانت دايماً متسلطة هديت فجأة، وحل مكانها نبرة ترجي متغلفة بعند صعيدي مبيعرفش يوطي راسه بسهولة: — اهدي يا نور.. اسمعيني الأول وافهمي، الحركة دي مش هتحل حاجة، أنتي كده بتهدي المعبد علينا كلنا! نور ضحكت بمرارة، وعينيها بتلمع بدموع رافضة تنزل: — أهد المعبد؟! هو كان فيه معبد أصلاً عشان أهده؟! إنت بنيت قصرك الجديد على أنقاض كرامتي من أول ليلة.. جاي تقولي اهدي؟! حمزة قفل درفتين الدولاب بكفه، ووقف حاجز بينها وبين الهدوم، بص في عينيها بصة طويلة فيها حيرة حقيقية: — والله العظيم الحكاية مش زي ما الست دي سممت دماغك! بدور دي ماض ومات وشبع موت، ولا يمكن يرجع في يوم من الأيام. الورقة دي.. الورقة دي حبر على ورق، مجرد إجراء عشان أعرف أخد الواد بحكم محكمة لو لوت دراعي تاني، وعشان خواله ميمسكوش عليا ذلة إن أمه قاعدة في بيتي وهي غريبة عني! نور شاورت بإيدها على السرير وعلى الباب المشترك، وصوتها اتكسر بوجع حقيقي: — وبنت الأصول اللي شارياك وجاية تبني معاك بيت، تكسرها وتصغرها في نظر الخدم والبلد كلها؟ طب ليه متكلمتش يا حمزة؟ ليه مقولتش في وشي قبل ما ندخل هنا إنك هتردها، وسبتني أنا اختار؟ خفت لا أرفض وأضيع من إيدك؟ ولا استهونت بيا وقولت دي هتوافق وتطاطي زي غيرها؟! حمزة اتنهد تنهيدة تقيلة خرجت من قاع صدره، وقرب منها بالراحة ووطى صوته لدرجة الهمس، محاولاً يطمنها: — خفت.. أيوة خفت متفهميش! خفت أخسرك وأنا ما صدقت لقيتك.. ياسين ده حتة من روحي ومريض، وأمه شيطانة كانت هتحرمني منه لو مكنتش ريحتها بالورقة دي. لكن أنتي.. أنتي اللي اخترتها بقلبي وعقلي، أنتي الست اللي عايز أكمل معاها عمري. متخليش بدور تكسب، هي دخلت هنا ورمت قنبلتها عشان تعملي اللي بتعمليه ده بالظبط.. عايزاكي تسيبي السرايا عشان ترجع هي سيدة البيت.. هتديها اللي هي عايزاه بالسهولة دي يا نور؟! نور وقفت مكانها، صدرها بيعلى ويهبط، وعينيها بتتنقل بين ملامح وشه اللي باين فيها الخوف من فراقها، وبين الباب المقفول اللي وراه بدور بتفرك إيديها ومستنية تسمع صوت طرقعة كعبها وهو نازل على السلم وسايب البيت كله وراه. كلام حمزة رن في ودن نور زي جرس إنذار، خلاها تقف للحظة وتبص للباب المقفول. بدور فعلاً مش جاية تعتذر، ولا جاية تدور على عيشة، بدور جاية تاخد بيتها ومطرحها، وأول خطوة في خطتها إن العروسة تلم شنطتها وتخرج مكسورة ومهزومة من أول يوم. نور سحبت نفس طويل بطيء، ورجعت بصت لحمزة، بس المرة دي النظرة مكنش فيها الضعف اللي هو مستنيه، كان فيها جمود مخيف خلاه يتردد. راحت نور لحد السرير، مسكت الشنطة اللي لسه معبية نص هدومها، ونزلتها على الأرض وزقتها برجلها تحت السرير، ولفت لحمزة وقالتله ببرود يقطع الشك باليقين: — لو فاكر إني هسيب السرايا عشان أسهلها عليها وعليك، تبقى غلطان يا ابن المنشاوي.. نور متهربش ولا تسيب حقها لحد. وش حمزة ارتاح لثانية وافتكر إنه كسب الجولة، ومد إيده يطبطب على كتفها وهو بيتنهد: — كنت عارف إن عقلك كبير وإنك.. نور رجعت خطوة لورا قبل ما صوابعه تلمسها، وبرقتله بعينين حادتين: — متمدش إيدك، وماتقاطعنيش! أنا قاعدة، بس بشروطي أنا، مش بشروطك ولا شروط أم ابنك. حمزة عقد حواجبه، ونبرة التحفز رجعت لصوته: — شروط إيه؟ شاورت نور على الباب المشترك اللي بين الجناحين وقالت بحسم قاطع: — الباب ده يتقفل بالضبة والمفتاح من ناحيتنا، ومفتاحه يتكسر قدامي، ومن بكرة الصبح يتبني عليه بالطوب ويتلغي خالص من الحيطة. جناح بدور ملوش أي علاقة بجناحي.. والأهم من ده، الست دي ملهاش خروج في الطرقة اللي أنا بمشي فيها، أكلها وشربها يطلعلها في جناحها، وريحتها لو هبت في مطرح أنا قاعدة فيه، هتسمع كلام ميعجبكش. حمزة بلع ريقه وهو حاسس إن الحبل بيلف حوالين رقبته، بس نور مادتلوش فرصة يفكر وكملت بالضربة القاضية: — وتاني شرط يا حمزة.. حقوقك كزوج، تنسى إنها موجودة. الورقة اللي كتبتها امبارح دي تبلها وتشرب ميتها، لإنك من اللحظة دي معلق بين اتنين، واحدة رديتها غصب عنك ومبتحبهاش، وواحدة اتجوزتها في النور بس خنت ثقتها من أول فجر.. والسرير ده، مش هتعتبه طول ما أنا مش طيقاك. حمزة عضلات وشه اتشنجت، وكبريائه كراجل صعيدي اتهز بعنف: — أنتي بتتشرطي عليا في بيتي يا نور؟! عايزاني أعيش في السرايا مع مراتي كأني غريب عنها؟! نور رفعت راسها، ومسكت طقم اللولي اللي على رقبتها وفكته بهدوء ورزعته على الكومودينو جنب السرير، وبصت في عينيها بصة تحدي: — ده اللي عندي يا حمزة. يا ترضى وتستحمل نتيجة عمايلك ولعبك ع الحبلين، يا تفتح الباب بنفسك وتنزل تقول للبلد كلها إنك طلقتني في الصباحية، وساعتها مش أنا اللي هخسر.. شوف بقى عيلة المنشاوي هتقول إيه لما يتقال إن حمزة مطلعش قد كلمته مع أبويا! حمزة وقف متسمر مكانه، عيونه بتغلي، وعقله شغال زي الرحاية، سامع صوت خطوات بدور في الجناح التاني وهي بتتحرك على أمل تسمع صوت صريخ ولا باب بيترزع.. بس اللي شافه في عين نور خلاه يتأكد إنه دخل نفسه في حرب، مفيهاش حد هيطلع سليم. الكلمة وقعت على نفوخ حمزة زي الصاعقة، وشه اتخطف وعينيه برقت برعب وذهول: — مسموم؟! بتقول إيه يا حكيم.. مسموم إزاي ومين اللي يعمل فيه كده؟! الحكيم مسح عرقه بمنديل قماش وهو بيبص للأرض، صوته كان واطي ومتحفظ كأنه خايف من القنبلة اللي فجرها: — الولد معدته فيها التهاب حاد ناتج عن جرعات خفيفة من مادة كيميائية، غالباً حاجة بتتحط في الأكل أو الشرب على فترات، هي اللي بتعمل السخونية العالية والقيء المستمر.. لو كانت زادت شوية يا حمزة بيه، كان فص كبده راح فيها. أنا علقتله محاليل تطرد السموم دي، بس لازم يتحلل له دم في معمل كبير في المركز فوراً عشان نعرف المادة دي إيه بالظبط. في اللحظة دي، بدور لطمت على خدها وصوت صريخها شق سكون السرايا: — يا مري! يا قطع قلبي عليك يا ضنايا! مين الحرامي اللي عينه منك ومن ورثك يا يتيم؟! خواله.. أكيد خواله هما اللي عملوا فيه كده عشان يلووا دراعك ويحرقوا قلبك عليه يا حمزة! حمزة التفت ليها فجأة، وعينيه اللي كانت من شوية بتطق نار على نور، اتحولت لنظرة شك مرعبة مفيهاش ذرة رحمة. قرب منها بخطوة واحدة، ومسكها من كتفها بقوة خلت عضمها يزيق تحت صوابعه: — خواله؟! والولد كان في حضنك أنتي ليل نهار بقاله ست شهور.. مين اللي بيأكله ومين اللي بيشربه بيده يا بدور؟! مين اللي طلع بيه فجأة من مصر وجابهولي بنصاص الليالي وهو بينزف سخونية وروح بتتسحب؟! بدور ارتبكت، عينيها زاغت يمين وشمال، ولونها قلب أصفر زي الكركم: — أ.. أنت اتجننت يا حمزة؟! بتشك فيا أنا؟! أنا أمه! فيه أم تضحي بضناها وتأذيه؟! أنا كنت هموت عليه وجريت بيه عليك عشان أنت سنده الوحيد! فوق على درابزين السلم، كانت نور واقفة.. مسحت دموعها اللي نشفت، وبصت للمشهد اللي تحت بعينين واعية وذكية. كلام الحكيم رتب في دماغها كل الصور المشوهة: السخونية المفاجئة، جية بدور في ليلة الصباحية بالذات، اشتراط ردها عشان ترجع بالولد، والبرود اللي دخلت بيه الجناح تتحدى بيه سيدة البيت الجديدة. نور نزلت درجات السلم بخطوات بطيئة، رنة كعبها على الرخام كانت بتدق في الصالة زي عقارب ساعة بتعد تنازلي لمصيبة جاية. وقفت قصادهم بكل هدوء، رمت نظرة احتقار على بدور اللي لسه بتتصنع العياط، وبصت لحمزة وقالت بنبرة هادية بس سمّها نافذ: — ومين قال إن الأم متهونش عليها ضناها.. لما يكون الضنا هو الكارت الوحيد اللي باقي في إيدها عشان ترجع بيه القصر ده وتلوي بيه دراع كبير عيلة المنشاوي؟! بدور شهقت بغل، وصوتها اتنبح: — اخرسي يا خطافة الرجالة! أنتي جاية تتبلي عليا في شرف أمومتي؟! نور مالت عليها، وبصتلها في عينها من غير ما يتهز لها جفن: — شرف أمومتك ده الحكيم والمعمل هما اللي هيحكموا فيه.. الشنطة اللي دخلتي بيها السرايا الصبح، فيها إيه يا بدور؟ أدوية ياسين اللي كنتي بتديهاله بيدك.. مش المفروض الحكيم يشوفها دلوقتي حالاً قبل ما تدخلي بيها جناحك؟! السكون نزل على الصالة فجأة، سكون يرعب أتقل من اللي كان قبل العاصفة. بدور اتجمدت مكانها، إيدها اللي كانت بتلطم بيها على صدرها نزلت ببطء، وعينيها راحت لا إرادياً للشنطة الجلد السودة المركونة جنب فوتيه الصالون. الحركة البسيطة دي مقلتش من عين حمزة اللي كان واقف يراقب أنفاسها، وعروق رقبته نافرة كأن الدم هيفرقع منها. حمزة ساب دراع بدور فجأة، كأنه لمس جمرة نار، وبص للشنطة وعينه اتملت غدر السنين: — الشنطة دي فيها إيه يا بدور؟ بدور رجعت خطوة لورا، ووشها اتشنج وبان فيه الخوف الصريح، بس حاولت تعلي صوتها عشان تداري الرجفة: — فيها هدومي وهدوم الواد! إيه.. هتخلي الغريبة تفتشني في بيتي وتشكك فيا قدام الخدم؟! أنت نسيت أنا مين يا حمزة؟! نور وقفت في نص الصالة، فاردة ضهرها بكل شموخ، ونظرتها لبدور كانت نظرة صياد حاصر فريسته في كورنر ضيق: — لا منسيناش.. أنتي بنت عمه وطليقته، بس الأهم من ده، أنتي واحدة جاية تطالب بحقها في السرايا.. واللي قلبه نضيف وداخل على بياض، ميخافش إن أدوية ابنه المريض تتعرض على الحكيم. خايفة من إيه؟ ده الحكيم قاعد، عشان يطمنا بس إن العلاج اللي ماشي عليه مش هو اللي بيهد حيله كده! الحاجة حليمة، اللي كانت واقفة بعيد ساندة على عكازها ومتابعة كل همسة، خبطت بالعكاز على الرخام خبطة هزت البيت، وقالت بصوت صارم ملوش رجعة: — هاتي الشنطة يا بت بطرس.. افتحي الشنطة قدامنا وقدام الحكيم، عشان نقطع الشك باليقين ومحدش فيكم يرمي بلاوي على التاني في بيتي! بدور شافت الحصار بيضيق عليها من كل ناحية. حمزة مشي للشنطة بخطوات بطيئة تقيلة، وطى عليها وجابها من إيدها، وفتح السوستة الكبيرة ورما محتوياتها كلها على الترابيزة الرخام اللي في وسط الصالة. الهدوم اتنطرت، ووقع معاها كيس قماش صغير ملفوف برباط أحمر. الحكيم قرب بفضول وحذر، مد إيده وفتح الكيس، وطلع منه قزازة قطارة من غير تيكت، سائلها لونه مايل للصفار ومعكر، وشريط حبوب مطحون نصها ومحطوط في علبة بلاستيك مش بتاعة صيدليات. الحكيم شم طرف القزازة من بعيد، وحواجبه اتعقدت بصدمة، وبص لحمزة وعيونه فيها أسف حقيقي: — دي مادة بتتباع عند العطارين بيسموها "عشبة القيء"، بتستعمل لتنضيف المعدة في المواشي بحساب دقيق.. لو اتحط منها نقطتين في مية أو عصير لطفل صغير، تخليه يرجع لحد ما يجيله جفاف وسخونية نار تشبه التسمم، بس مبتسيبش أثر واضح غير بإجهاد فظيع للكبد. الصالة كلها لفت بحمزة. بص للقزازة، وبص لبدور اللي كانت مسندة على الحيطة وبتنهج كأنها بتغرق. حمزة قرب منها، بس المرة دي مكنش بيزعق؛ كان صوته واطي لدرجة الرعب، زي فحيح التعبان: — أنتي.. أنتي سممتي ابني؟ لحمي ودمي اللي مخرجتش من الدنيا بغيره؟ عملتي فيه كده عشان تلويني بمرضه، عشان تجيبيني راكع تحت رجليكي وتقوليلي ردني عشان خاطر الولد؟! بدور نزلت على ركبها، دموع التماسيح اتقلبت لبكا حقيقي وانهيار لما حست إن حبل المشنقة لف خلاص: — مكنتش هأذيه يا حمزة! والله العظيم نقطة واحدة بس عشان يسخن وتجيلنا.. أهلي كانوا عايزين يجوزوني لراجل غريب وياخدوه مني! كنت خايفة.. كنت خايفة يبعد عني وعنك! حمزة رفع إيده ونزل بكف خلى صوت الصدمة يرن في حيطان السرايا، بدور وقعت على جنبها وهي بتصرخ، بس هو كان واقف فوقيها كأنه جبل بيهد: — أنتي متبقيش أمه.. أنتي حية، والحية ملهاش عيشة بين البني آدمين! التفت حمزة للغفير اللي كان واقف على الباب مبرق من هول اللي بيحصل، وزعق بصوت شق سقف السرايا: — خد الست دي واقفل عليها في أوضة الخزين اللي في الجنينة لحد ما البوليس والنيابة يجوا يشيلوها من هنا بتهمة الشروع في قتل ياسين.. ارميها برة بيتي! بدور صرخت وبدأت تعفر في الأرض وهي بتبص لنور بحقد وغِل: — والله ما هسيبك يا نور! مش هتهني بيه ولا بالسرايا! الخدم سحبوها لبرة وصوت صريخها كان بيبعد شوية بشوية لحد ما الباب الحديد اتقفل وراها، وساب وراه هدوء تقيل يقطع الأنفاس. حمزة فضل واقف مكانه، ضهره محني، بيتنفس بصعوبة كأن جبل انزاح من على صدره بس ساب مكانه نزيف. التفت ببطء، بص لنور اللي كانت لسه واقفة في مكانها، عيونها مليانة عزة ونصر، بس من غير أي شماتة. حمزة بلع ريقه المر، وخطى ناحيتها خطوتين وهو مكسور العين لأول مرة في حياته قدام حد: — نور.. أنا.. نور رفعت إيدها بهدوء ووقفته مكانه، وبصتله بنظرة خلت الكلمات تموت في حلقه: — متقولش حاجة يا حمزة.. الولد ملوش ذنب في قذارة الكبار، أنا طالعة أشوف ياسين وأغيرله كماداته.. أما أنا وأنت، فحسابنا لسه مخلصش، والبنا برضه هيجي بكرة الصبح يهد الباب ده ويبنيه بالطوب.. لإن اللي انكسر بيني وبينك، مش هيتصلح بفضيحة بدور. لفت نور ضهرها وطلعت السلم، تاركة حمزة المنشاوي واقف في نص صالته، كبير عيلته وسيد أرضه، بس عاجز تماماً قدام ست واحدة عرفت تكسر كبريائه وتثبتله إن بنت الأصول مش صيد سهل يترمي في الهامش. طلعت نور درجات السلم بخطوات ثابتة، ودخلت أوضة ياسين. الأوضة كانت هادية، ريحة المطهرات فيها تخنق، والولد الصغير نايم على السرير، وشه شاحب زي القطنة، وجفونه بتترعش من بقايا السخونية، والإبرة بتاعة المحلول مغروزة في كف إيده الصغير المليان براءة. نور قربت ببطء، قعدت على طرف السرير، ومدت إيدها بحنية غير إرادية تلمس جبهته.. لقت النار بدأت تهدى فعلاً. سحبت الفوطة من طبق المية الباردة وعصرتها بالراحة، وحطتها على جبينه الصغير. الولد اتنهد في نومه وهمس بصوت واهن ومبحوح: — ماما.. بطني بتوجعني أوي.. الكلمة نزلت على قلب نور زي نغزة حامية. طفل ملوش أي ذنب في لعبة الكبار الوسخة، كان كبش فدا لحقد وغل ونقص مش بتاعه. عيونها دمعت لأول مرة من الصبح، بس مسحت دمعتها بسرعة قبل ما تنزل، وهمستله وهي بتمسح على شعره: — نام يا حبيبي.. متخافش، الوجع هيروح خلاص. على الباب، كان حمزة واقف مسند بكتفه على الحلق، عينيه متبتة فيها ومتابع كل حركة بتعملها مع ابنه. كان باصص للبنت اللي مكملتش في بيته أربع وعشرين ساعة، اللي أهانها في صبحيتها وكسر خاطرها قدام أهله وخدمه، ورغم كده، أول حاجة فكرت فيها كانت تداوي جرح ابنه اللي أمه الحقيقية سممته عشان شوية دهب وجاه. حمزة خطى لجوة الأوضة بالراحة، صوته كان طالع مخنوق ومكسور، نبرة عمر ما حد من عيلة المنشاوي سمعها منه: — أنتي ملكيش حق تقعدي جنبه.. أنتي ليكي حق ، وتمشي وراسك مرفوعة وسط البلد كلها وتقولي حمزة المنشاوي مطلعش راجل معايا. نور مالتفتتش ليه، فضلت باصة للولد وهي بتعدل الغطا على كتفه: — أنا مش قاعدة عشان خاطرك، ولا عشان أعمل نمرة وأبين إني أحسن من غيري.. أنا قاعدة عشان الولد ده ملوش ذنب. أمه رمته في النار عشان ترجعلك، وأنت كنت أعمى ومستعد تدوس عليا وعلى كرامتي عشان تثبت لنفسك إنك مسيطر على الكل. حمزة قعد على ركبة ونص جنب السرير، وبص في وشها برجاء حقيقي: — اتعميت.. أيوة اتعميت، الشيطان ركبني وكنت خايف يلووا دراعي بيه. والله ما لمستها، ولا شوفتها ست من يوم ما طلقتها، الورقة دي مأذون السرايا كتبها امبارح الفجر ولسه في جيبي.. والله ما دخلت السجل ولا حد يعرف بيها غيري أنا وهي والمأذون! مد إيده في جيب جلابيته الصديري، وطلع ورقة متطبقة أربع تِرباع، رماها قدامها على الكومودينو، وولع ولاعته وقرب النار من طرف الورقة لحد ما لهبت وسابها تتحرق في الطفاية الرخام قدام عينيها: — أهي.. ولعت في السر اللي كان هيهد بيتي، وهطلب البوليس لبدور بنفسي، وبلد بحالها تشهد إن حمزة المنشاوي لا بيرضى بالوساخة ولا بيبيع اللي شارياه. الورقة اتحولت لرماد أسود، بس نور بصت للرماد ببرود تام، وبعدين بصت لحمزة وقامت وقفت: — حرق الورقة سهل يا حمزة.. عود كبريت يطيرها في ثانية. بس اللي اتكسر في قلبي وفي كرامتي مش ورقة تولع فيها فتخلص الحكاية. حمزة وقف قصادها، عينيه مليانة خوف حقيقي إنه يخسرها بعد ما حس بقيمتها: — طب قوليلي أعمل إيه؟ أروح لأبوكي في بيته وأبوس راسه وأقوله غلطت في حق بنتك؟ أؤمري يا نور.. اللي هتقولي عليه هو اللي هيمشي. نور بصتله نظرة طويلة، نظرة خلت حمزة يحس إنه لأول مرة في حياته واقف قدام ند حقيقي، مش ست بتطاطي وتخاف من صوت رجولي عالي: — تعمل إيه؟ متعملش حاجة.. البنا هيجي يقفل الباب، وياسين هيفضل هنا تحت عيني أنا والحكيم لحد ما يخف تماماً.. لكن أنت.. مكانك في المندرة تحت مع الرجالة أو في أي أوضة تانية في السرايا.. لحد ما أشوف، هل حمزة المنشاوي يستاهل إني أديله مفتاح كرامتي وأأمنله على عمري، ولا كان غلطة هدفع تمنها وأمشي. سابت حمزة واقف مكانه والشرار طالع من رماد الورقة المحروقة، ومشيت بخطوات هادية ناحية باب الجناح، ووقفت لثانية قبل ما تخرج وقالت بصوت مسموع: — وصينية الفطار اللي اتدلقت الصبح.. الخدم يعملوا غيرها، عشان أهل البلد زمانهم جايين يباركوا، ونور مش هتكسر عينها قدام حد. عدى أسبوع على اليوم المشؤوم ده، أسبوع كانت السرايا فيه مقلوبة زي خلية النحل، بس هادية من جوة بهدوء يسبق العاصفة. بدور أهالي بلدها اتدخلوا بعد ما حمزة سلّم تقرير الحكيم وقزازة الدوا للنيابة، وخرجت بكفالة على ذمة قضية إهمال وشروع في أذى قاصر، بس بحكم عُرفي صارم من كبار البلد: رجلها متعتبش نواحي السرايا، وحضانة ياسين اتنقلت رسمي لحمزة بعد ما خواله نفسهم اتبروا من عمايلها وباعوها عشان يداروا فضيحتهم. أما الباب الداخلي المشترك، فالبنا جه من تاني يوم على الفجر، بناه بالطوب الأحمر والمحارة، ودهنوه كأنه مكنش موجود في يوم من الأيام، وبقى جدار أصم فاصل بين ماضٍ اتقفل عليه بالضبة والمفتاح، وبين حاضر لسه تايه. طول الأسبوع ده، حمزة نفذ كلام نور بالحرف. كان بينام في أوضة المكتب اللي ملحقة بالمندرة تحت، عيونه مكنتش بتدوق النوم، مش من تعب الشغل في الأرض والوكالة، لكن من منظر نور وهي نازلة وطالعة في السرايا زي الملكة؛ تدير البيت، تشرف على أكل ياسين وعلاجه بيديها، وتستقبل المهنئين بابتسامة هادية ولا كأن فيه سكاكين كانت بتدبح كرامتها من كام يوم. كانت ست بيت أصيلة من الدرجة الأولى، بس معاه هو.. كانت لوح تلج، مفيش غير كلمتين على قد السؤال والجواب. في ليلة من الليالي، الجو كان بارد، والساعة عدت اتنين بعد نص الليل. حمزة كان طالع على طراطيف صوابعه يطمن على ابنه زي عادته كل يوم بعد ما يتأكد إن البيت كله نام. وارب باب أوضة ياسين بالراحة، ووقف مكانه متسمر. نور كانت قاعدة على كرسي هزاز جنب سرير الولد، نايمة من التعب وساندة راسها على إيدها، والفوطة لسه في إيدها التانية بعد ما كانت بتعمله كمادات لمغص خفيف جاه المغ

مقالات ذات صلة

جوزي ومراته 1

خارج اسوار القلب 1

قدري المر ج الاخير

طلقـ.ـت مـ.ـراتي بعد فتره قصيره

جحر الشيطان الجزء التالت

اكلي

اترك تعليقاً إلغاء الرد