قبل فوات الاوان ٢

خرج حازم فاتجهت فريدة لجوليا

فريدة : هو قالك ايه
جوليا وهي تضرب كفا بكف : يالله يا الله ثم زفرت بقوة
فريدة : ممكن افهم في ايه
جوليا : انا مسافرة هالا وما بدي اقعد بمصر ولا ثانية
فريدة : ارجوكي فاهمني قالك ايه
جوليا بعصبية : طلب مني اغير ديني بدو اعلن اسلامي والبس حجاب مثل ندي وهاد شرطه حتي يتمم الجواز ومو بس هيك وكمان قالي انا الاول بتجوز ندي وبعدين انتي حتصيري زوجتي التانية ، زفرت مرة اخري ثم عاودت : شو اتجنن هاد
فريدة بغيظ شديد : هو قالك كده
عند هذه اللحظة طرق جرس الفيلا ليدخل هشام
هشام : صباح الخير
فريدة : صباح النور
هشام : امال انتو مالكم ، كنتم بتتخانقوا ولا ايه
عندها لم ترد جوليا اصتنعت البكاء وجلست وهي تضع يدها علي وجهها ، تصنع هشام الفزع من اجلها وجلس الي جوراها
هشام : ايه ده معقولة يا جوليا مين بس اللي زعلك ثم نظر الي فريدة : انتم مزعلين جوليا ولا ايه
أجهشت اكثر ببكائها فاقترب منها ووضع رأسها علي صدره
هشام : لا يا جولي متعمليش في نفسك كده انا قلبي رهيف وميستحملش وانا اللي قلت اجي افسحكم
فريدة : تفسحنا
هشام : ما انا قلت اكيد حازم مش حيكون فاضي قلت اجي اخدك انتي ولوجي وجوليا ونفسح جوليا كلنا واهي تتفرج علي مصر
فريدة : بس لوجي عندها تمرين في النادي
ضرب هشام علي رأسه و كأنه ناسيا : اوووووووه ده انا كنت ناسي ، خلاص نخليها يوم تاني
فريدة : دي جوليا عايزة تسافر انهارده
هشام : لا مش ممكن ازاي بس ، انتي لحقتي وبعدين مش يمكن لما تقعدي الامور تتصلح
فريدة : خلاص يا هشام اخرج انت وجوليا اتفسحوا مع بعض عشان تغير جو وبعدين بالليل حنقعد تاني ونتكلم
هشام لجوليا : هااا تتفسحي
جوليا : حتفسحني كويس
هشام : احلي فسح واحلي سياحة

خرجت جوليا برفقة هشام الذي اعد برنامج مميز لرؤية معالم مصر السياحية فكر في الاهرامات وابوالهول وفكر في رحلة نيلية لكن سيظل دائما وابدا منزل هشام نفسه هو احد اهم المعالم السياحية الموجودة في مصر

——————————————-

انهت ندي حلقتها واتجهت لتخرج من الدار قاطعتها الحاجة اماني

الحاجة اماني : خلصتي حلقتك يا ندي
ندي : ايوة يا حاجة خلاص
الحاجة اماني : اخبارك اية دلوقتي
ندي : الحمد لله
اماني : صحيح انتي سيبتي بيت لوجي
ندي : هي مدام فريدة كلمتك
اماني : ايوة كلمتني وقالتلي عايزة محفظة تانية
أومت ندي برأسها وهي تقول : كويس
اماني : عموما انا مبسوطة انك سيبتي البيت ده ، وبجد اسفة انك سيبتك تروحي
ندي : وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ
اماني : عموما انا قلتها الدار حتبقي اجازة علشان رمضان واننا حنرجع بعد العيد وبعدها ابقي اشوف ادخل لوجي في اي حلقة
ندي : كل سنة وحضرتك طيبة يا حاجة
اماني : مش ناوية تعتكفي معانا السنة دي
ندي : والله حسأل ماما ولو وفقت ممكن اجي
اماني : يبقي ساعتها ربنا يعدي الاعتكاف ده علي خير
ندي : ليه بس كده ده انا حتي طيبة خالص
اماني : انتي بامارة يوم الرحلة ، انا علي اخر الزمن اركب مراجيح ده الحاج حامد لو يعرف كان يموتني
ندي : والله كان يوم جميل يا حاجة يا ريت نرجعه تاني
اماني : ان شاء الله يا ندي