دموع ممنوعه ١

…والمفروض أن انا أعيش زيك ….

..،لأ طبعا ، انا متأكدة ان انتى عمرك ما هتعيشى زييى ، ولو انتى فى نفس موقفى هتفضلى الانفصال ، شخصيتك كدة ،
بصى يافريدة ، خلينا نحلل الوضع اللى انتى فيه دلوقتى وبصراحة ، وشرطتين تحت بصراحة دى ، معايا للأخر …

…معاكى ياستى ، عايزة تقولى ايه ؟

…دلوقتى انتى متجوزة وعايشة معاه في بيته وفى اوضة نومه وبتناموا كمان على نفس السرير ، صح ؟
…صح ..

…يعنى اتحسبت عليكى جوازة فعلية ادام الناس ، وكمان ادام نفسك ، وإلا مكنتيش تبقى متأثرة كدة …
سكتت فريدة ولم ترد ، أكملت رشا

… قلنا هنتكلم بصراحة ، صح ولا لا …

ردت ريهام بعدما رأت تأثر فريدة بكلام رشا

..براحة شوية يارشا …

…استنى انتى ياريهام لو سمحتى ، صح يافريدة ولا لأ …

…صح يارشا …

…تمام ، الاعتراف اول خطوة صحيحة للعلاج …

…يعنى إيه ؟

..يعنى تشوفى انتى عايزة ايه ياريسة ، دلوقتى انتى لو كملتى اللى انتى ناوية عليه من ناحية اهله ، بيتهيئلى صعب انه يسامحك ، يبقى هتتطلقوا ، ونقول مثلا انك هتحاولى تبدأى من جديد ، حب وارتباط وجواز ، تفتكرى بشخصيتك وطريقتك دى ، هتعملى الموضوع ده فى قد ايه ….

لم ترد فريدة

…اقولك انا ، هتاخدى من 3 ل 5 سنين ، صح ،
حلينى بقى لحد ما ربنا يفكها معاكى ، واللى هتتجوزيه هيطلع كويس ولا هيدخل البلاك ليست بتاعتك ، ، وممكن يكون فى حل تانى ، وكل الشواهد بتقول أن هو الأمثل …

…اللى هو ايه …

…انك تتمى جوازك بعادل …

…إيه …

…من غير ايه ، انتى بنفسك اعترفتى انك مشدوداله، وهو كمان نفس النظام ، يبقى ايه المشكلة …

هنا رن هاتف المكتب ، قالت ريهام

…الشغل هيبدأ ، انا هروح أرد ، وانتى يافريدة روحى استلمى شغلك وسيبك من البت الهبلة أم كلام ماسخ دى …
ثم خرجت وأغلقت الباب

…اسمعينى كويس يافريدة ، كدة كدة الجوازة دى اتحسبت عليكى ، عيشى يافيري ، حبى وعيشى، ومبقولكيش كنسلى اللى انتى ناوية عليه ، لكن متخليهوش يكون حيطة بينك وبين حياتك ، ويمكن يحصل حمل …

…حمل …

…أه ، حمل ، ايه يعنى ، انا متأكدة انه هيخلى حياتك جنة وهيبيضلك السواد الموجود جواكى ،ويمكن بسببه عادل يسامحك …

…طيب يافالحة ، انتى سهلتى كل الأمور ، لكن فى حاجة واحدة هى اللى هتكسر السيناريو اللى انتى رسمتيه ده ، أن عادل مرتبط ، بيحب ، متفق مع واحدة تانية على الجواز بعد ما يطلقنى. ..