عذراء في ليله الزفاف ج الاخير

الحلقة السابعة عشر

جزء من حلقة سابقة :
فى بيت منصور ………..
(. الجرس رن وقامت مها تفتح ، وكان حد بيسأل على سلمى .)
مها : سلمى تعالى فى حد عايزك
(. جت سلمى وتفاجئت جداً .)
سلمى : ……………..
*_____________________________________________**___________________________*
سلمى : مُعتز ، عايز ايه ؟
مُعتز : عايز اقولك ان اللى انا عملته معاكى مكنش متخططله ولا كنت اقصد كل حاجة جت بالصدفة و انتِ كنتى عارفة ………………..
سلمى تقاطعه : انت بتقولى كل ده ليه
مُعتز بحزم : اسمعينى للاخر ، انتِ كنتى عارفة انى بحبك وممكن استغل الخطوبة الاونطة لـ صالحى انا وطريقتك معايا وكلامك عليا هو اللى وصلنى لـ كده لكن تبعتى واحد زى كريم يضحك على اختى وينتقم منها
مها : هو فى ايه
سلمى : لحظة واحدة يا ماما ، والله العظيم يا مُعتز انا ما كنت عارفة ان كريم هيعمل كده ولو كنت اعرفه كنت منعته
مُعتز : دور البريئة اللى انتِ عيشالى فيه ده مبقاش يدخل دماغى ولا بقيت اصدقه ، حق اختى هاخده منك انتِ قبل كريم متفتكروش انى هعديه بالساهل
مها : هو فى ايه مالك داخل علينا بزعابيبك كده
مُعتز : اسألى بنتك المتربية بنت الاصول عملت ايه فى اختى (ومشى)
مها : فى ايه يا سلمى
سلمى : مفيش يا ماما
(ودخلت اوضتها بس مها راحت وراها .)
مها : هو فى ايه وكريم مين اللى بيتكلم عليه
سلمى : مفيش حاجة يا ماما سبينى عايزة اكلم الموبايل
مها : مش قبل ما افهم فى ايه الاول
سلمى : يووووه يا ماما
مها : اتكلمى يا سلمى وفهمينى عشان لما الدنيا تتعك فى بعضها اعرف اقف جنبك
سلمى : حاضر يا ماما ، وحكت سلمى لـ مها الحكاية من اولها لاخرها
مها : يعنى انتِ اللى ورا اللى حصل لـ سارة
سلمى : لا والله يا ماما ، انا مكنتش اعرف ان كريم هيعمل كده
مها : ااااه كريم ، مقولتليش ليه بقى انك بتقابلى كريم وبتكلميه
سلمى : والله يا ماما هما كام مرة يتعدوا عى صوابع الايد
مها : برضه مقولتليش ليه ، انتِ يا بت مش مكفيكى المشاكل دى كلها اللى حصلت لنا بسببك مش مكفيكى الفضايح دى كلها
سلمى : هو انا عملت ايه لكل ده
مها : عملتى ايه !! انتِ كمان مش عارفة عملتى ايه انتِ مش قولتى انك قابلتى زفت بتاعك ده
سلمى : دول مرتين تلاتة
مها : وافرضى حد شافك وعارف انك مطلقة وعارف الكلام اللى اتقال عليكي يقول ايه
سلمى : يقول اللى يقوله
مها : لا يا اختى كده انتِ بتأكديله اللى سمعه عنك فضحتينا اكتر مانتِ فضحانا
سلمى : يووووه بقى يا ماما انا مش ناقصة
مها : على فكرة المرة دى ابوكى مش هيرحمك وانا لو شوفته بيدبحك مش هاحوش عنك عشان انتِ تستاهلى كسر رقبتك (وخرجت)
سلمى لنفسها >> طيب انا اتصل بـ كريم دلوقتى ولا اعمل ايه !! لا لا انا هطنش واكيد مُعتز مش هيعملنا حاجة ربنا يسترها من عنده بقى
*_____________________________________________**___________________________*
بــعــد مــرور شـهـر …….
– سارة اطلقت رسمى من كريم وانتظمت فى الكلية وبدات تتعايش طبيعي
– مُعتز بيحاول ينتقم من كريم وسلمى بس سارة بتمنعه
– كريم وسلمى اتخطبوا
*_____________________________________________**___________________________*
فى بيت منصور …..
كريم : يا عمى انا جاى احدد مع حضرتك معاد الفرح
منصور : احنا اتفقنا ان مفيش فرح
كريم : مفيش فرح ازاى
منصور : هى مُطلقة وانت مُطلق وكل واحد فيكوا اتعملوا فرح ، بتهيألى ملوش لازمة فرح تانى ومصاريف والتكاليف
كريم : مش مشكلة مفيش تكلفة
منصور : خدتوا ايه يعنى من الافراح ، احنا هنكتب كتب الكتاب فى مسجد بحضور الاهل والاصدقاء بس كده
كريم : طيب مفيش حتى احتفال صغير كده
منصور : ممكن بس بلاش تكبروا الموضوع ومعازيم بقى وجو الافراح ده
كريم : ماشى يا عمى زى ما تحب بس يكون على امتى كده
منصور : انت عاوز على امتى
كريم : انا لو عليا عاوزه بكره
منصور : انا بقول نصبر شوية
كريم : ليه بس
منصور : معلش العجلة من الشيطان
كريم : بس احنا داخلين على شهر مخطوبين
منصور : ولو كملتوا ست شهور هبقى مستريح اكتر وياريت سنة
كريم : ليه كده بس
منصور : هتعرف بعدين وهبقى ابلغك بالمعاد ان شاء الله
كريم : ماشى يا عمى زى ما تحب (ومشى)
__**__**__**__
مها : هو كريم كان جاى ليه
منصور : كان جاى عايز يحدد معاد كتب الكتاب
سلمى : وحددتوه
منصور : لا محددناش حاجة وعلى فكرة مفيش فرح
مها : مفيش فرح ازاى
منصور : كتب كتاب وخلاص ماحنا عملنا فرح خدنا ايه
سلمى : ايوة بس كان نفسى …….
منصور يقاطعها : بلا نفسى بلا بتاع اسكتى انتِ خالص
سلمى : حاضر
مها : واتفقتوا على ايه
منصور : انا هستنى شوية
مها : ليه
منصور : مش عايز استعجل زى ما استعجلت قبل كده مش جايز نكون مخمومين فيه زى اللى قبله
مها : لا فى دى عندك حق
منصور : خليهم مخطوبين شوية ونشوف هيحصل ايه
*_____________________________________________**___________________________*
تانى يوم فى شغل كريم …….
(. كريم فى شغله جاله اتصال من رقم ميعرفهوش .)
أمير : صباح الخير
كريم : صباح النور
أمير : كريم الشافعى معايا
كريم : ايوة مع حضرتك
أمير : انا أمير نور الدين ، رجل اعمال
كريم : اهلاً وسهلاً
أمير : انا عندى شركة لسه صغيرة ومحتاج معايا مترجم بمرتب مٌغرى
كريم : ايوة بس انا بالفعل بشتغل هنا فى الشركة وعقدى مقدرش انهيه دلوقتى
أمير : امممم يا خسارة انا ناس كتير اوى شكرتلى فيك
كريم : انا اسف واكيد انا الخسران
أمير : طيب انا عندى اقتراح
كريم : اتفضل
أمير : انا فى الانجليزي كويس مش محتاج مترجم بس ساعات بتجينى افواج من بلاد معرفش لغتها وممكن يكونوا هما مبيعرفوش انجليزي وغالباً الافواج مبتجبش معاها مترجمين والمفروض ان انا اللى اورفرها تمام
كريم : تمام انا ايه المطلوب منى
أمير : انا لما احتاجك تجينى وهديك فلوس على الترجمة بالساعة موافق
كريم : موافق جداً طبعاً
أمير : ممكن اعرف اللغات اللى مع حضرتك
كريم : انجليزي امريكي وبريطانى ، ايطالى ، المانى وصينى
أمير : كويس جداً جداً ، انا هيجينى ناس المان النهاردة بالليل حضرتك هتكون معايا من لحظة استقبالهم فى المطار لحد ما يغادروا القاهرة
كريم : اوكى
أمير : بتخلص شغلك الساعة كام
كريم : انا شغلى من الاحد لـ الخميس من ٩-٤ ، ماعدا الخميس من ٩-٢
أمير : عموماً تقابلنى النهاردة فى مطار القاهرة الساعة … ، ولا اقولك انا هعدى عليك ممكن العنوان
كريم : اداله عنوان المكان اللى هيستناه فيه
أمير : تمام هعدى عليك ٨ بالظبط
كريم : وانا هستناك
أمير : اه احنا متفقناش على الفلوس
كريم : مش هنختلف
أمير : لا لازم نتفق
كريم : خليها لما اجى واشوف نظام الشغل
أمير : خلاص اوكى (وقفلوا)
*_____________________________________________**___________________________*
فى شغل مُعتز …….
رامى : يعنى انت عايز تقنعنى انك مش هتعمل حاجة لـ سلمى وكريم
مُعتز : انا نفسى بس سارة مش راضية
رامى : يا زيزو عليا انا برضه
مُعتز : قصدك ايه
رامى : قصدى انك اكيد بتعمل حاجة او بتخطط لحاجة او بالفعل نفذت حاجة
مُعتز : لا والله ابداً
رامى : يا واد هتصيع عليا ده احنا دافنينه سوا
مُعتز : بذمة اهلك يا شيخ لو انا عايز اعمل حاجة مش انت اول واحد هقوله
رامى : ايوة بس انا مش شرانى فاكيد هعارضك شوية او على الاقل هعدل من خطتك
مُعتز : فكك حتى لو بنتقم فرضاً يعنى فاكيد مش هقول لحد دارى على شمعتك تقيد
رامى : طيب جاوبنى بصراحة انت فعلاً بتعمل حاجة
مُعتز : قولت لاااااا
رامى : ولا ناوى
مُعتز : ولا متنيل ناوى
رامى : ولا بتخطط
مُعتز : يوووووووه بقى متقرفنيش
رامى : لما نشوف
مُعتز : قولى صحيح انت عامل ايه مع خطيبتك
رامى : تمام ماشى الحال
مُعتز : مبسوط يعنى
رامى : مش اوى بس ده العادى البنات بطبعهم بيحبوا النكد
مُعتز : هى من النوع النكدى
رامى : ما كل البنات كده بس هى طيبة وبتحبنى
مُعتز : ربنا يكملك على خير
*_____________________________________________**___________________________*
بالليل ……
(. عدى أمير على كريم وخده على المطار وخلصوا الشغل .)
كريم : احنا رايحين فين كده
أمير : انت وراك حاجة
كريم : لا ليه
أمير : انا بعد ما بخلص شغل بروح اسهر شوية تجى معايا
كريم : موافق طبعاً هنروح فين
أمير : لا بقى فى الخروجات سبلى نفسك
كريم : قشطة
أمير : شكلنا هنبقى اصحاب ولا انت عندك مانع
كريم : لا معنديش
(. بعد ما وصلوا نزل أمير من العربية وبعد كده كريم .)
كريم : احنا هنسهر فين
أمير : مالك مخضوض كده ليه
كريم : لا مش مخضوض احنا هنسهر هنا
أمير : ايوة فى الـ night club ده
كريم : لا يا عم دى مش سكتى
أمير : هو انا بقولك تعالى اسكر هنسهر شوية وهنمشى
كريم : اوكى
(. دخل كريم وامير الـ night club وسهروا شوية وروحوا .)
*_____________________________________________**___________________________*
تانى يوم فى النادى ………
(. سارة قاعدة فى النادى وبتسمع اغانى .)
سلمى : اذيك يا سارة
(. سارة بتشيل السماعات من ودانها .)
سلمى : اذيك يا سارة
(. سارة خدت حاجتها وقامت .)
سلمى : استنى يا سارة لو سمحتى انا جيالك مخصوص
سارة (اتلفت) : عايزة ايه يا سلمى
سلمى : جاية اقولك انى ماليش ذنب فى كل اللى حصل ده
سارة : والمفروض انى اصدقك
سلمى : ايوة صدقينى لانى والله ما بكدب عليكي
سارة : مش مصدقاكى
سلمى : انا بحلفلك بـ ربنا
سارة : كريم برضه حلفلى بـ ربنا وصدقته وطلع كداب
سلمى : والله يا سارة ما كنت اعرف ان كريم هيعمل كل ده ولو كنت اعرف كنت وقفته ولما قالى انه عمل كده قطعت علاقتى بيه
سارة : والله !! اه صحيح مبروك الخطوبة الدبلة منورة فى ايدك
سلمى : انا جيت اعتذرلك لانى حسيت قد ايه انتِ اتظلمتى وان كريم جه عليكي وانتِ مالكيش ذنب بس انتِ كنتى عارفه ان مُعتز متجوزنى غصب
سارة : لا مكنتش اعرف ولا كنت اعرف غير انكوا ارتبطوا وهتتخطبوا وعلى فكرة كريم مش ظلمنى ولا جه عليا
سلمى : قصدك ايه
سارة : كريم داس عليا بكل قوته داس على قلبى وكرامتى
سلمى : هو بس كان عايز ………
سارة : كان عايز ينتقم للانسانة الوحيدة اللى حبها ، كان عايز يحس انه يستاهل يتجوزك
سلمى : انا مش عارفة اقولك ايه
سارة : متقوليش حاجة لانى خلاص مش هصدق حاجة (ومشيت)
(. هنا كريم جه لـ سلمى ، وسارة مكنتش بعدت كتير .)
كريم : مقولتيش يعنى انك جاية هنا
سلمى : استنى يا كريم ، سارة يا سارة (. وراحت ورا سارة .)
كريم : سارة !!!!!
سلمى : سارة انا مش عارفة ليه حاسة بالذنب ناحيتك
سارة (.بتبص ناحية كريم، وكريم وطى دماغه.) : روحى لخطيبك يا سلمى ومتشغليش بالك بيا
سلمى : لو انتِ بجد عايزة كريم انا ممكن اسبهولك
سارة بتغتصب ضحكة >> ههههههه تسيبهولى !! ليه هو جزمة
سلمى : لا مقصدش انا قصدى اى حاجة اعبر بيها عن انى حاسة بتأنيب الضمير ناحيتك
سارة : اه فعلاً متقصديش لانه مش جزمة ، هو كلب (. ومشيت ، ورجعت سلمى لـ كريم .)
كريم : فى ايه !!
سلمى : انا كنت جاية اعتذر لـ سارة عن كل اللى حصلها
كريم : واعتذرتى
سلمى : واضح انها حبيتك اوى يا كريم
كريم : ليه بتقولى كده
سلمى : عشان هى موجوعة اوى انت كسرتها يا كريم
كريم : يا سلمى حرام عليكي بقى متوجعيش قلبى اكتر ماهو موجوع
سلمى : مش عارفة ازاى قدرت تعمل فيها كده
كريم : يوووووه بقى متزهقنيش بكرة تحب تانى وتنسى
سلمى : انا ماشية عشان متأخرش وبابا يتخانق معايا (. ومشيت .)
*_____________________________________________**___________________________*
فى بيت مُعتز …..
مُعتز : ما تجى نسافر شوية
سارة : انت نسيت انى عندى امتحانات
مُعتز : طيب بعد الامتحانات
سارة : مش عارفة سيبها لوقتها
مُعتز : سارة انتِ مُتأكدة انك مش عايزة اخدلك حقك من …….
سارة تقاطعه : لا مش عايزة وياريت يا مُعتز متجبش سيرتهم قدامى تانى
مُعتز : ايوة بس عايزة اقولك ان الموضوع سهل جداً
سارة : سهل او صعب انا مش عايزة
مُعتز : مش انتِ خايفة ان حد غيرهم يتأذى انا بقى عندى خطة محدش غيرهم هيتاذى
سارة : بجد يا مُعتز لو عملت حاجة هزعل منك عمرى كله
مُعتز : طب راجعى نفسك يمكن ترجعى فى كلامك
سارة : انا قولت ١٠٠ مرة لا ومش هغير رأيى ربنا اقوى من اى حد وهو قادر ياخدلى حقى
مُعتز : ونعمَ بالله
سارة لنفسها >> حسبى الله ونعم الوكيل
مُعتز لنفسه >> يعنى لو عملت حاجة هى هتعرف منين !!!
*_____________________________________________**___________________________*
تانى يوم بالليل فى الـ night club …..
كريم : انت كل يوم بتجى هنا
أمير : ايوة طبعاً مش شايفنى معروف فى المكان
كريم : واضح حتى كل البنات هنا عارفينك
أمير : دول صديقاتى
كريم : انت متجوز
أمير : جواز مين يا عم كريم ، احلى حاجه انك تبقى عصفور وقت ما يلاقى بير فى مياة يشرب شوية ويطير
كريم : مبدأ كويس بس بتهيألى الجواز الحلال احلى
أمير : هههههههه طيب مانت ممكن تتجوز شوية وتخلع وتتجوز تانى وفى بنات كتير بتوافق عادى يعنى
كريم : ده انت ضايع
أمير : ههههههه انت اللى مش عايش فى الدنيا
كريم : بصراحة الدنيا اللى انت عايشها دى اول مرة اشوفها على الطبيعة
أمير : انت شكلك خاطب الدبلة منورة
كريم : اه خاطب وهتجوز قريب
أمير : طيب اقلعها دلوقتى فى بنات كتير بتبصلك شكلهم مُعجبين
كريم : لا لا انا بحب خطيبتى
أمير : هما مش هيتجوزوك هما عايزين يرقصوا معاك او يقضوا السهرة معاك مش اكتر
كريم : طيب اشرب اشرب
أمير : انا بشرب المهم انت تشرب
كريم : لا انا كفاية عليا اللى بشربه
أمير : هجبلك بيرة ٨٪ كحول مش هتعملك حاجة
كريم : لا لا مش عايز
(. بعد ما طلبله البيره .)
أمير : اشرب يا كيمو مش هتعملك حاجة
(. كريم بعد تردد كبير جداً قرر انه يشرب من باب التجربة .)
كريم : هو الحمام منين
أمير : من هنا (وشاورله عليه)
(. قام كريم يروح الحمام وهو شبه دايخ وفجأة ……………. .)