الثلاثه يحبونها ١
الثلاثه يحبونها١
أفاق مجددا من أفكاره على لمسة راوية لكتفه وهي تقول:
يحيي..إنت كويس؟
تجمد جسد يحيى تحت يدها لثوان قبل أن يلين قائلا:
أنا كويس يا راوية متقلقيش..ده مجرد كابوس وفقت منه خلاص.
ليلتفت إليها ثم يمسك وجهها بين يديه طابعا قبلة خفيفة على جبهتها قائلا:
إرجعى نامى إنتى وأنا هقوم آخد شاور وألبس عشان إتأخرت على الشغل.
ثم تركها ناهضا ومتجها إلى الحمام ليتوقف فى جمود على صوت راوية وهي تقول بتردد:
كلمتها يايحيي..كلمت رحمة؟
أجابها دون أن يلتفت إليها قائلا بجمود:
إنتى لسة مصممة ياراوية إنها تيجى هنا من تانى؟
قالت راوية بحزم:
أيوة يايحيي..أنا مصممة؟قلتهالك كتير..ليه مش قادر تفهمنى؟
مال بجانب وجهه يقول بصوت خال من المشاعر:
إنتى عارفة إنى مش حابب وجودها هنا فى البيت معانا وعارفة السبب .
قالت راوية برجاء وهي تتجه بضعف إلى يحيي وتقف قبالته:
إسمعنى بس يايحيي..رحمة ملهاش ذنب فى موت هشام ولازم كلكم تفهموا ده..رحمة مش ممكن تكون السبب فى موته..انتوا كلكم ظالمينها.
نظر يحيي إلى عيون راوية قائلا فى برود:
رحمة انتهت بالنسبة لنا كلنا من زمان ياراوية ..من قبل حادثة هشام ..ولا نسيتى؟
أطرقت راوية برأسها فى حزن ليزفر يحيي وهو يمد يده إلى ذقنها يرفعها لتتقابل عينيها الدامعتين مع عينيه ليقول هو بحنان:
لو مصممة بجد..فأنا هبعتلها حد يبلغها رغبتك فى إنك تشوفيها ياراوية ..أنا أهم حاجة عندى إنى مش عايز أشوفك زعلانة تانى ولا عايز أشوف فى عنيكى دموع..مفهوم؟
أومأت راوية برأسها ليربت على وجنتها بحنان ثم يتركها متجها إلى الحمام ليستوقفه صوتها مجددا وهي تنادى بإسمه قائلة:
يحيي.
نظر إليها متسائلا..لتقول بألم ظهر فى نبرات صوتها وعيونها التى غشيتها الدموع :
ياريت بسرعة مبقاش فيه وقت.
مزقت قلبه دموعها وكلماتها ليسرع إليها قاطعا المسافة بينهما فى خطوتين ليأخذها بين أحضانه يضمها إليه بقوة لتترك لدموعها العنان تفرغها داخل صدره ..ليتركها هو حتى أفرغت دموعها بالكامل..ثم أبعدها عنه قائلا بحنان وهو يمسح دموع وجهها بيديه:
قلتلك مبحبش أشوف دموعك دى ياراوية..بتوجعنى..عشان خاطرى تنسى الحزن وتبعديه عن قلبك..انتى أقوى منه..وأنا كمان جنبك..ولا إيه؟
أومأت برأسها ليبتسم إبتسامة حانية وهو يقبلها على وجنتها ثم يلتفت متجها إلى الحمام ومغلقا بابه خلفه ..لتنظر راوية فى إثره..وتقول بحزن:
كان نفسى أفضل جنبك طول العمر بس إرادة ربنا بقى.. أو يمكن عقابه لية عشان كنت عارفة الحقيقة وخبيت عنك..كنت أنانية..ومفكرتش غير فى حبى ليك..مع إنى متأكدة إن عمرك ما حبيتنى ..إنت حبيتها هي وبس..وهي كمان..هي كمان محبتش غيرك..غلطة أنا غلطها زمان.. وكلنا دفعنا تمنها..يشهد ربى إنى كنت بتعذب كل يوم بسبب الغلطة دى..بس خلاص لازم أصلحها ويارب أقدر أصلحها قبل فوات الأوان..يااارب.
