الثلاثه يحبونها ١

زفرت بشرى وهي تنظر إلى علا قائلة فى همس حاد:
غصب عنى..إنتى مش شايفة ستات العيلة عاملين معاها إيه ..وكأنها مبعدتش عنهم بمزاجها سنين..وكأنهم نسيوا إنى انا اللى كنت بزورهم وبودهم وبعملهم الحفلات وبجمعهم..سايبينى أنا وقاعدين حواليها بيواسوها.. هتشل يا علا..هتشل.

قالت علا بهدوء:
إهدى بس وإسمعينى..هي أخت المرحومة راوية والطبيعى يكونوا بيواسوها اكتر لإنها الاقرب ليها واللى باين حزنها عليها..إنتى مش شايفة دموعها و حالتها عاملة إزاي..دى لا أكل ولا شرب ولا نوم..تحسيها هيجرالها حاجة.

نظرت بشرى إلى علا فى حدة قائلة:
حتى إنتى يا علا بتصدقى الحركات بتاعتها دى..هو انا مش ياما كلمتك عنها..دى تمثيلية ياعلا..تمثيلية قصدها تكسب بيها عطف العيلة وشفقتهم..وعطف يحيي ومراد طبعا..دى حرباية وعارفة إزاي تتلون بألف لون.

قالت علا بهمس:
وأهى خطتها نجحت والكل متعاطف معاها..إتعلمى منها بقى ياحبيبتى ومثلى شوية..الناس بيبصولك .

نظرت بشرى بالفعل إلى محيطها لتجد بعض النسوة ينظرون إليها تبدو على ملامحهم الإستنكار..لتشعر ان علا على حق..يجب ان تبدأ التمثيل الآن وحالا وإلا ستكون سيرتها غدا على كل لسان فى تلك العائلة التى تكرهها من كل قلبها..عائلة الشناوي.

لتدمع عيناها على الفور وهي تستحضر كل قدراتها التمثيلية..لتصرخ بلوعة قائلة:
ياحبيبتى ياراوية..ملحقتيش تفرحى بهاشم جوة حضنك..كنتى أخت ..والله كنت أخت..ربنا يرحمك ياحبيبتى يارب.

ظهر الحزن على وجوه الجميع وهم يقولون آمين..وبدأت بعض النسوة تتجه إلى بشرى تطلب منها الصبر وذكر الله..يواسونها على مصابها وهي تبكى وتقول:
قدر الله وما شاء فعل..ربنا يرحمها برحمته..وحشتنى من دلوقتى.

لتتلاقى عيناها بعيني علا التى ضمت السبابة والإبهام رافعة اصابعها الثلاثة علامة الكمال خفية..لتكاد بشرى ان تبتسم فى إنتصار ولكنها أخفت تلك الإبتسامة بسرعة لتلتقط رحمة ما حدث وتهز رأسها فى يأس..تمد يدها لتمسح دموعها المتساقطة على وجهها قائلة فى ضعف:
ربنا يرحمك ياراوية.

********************

…إنفضت النسوة وإنتهى العزاء..لتقترب روحية من رحمة قائلة فى حنان :
قومى ياست رحمة.. كلى لقمة وإرتاحى شوية ..كدة مش كويس علشانك.

قالت رحمة بضعف:
مش قادرة ياروحية آكل..أنا هقوم أرتاح فى أوضتى.