عم مراتك باعتلك جواب ٤
عم مراتك باعتلك جواب ٤
آيات حست بالقوة بدعم امجد ليها وهزت راسها بالايجاب.
رو
عزيز اخد ميسرة وراحوا الفيلا بتاع عامر وهو في شدة غضبه وزعق في ميسرة وقالها: البنت دي لو رجعت على الفيلا لازم تطرديها من هنا.. مش عايز اشوفها هنا او في الشركة.
ميسرة قعدت على اول مقعد وكانت بتبكي وميرنا نزلت من فوق على صوت باباها العالي ووقفت تتابع حديثهم علي الدرج..
ميسرة ردت عليه بخوف: انا مش عايزة فيلا ولا شركة انا عايزة ابني.
عزيز زعق فيها بغضب: ابنك متورط مع المافيا.. فاهمة يعني إيه ؟ يعني تنسي ان ابنك يرجع.
ميسرة شهقت بصدمة وعزيز قرب منها ومسكها من كتفها بغضب وقالها: عيطي اصرخي اكتئبي احزني عليه زي ما انتي عايزة بس كل ده مش هيغير حقيقة ان ابنك بنسبه كبيرة ما.ت.
ميسرة بصراخ وبكاء: كفايه بقى متقولش كده علي ابني.. ابني عايش وهيرجع.
عزيز حاول يهدي نفسه ويسيطر علي اعصابه وغضبه وقالها: ماشي.. هيرجع.. بس لحد ما يرجع مش عايز أشوف مراته دي في اي مكان اكون فيه وانتي هتعمليلي توكيل عشان اكون متحكم في كل املاك ابنك لحد ما يرجع.
ميسرة لاول مرة في حياتها تخاف من عزيز وتشوف الجانب ده من شخصيته وهزت دماغها بخوف وعزيز بعد عنها واتكلم بعصبيه: اما اشوف انا ولا مراته دي اللي معرفش جايبها منين!!
رواية مكتوبة على إسمي بقلمي ملك إبراهيم.
في مكتب المحامي الخاص ب عامر.
قعدت آيات قدام المحامي ومعاها امجد وعرفوه اللي حصل ل شريف واختفاء عامر المفاجئ وانهم مش قادرين يتواصلوا مع اي حد في البلد الاجنبيه اللي عامر سافر ليها.
المحامي: انا أعرف المحامي اللي ماسك قضية اخو الباشمهندس عامر هناك وانا اللي رشحته للباشمهندس.
آيات بلهفة: يعني ممكن حضرتك تكلمه وتسأله هما وصلوا ل ايه هناك؟ ولو في اي اخبار عن عامر؟
المحامي هز راسه بالايجاب واخد تليفونه واتصل علي المحامي الاخر وآيات كانت بتدعي من جواها ان ربنا يطمنها على عامر وامجد كان حزين عشان اللي حصل ل اصدقائه ومستعد يعمل اي حاجة عشان يساعدهم.
آيات كانت قاعدة وجسمها كله بيرتجف من شدة التوتر والمحامي بيتكلم مع المحامي الاخر في التليفون وعرف ان والد عامر ظهر واخد دليل براءة ابنه الصغير وقدروا يخرجوه من السجــ,,ـــــن وقاله ان والد عامر حكاله ازاي قدروا ياخدو عامر وانهم محتجزينه مقابل فلوس وعامر رافض يتفاوض معاهم.
