عم مراتك باعتلك جواب ٤

المحامي اول لما انتهى من المكالمة آيات سألته بلهفة: من فضلك طمني؟

رد المحامي: لحد الان الاخبار مطمنه الحمدلله.. واضح ان القضيه اللي كانت متلفقه ل اخو الباشمهندس عامر كانوا قاصدين بيها يوصلوا للباشمهندس ويطلبوا منه مبلغ كبير ولما رفض يتفاوض معاهم خطفوا والده وقطعوا عليه الطريق والباشمهندس لقى والده قدامه فجأة وفي سلاح في دماغه وهددوه انه لو مركبش معاهم هي.وا والده…

امجد بدهشة: حضرتك عرفت الكلام ده إزاي ؟

المحامي: والد الباشمهندس حكي للمحامي بتاعهم هناك كل اللي حصل معاه وقاله انهم اخدو عامر واطلقوا سراح والده واخد كمان دليل براءة ابنه وقدر يخرجه من السجــ,,ـــــن فعلا والباشمهندس عامر لسه محتجز عندهم وتقريبا لسه رافض يتفاوض معاهم على المبلغ اللي طالبينه منه.

آيات اتكلمت بلهفة: يعني عامر كويس؟

المحامي: أكيد كويس هما ميقدروش يآذوه لان العصابات اللي زي دول بيكون هدفهم الفلوس.

اتكلم امجد بحيرة: واشمعنا عامر اللي فكروا فيه.. ما الدنيا مليانه رجال اعمال كتير وفي منهم ناس اغنى من عامر بكتير!!

رد المحامي: قدروا يوصلوله عن طريق اخوه.. أكيد اخوه اتورط معاهم وهما عرفوا ان له اخ غني وكان لازم يستفيدو منه بأي طريقه.

اتكلمت آيات بلهفة: طب خلاص ندفع الفلوس اللي هما عايزنها.

المحامي: احنا مش هنقدر نعمل اي حاجة وإحنا هنا.. والد عامر والمحامي هناك راحوا بلغوا في السفارة المصريه النهاردة وهما هيتصرفوا هناك ولو في اي جديد المحامى هيكلمني ويبلغني.

اتنهد امجد براحة وقال: المهم اننا اطمنا ان عامر بخير الحمدلله.

آيات بصت قدامها بحزن وقالت: بس مش عارفين بيحصل معاه ايه هناك!! اللي زي دول بيكونوا مجرمين.

المحامي رد عليها بابتسامة: متقلقيش يا مدام آيات هما أكيد عارفين بيتعاملوا مع مين ومستحيل يأذوا الباشمهندس عامر.

آيات همست من قلبها: يارب.

اتكلم امجد مع المحامي: في حاجة تانيه كنا جاين لحضرتك عشانها.. والدة عامر.. جوزها عايز يطرد مدام آيات من بيت عامر وعايز يكون هو المتحكم في الشركة وكل فلوس عامر واملاكه لحد ما يرجع!

رد المحامي: دا بصفته ايه؟

امجد: بيقول بصفته جوز والدته.. وكمان هدد مدام آيات قدامنا وممكن يتعرضلها او يفكر يأذيها!

المحامي: عزيز!! عزيز طول عمره مستني فرصة زي دي ولو حط أيديه علي اي حاجة بيملكها الباشمهندس هينهبها!