خطايا برئيه ٨
خطايا برئيه ٨
توقف عن هدهدة الصغير واندثرت بسمته ونظر لها نظرة مطولة فسرتها هي:
-متستغربش أنا عمري ما بطلت احبك حتى لما سبتك بس غصب عني كان نفسي ابقى أم وأنت…
قاطعها وهو ينهض يعيد لها ابنها:
-واديكِ بقيتِ وحققتي اللي كنتِ بتحلمي بيه عايزة ايه تاني وبتقلبي في القديم ليه؟
-علشان مش قادرة يا” نضال “مش عارفة احبه ربع ما كنت بحبك…
زفر انفاسه واجابها بكل تروي وهو محتفظ بهدوء اعصابه المعتاد:
-“هاجر” الكلام ده عيب يطلع منك انتِ على ذمة راجل اختارتيه بكامل ارادتك و لازم تحترميه وتقدري وجوده… اللي بينا صفحة واتقفلت
نفت برأسها بعدم اقتناع واقترحت:
-هطلق وخلينا نرجع لبعض
حانت منه بسمة ساخرة ورد بخيبة أمل نابعة من ذلك الشرخ العميق الذي خلفته هي بكبرياء رجولته وكان سبب في تنغيص عِشرتهم وجعلها شبه مستحيلة:
-طول عمرك عايزة من الدنيا كل حاجة ومش بتحبي تخسري …بس للاسف انا معنديش أي استعداد ارجع لواحدة كانت بتعايرني بنقصي وبتقل مني ومحسساني انها بتتفضل عليا
-انا كنت غلطانة يا “نضال” سامحني
قالتها نادمة ولكنه لم يتأثر بندمها وهدر بنبرة جدية للغاية كي يجعلها تزيح تلك الأفكار عن رأسها:
-انا مش بلومك يا”هاجر” انك معرفتيش تتقبلي عِلتي و طلبتي الطلاق ده حقك وانا قدرت رغبتك واحترمتها واصلًا مكنتش هقبل احرمك انك تبقي أم و أظلمك معايا… أنتِ بنت خالتي قبل ما تكوني طلقيتي واتمنالك الخير فلو سمحتِ بلاش تفتحي جراح قديمة وتقلبي في اللي فات وياريت أخر مرة تفتحي معايا أو حتى مع نفسك الموضوع ده وحاولي ترضي بحياتك الجديدة وتحمدي ربنا
-“نضال” أنا ندمت وعمري ما كنت مبسوطة غير معاك… أنت مش عارف أنا عايشة ازاي…
قطع سيل اعذارها التي لن تنطلي عليه ولن يستسيغها مهما فعلت وتحجج قائلًا كي ينهي تلك الدراما الهزلية التي تعارض مبادئه:
-انا اسف يا “هاجر” بس عندي عملية كمان عشر دقايق ولازم اتحضرلها قومي روحي لبيتك و جوزك وبلاش تخذلي ثقته فيكِ اكتر من كده.
اصابت كلماته الجارحة صميم ضميرها لذلك غامت نظراتها ونكست رأسها ثم عدلت وضعية حملها للصغير وغادرت تاركته من حينها يشعر أن شيء ثقيل يجثو فوق صدره وسؤال لعين يتردد بعقله ماذا لو كان هو بموضع زوجها.
-هو ممكن اعزمك على فنجان قهوة
انتشله من شروده صوت أخر شخص توقع أن يراه الآن. ليرفع خضراويتاه ويعقب على حديثها بملامح ثابتة:
