قبل فوات الاوان ٢

عندها ولاول مرة تستشعر ندي مرارة اليتم بصدق ، مرارة ان يكون الي جوارها رجل يحميها من من ارادوا اللعب بها واستضعفوها،حينها و دون اي تردد قررت ندي ان تظهر مخالبها التي كانت تخفيها امام رقة تصرفتها و طيبة قلبها انتفضت فيهم وهي تقول : كفاية
استوقفهم صوتها الحاد و رمقت كل منهم بنظرة استحقار واضحة
نظرت لحازم وقد قررت ان تبدأ به
ندي : اسمع يا استاذ حازم انا مفيش بيني وبينك وعمر ما حيكون بيني وبين الا تحفيظ بنتك القران واذا حضرتك فسرت حبي للوجي واهتمامي بها تفسير تاني فدي غلطتك مش غلطتي ، اتفضل ارجع حضرتك لمراتك اللي لسه راجعة من السفر واللي مفروض حضرتك تكون جمبها مش هنا
حازم : لا يا ندي انا عمر اللي بيني وبينك ما كان تحفيظ لوجي وبس انا متأكد انك حاسة بمشاعري كويس انا عايزك تعرفي ان جوليا مش مراتي جوليا مش اكتر من —————————-
قاطعته ندي بحدة : انا ميهمنيش اعرف وده شئ ميخصنيش علشان لو جوليا مراتك فتلك مصيبة عشان مشاعرك دي ملهاش غير معني واحد انك راجل خاين ولو هي مش مراتك فتلك مصيبة اعظم عارف ليه عشان ساعتها تبقي راجل زاني وفي الحالتين انت واحد ابعد ما يكون عن الرجولة والاحترام
كانت كلماتها كالسكين الحاد اوغرت قلب حازم صمت ولم يستطع النطق بكلمة حينها علت ابتسامة انتصارعلي وجه هشام فنظرت ندي له كمن انهت حازم لتتفرغ له
ندي لهشام : انا كلامي مش بيضحك علي فكرة واذا كنت فاكر اني صدقت التمثلية اللي حضرتك جيت تسمعهالي تبقي غلطان انا فاهمة كويس اوي انت عايز ايه بالظبط وده شئ واضحلي من يوم ما وصلتني الرسايل واحب اعرفك ان مش ندي عماد عبد الدايم اللي يتلعب بيها بدبلة او كلام عن الجواز انا اعرف اميز كويس اوي بين الانسان المحترم وبين اللي بيمثل الاحترام علشان مش متعود عليه

حينها نظر هشام لندي بذهول حاد من اين عرفت انه هو من يرسل الرسائل رمقها بنظرة غيظ اخري وقد توعدها في مكنون نفسه ان تدفع ثمن كلماتها غاليا ، حينها نظرت ندي لكلاهما وقد قررت ان تنهي كلامها

ندي : يا ريت مرة تانية متحولوش تعملوا عليا رجالة علشان كلمة راجل دي كلمة كبيرة اوي عليكم

التفتت غير عابئة بهم تركتهم ورحلت في طريقها دون ان تفكر في شئ شعرت في لحظات انها تألمت علي ما قالت لحازم ولكنها في النهاية شعرت انه كان عليها ان تفعل ذلك