ندى ج الاخير

تاني يوم …..
بعد ما رجع محمود من الشغل وكان منتظر سامي جوز ابتهال ،جرس البيت رن وقف محمود واتجه ناحيه الباب وهو بيقول
-اعملي شاي يا مريم
-حاضر
فتح الباب ورحب بسامي وقال
-أهلًا أهلًا أبو نسب
سلم عليه سامي وهو محروج من الموقف وقال
-عامل اي يا محمود
-الحمد لله ،ادخل ادخل
دخل سامي وقعد على الكرسي وبجواره محمود اللي بدأ الكلام وقال
-كده يا سامي تعمل كده
خد نفس عميق وقال
-كُنت عاوزني أعمل اي يا محمود وهيا بتقولي يا كده يا كده ،دا كان تهديد يا محمود ،بص يا محمود الشهادة تتقال في حق ابتهال من ساعة من دخلت بيتي وهيا شيلاني وشايله أمي فوّق رأسها
قاطعه محمود بنبرة عتاب
-و دا رد الجميل يا سامي
-يا محمود الزن على الودان آمر من السحر ،وابتهال رمت ودنها لامها ،أنا اسف لو بقول كده بس دي الحقيقة ،لا اعملي لا سوي ،معلش يا محمود أنا مالي مراتك مبتخدمش أمك أنتم حرين ،مراتي لما دخلت بيتي نزلت تساعد أمي برضاها مش غصب عنها صح ؟
رد عليه بكُل صراحة
-في دي عداك العيب ،فعلًا هيا نزلت بمزاجها
-حلو يبقا تكمل بمزاجها مش بمزاج حماتي ،أنا راجل حُر هيا حماتي على عيني وراسي لكن قدام باب بيتي وتفرمل محدش ليه يتحكم في بيتي غيري يا محمود ولا غلطان؟
-لا مش غلطان أنت عندك حق
قاطعتهم مريم وهيا بتنادي على محمود ،أستأذن محمود ودخل كانت مريم واقف بصنية الشاي وقالت
-مردتش اطلع اقاطع كلامكم قولت أنادي عليك أحسن
-جدعة يا حبيبي،تسلم إيدك .
خرج محمود وقدم الشاي لسامي وقال
-أشرب يا غالي عقبال ما الغدا يجهز
ابتسم سامي وقال
-دايمًا عامر يا حبيبي
-وبعدين يا سامي يعني يصح اللي حصل ،طب رجعهالي ياعم قولي غلطت
حط كُوبايه الشاي من ايده ونبرة صوته اتغيرت وقال
-ليه يا محمود ،معرفش أحكم بيتي فا ارجعهالك ،لما أكون مش راجل ارجعهالك لكن أعرف أحكم بيتي يا محمد
حمحم محمود بإحراج وقال
-أكيد يا سامي مي دا القصد
-خلاص يا محمد حصل خير ،نادي على ابتهال علشان نتكلم كلمتين

بعد عشر دقايق …
خرجت ابتهال وهيا باصه في الأرض من الأحراج ،خرج محمود علشان يسيب ليهم مساحة للكلام .
هتف سامي وقال بهدوء
-ارفعي راسك يا ابتهال ،من امته بتوطي راسك ،ارفعي
رفعت ابتهال راسها وكانت عنيها وارمه من العياط ،حس سامي بالظلم ناحيتها وقال
-حقك عليا يا ابتهال ،بس حطي نفسك مكاني
-تقوم ترمي اليمين عليا يا سامي
قالتها وهيا حاسة بجرح من ناحيته ،لكن رد وقال
-حقك عليا يا ابتهال غلطة ومش هتتكرر بإذن الله،شيطان ودخل بينا،قومي بقا خلينا نرجع بيتنا ،البيت مضلم من غيرك
ابتسمت ابتهال وقامت بسرعة تجهز نفسها ،ابتسم سامي وقال بصوت عالي
-ما تعملش حسابي في الغدا أنا وابتهال يا ابو نسب هتغدا بره أنا بقا