سبر أغوار قلبي ١١

رفعت تالا كف يدها و مسحت دموعها ثم التفتت لنيفين و اؤمأت برأسها فمازال هناك وميض من الأمل على أن تساعدها .. استقلت المصعد و نزلت بعدها !

استقلت التاكسى الذى كان ينتظرها لينزلها أمام الكافية مباشرة و حاسبت التاكسى ليمشى و تدخل هى الكافية تنتظر نيفين .. بقيت جالسة بمكانها ربع ساعة , نصف ساعة , إلى أن مرت ساعة كاملة و نيفين لم تأت بعد .. أحست بالغثيان و أنها تريد التقيأ .. قامت سريعاً و دخلت لحمام الكافية و أخرجت كل ما بأحشائها .. أعادت ترتيب نفسها ثم خرجت .. جلست بمكانها مجدداً و هى تشعر بالقلق الشديد و أن نيفين لن تأتى .. أسندت وجهها بين كفيها و هى تتنهد و الدعاء لا يفارق لسانها .. أحست بيد صغيرة تربت على رأسها لترفعها بعدها فتجد تالا الصغيرة جالسة فوق الطاولة بعدما وضعتها نيفين عليها .. جلست نيفين على كرسي مقابلها و قالت بجفاء : قولى اللى عايزة تقوليه يلا عشان متأخرش خصوصاً إنى مقولتش لماجد

تنهدت تالا تنهيدة عميقة ثم قالت بتساؤل : أنتِ عمرك سألتى نفسك ماجد طلقنى قبل فرحنا ليه أو عارفة أصلاً هو طلقنى ليه ؟

زفرت نيفين بضيق قائلة : أنتِ لو جاية تكلمينى على اللى حصل زمان و تقوليلى ماجد من حقى و الجو ده يبقى أنا أقوم من دلوقتى أحسن عشان الكلام ملوش لازمة و تالا و نيفين هيفضلوا زي المغنطيس السالب .. بيتنافروا و عمرهم ما هيقربوا من بعض أبداً

قطبت تالا جبينها و قالت بضيق : أنتِ لو فاكرة إنى جايباكِ هنا عشان أقولك إنى ندمانة أو زعلانة إن ماجد سابنى تبقى غلطانة .. أنا مقدرش أقولك أنا بحمد ربنا قد ايه على إن ماجد سابنى .. بحمده فى كل صلاة بصليها و دعاء بدعيه إن ماجد سابنى عشان أقرب من ربنا .. صمتت قليلاً و قالت بدموع بعينيها : أنتِ عارفة جوزك بيهددنى بأيه ؟ أو عايزنى أعمل فى أبنى اللى كنت بستناه من أدهم ايه !

صاحت نيفين بها قائلة بضيق : تالا بقولك ايه لو أنتِ عايزة توقعى بينى و بين ماجد عشان تخديه منى و يرجعلك تانى تبقى عبيطة عشان أنا بحب جوزى و مستحيل أصدقك بأى حاجة تقوليها

صاحت بها تالا قائلة بدموع : تبقى أنتِ اللى عبيطة لو فكرتى لثانية أنى لسة بحب ماجد أو عايزة أرجعله و إن مقابلتى ليكِ ديه عشان أوقع بينكوا .. أردفت قائلة : أنا مش عايزة غير إنه يبعد عنى أنا و جوزى و أبنى اللى فى بطنى .. عايزة أعرف أنام و أنا مطمئنة مش حاسة أن فى عيون بتاكل فى كل حتة فى جسمى و أنا مش عارفة أعمل أى حاجة .. مش عايزة حماتى تأخد عنى فكرة وحشة أو تكرهنى يا نيفين و تبعدنى عن أدهم .. مش عايزة أبعد عن جوزي و أتطلق منه أو أجهض البيبى اللى فى بطنى .. عايزة أنام و أنا بحلم بحلم فيه جوزي و أبنى و بس .. عايزة أخلص من كابوس ماجد اللى بيطاردنى فى كل حلم بحلمه