روز امين

زفرت بقوة ثم قامت بإطفاء الضوء وتمددت بجانبهُ ليغفيا ويُريحا جسديهما من مشقة دامت لثلاثة أيام

✧✧✧✧✧✧

بعد مرور أربعة أشهر قضاها راجح ونجلاه في معاناة وحرب شرسة مترددين علي المحاكم لمتابعة سير القضايا التي قدماها في حق ريهام وأتهموها بالتزوير وإجبار ولدهما أو تغفيله بالإمضاء،أصدرت المحكمة حكماً بصحة توقيع الراحل علي الأوراق وذلك بعد شهادة موظف الشهر العقاري التي عززت من موقفها واكدت صِحة حديثها،وحكمت بأحقية ريهام بالإحتفاظ بجميع أملاك زوجها التي أصبحت أملاكها بعد نقلها بعقد بيع وشراء موقع ومُسجل بالشهر العقاري وشهد عليه محامي الشركة وأحد الموظفين بداخل الشركة

خرجت ريهام من باب قاعة المحكمة بصحبة والدتها وشقيقها عُمر،تحركت للأمام برأسٍ شامخ لإمرأة تشعُر بنشوة الإنتصار،أوقفها صوت تلك الغاضبة التي لحقتها من الداخل حيثُ صاحت بنبرة حادة وهي ترمقها بنظرات كارهة بعد أن فقدت كل شئ بلحظة وباتت تري مستقبل نجلها المُعتم:
-منك لله يا ريهام،حسبي الله ونعم الوكيل فيكِ

واسترسلت وهي تنظر لصغيرها:
-ما فكرتيش إزاي هربي الواد اليتيم ده ومين اللي هيصرف عليه لحد ما يكبر

نظرت إليها وبصوتٍ هادئ تحدثت بما فاجئ الجميع:
-ما تقلقيش علي الولد،كل مصاريفه الخاصة ومصاريف تعليمه هتوصل لك كل أول شهر

ضيق عُمر عيناه يتطلع بغرابة علي شقيقته متعجباً من تصرفها الغريب،استرسلت ريهام بإبانة:
-وإبقي تعالي بكرة علي الشركة وهاتي معاكي شهادة ميلاده علشان أخلي المحامي ينقل عقد مِلكية الشقة اللي إنتوا قاعدين فيها بإسمه،وكمان هيعمل له وديعة بمبلغ محترم ولما يتم واحد وعشرين سنة يبقي يفكها ويبدأ بيها حياته.

جري لُعابها طمعاً وبرغم عدم توقعها لما فعلته تلك الغريبة إلا أنها اردفت بتلهُف:
-طب ده بالنسبة للولد،أنا بقي فين ورثي في الراجل اللي رضيت أعيش معاه في الضل زي الخفافيش وضيعت معاه سبع سنين من عُمري؟

قطبت جبينها ثم تحدثت وهي ترمقها بنظرات تقليلية:
-ماحدش ضـ,ـربك علي إيدك وقال لك تعيشي في الظل وتتنازلي عن كرامتك يا مدام

واستطردت وهي ترمقها بنظرات حادة:
-إعتبري اللي حصل ده درس ليكِ في المستقبل علشان تحرمي تخطفي راجل من مراته وترضي بوضع مُهين زي ده

نزلت كلماتها عليها فأصابتها بخيبة أمل كبيرة وفهمت أن لا فائدة من مجادلة تلك القوية،خرج راجح للتو مُستنداً علي نجلاه صالح وحسن،ثم هتف بنبرة غاضبة حين رأها:
-هتروحي من ربنا فين يا بنت عبدالحليم،إن شاء الله ربنا مش هيبارك لك في ولا مليم من فلوس إبني اللي إتغرب بيها وداق المرار وهو بيجمع القرش علي القرش