ملكه الجن الحامل ١ انجي الخطيب

جرس الباب رن فتحت الباب، لقيت قطة جارتي واقفة قدامي … وبتكلمني! الحكاية بدأت إن في يوم، وأنا قاعدة مع أختي في البلكونة بنهزر ونضحك كالعادة وقت المغرب، لقيت قطة جارتي معدية على سور البلكونة، وكانت بالعافية قادرة تمشي من كِبر بطنها. بصيتلها وضحكت وقلتلها: “إيه يا جلالة الملكة؟ مين ضحك عليكي وعمل فيكي كده؟ عموماً أنا هستر عليكي… ومستعدة أولدك، ونعمل تحليل DNA لأبو القط اللي في بطنك ونبهدله في المحاكم!” انفجرت أنا وأختي في الضحك، لكن فجأة القطة وقفت. لفت وشها ناحيتي… وبصتلي بطريقة غريبة. مش بصّة قطة عادية… كانت بتبصلي كأنها فاهمة كل كلمة أنا قولتها. سكتّ لحظة، وبعدين ضحكت وقولتلها: “إيه؟ فهمتي كلامي ولا إيه؟” القطة فضلت ثابتة مكانها ثواني، وبعدين لفت ومشت على سور البلكونة لحد ما دخلت بلكونة جارتنا. وقتها الموضوع خلص بالنسبة لي… أو على الأقل، أنا كنت فاكرة إنه خلص. عدى أسبوع كامل. وفي ليلة، الساعة كانت حوالي 12 بعد نص الليل، فجأة جرس الباب رن. استغربت جدًا… مين ممكن ييجي لنا في الوقت ده؟ بابا متوفي، وأنا وأمي وأختي عايشين لوحدنا وفي حالنا، ومفيش حد من قرايبنا بييجي لنا في نص الليل. استنيت أمي تقوم تفتح أو حتى تقول لي: “قومي شوفي مين.” لكن ماما ما ردتش. بصيت على أختي… لاقيتها نايمة. وفي نفس اللحظة، جرس الباب رن تاني. قلبي بدأ يدق بسرعة. قربت من الباب وبصيت من العين السحرية… مفيش حد. ولا حتى ظل شخص واقف قدام الباب. رجعت خطوة لورا وقلت لنفسي: “يمكن أنا سمعت غلط… يمكن كنت بحلم.” لسه هتحرك وأرجع أوضتي، جرس الباب رن للمرة التالتة. المرة دي… أطول. وأشد. قربت تاني من الباب وبصيت من العين السحرية. اتجمدت مكاني. كان فيه ست واقفة قدام الباب. لابسة عباية حمرا طويلة، وحاطة كابيشو على راسها مخبي ملامح وشها بالكامل. بلعت ريقي وقلت بصوت عالي: “مين؟” جالي صوتها من ورا الباب… صوت ضعيف ومبحوح: “أرجوكي افتحي… أنا تعبانة ومش قادرة أقف.” سألتها وأنا لسه ماسكة مقبض الباب: “إنتِي مين؟” ردت بسرعة: “أنا جارتك اللي جنبك.” اتصدمت. جارتنا؟ أنا عمري ما شوفت جارتنا دي من يوم ما سكنت جنبنا. ولا مرة قابلتها على السلم حتى صدفة. ولا مرة سمعت صوتها. ولا حتى شوفت ملامحها. كل اللي كنت بشوفه من الشقة دي… القطة. كانت القطة تظهر أحيانًا ولما توصل عند باب الشقة الباب يتفتح وتدخل وبعدها الباب يتقفل في ثواني. لكن الست نفسها؟ ولا مرة شوفتها. قولتلها من ورا الباب: “حضرتك عايزة إيه؟ أنا مش هقدر أفتحلك… أنا معرفكيش.” وفجأة سمعت صوت أنينها بيعلى. وقالت: “أنا تعبانة أوي… ساعديني.” سكتت لحظة، وبعدها قالت بصوت مرتجف: “أنا بولد… أرجوكي افتحي!” اترددت. عقلي كان بيقول لي ما أفتحش. لكن خوفي عليها كان أكبر. قولت لنفسي: “لو فعلًا محتاجة مساعدة وحصل لها حاجة قدام بابي، هعيش طول عمري بلوم نفسي.” مديت إيدي وفتحت الباب. وأول ما الباب اتفتح… اتجمدت. الست كانت واقفة قدامي، ملفوفة في العباية الحمرا، لكن اللي خلاني أرجع لورا مش شكلها… كان اللي واقف حواليها. أربع قطط. أربع قطط واقفين في هدوء غريب، وكأنهم كانوا مستنيين اللحظة دي من زمان. الست مدت إيدها ومسكت إيدي بقوة، وقالت: “الحقيني… إنتِي وعدتيني.” بصيتلها بدهشة: “وعدتك بإيه؟ أنا أول مرة أشوفك!” رفعت راسها ببطء، ومن تحت الكابيشو لمحت عينيها… وكانت نظرتها مرعبة. قالت: “من أسبوع… وإنتِي كنتِ قاعدة في البلكونة.” سكتت لحظة، وبعدين كملت: “وقولتي إنك مستعدة تولديني.” اتسعت عيني: “إنتِي كنتِي هناك؟!” ابتسمت ابتسامة غريبة وقالت: “أنا كنت بسمعك.” رجعت خطوة لورا وأنا مش فاهمة: “بس أنا كنت بكلم القطة!” ردت بهدوء: “وأنا كنت القطة.” اتحبس نفسي. حاولت أضحك، لكن صوتي ماطلعش. قلت: “إنتِي بتهزري… صح؟” قربت مني وقالت: “أنا ما بهزرش.” وبعدين حطت إيدها على بطنها وقالت: “وأنا جيتلك عشان تنفذي وعدك.” هزيت راسي بسرعة وقولت الست بتهزر ولا وجع الولادة أثر على عقلها ومش عارفة بتقول إيه. قولتلها: “لا… لا، استني. أنا معرفش أولد حد! هدخل ألبس ونروح المستشفى، وهناك الدكاترة يساعدوكي.” لكنها شدت إيدي فجأة وقالت: “لا.” بصيتلها بخوف: “ليه؟” قالت بصوت حاسم: “أنا مينفعش أظهر قدام أي حد.” “يعني إيه؟” “يعني لازم إنتِي اللي تساعديني، وهيكون معاكي الخدم لتوعي يساعدوكي في ولادتي.” بصيت حواليا وأنا مش فاهمة: “طب ما إنتِي بتقولي إن عندك خدم… مش كده؟” ابتسمت بوجع وقالت: “أيوه عندي.” بصيت ليها وقولتلها: “أومال هما فين؟ ليه مش معاكي وسيبينك لوحدك؟” ما ردتش عليا. بس رفعت إيدها في الهوا… وعملت حركة بسيطة بأصابعها. وفي اللحظة دي… الأربع قطط اللي كانوا واقفين حواليها بدأوا يتحركوا. واحدة ورا التانية. جسمي كله اتخشب. قدامي، وفي ثواني معدودة، بدأت أشكالهم تتغير ويتحولوا لأربع بنات. صرخت وأنا برجع لورا: “إيه ده؟!” ثواني… وفجأة ما بقاش فيه ولا قطة. كان واقف قدامي أربع بنات. أربع بنات، لابسين هدوم سوداء، وشعرهم طويل، وواقفين من غير ما يتحركوا… وعينيهم واسعة وسودا سواد عجيب ومتثبتة عليا. صرخت بأعلى صوتي: “ماماااا!” ولا رد. “سارةااا!” أختي ما اتحركتش. بصيت ناحية أوضة أمي… البيت كله كان ساكت. ساكت بشكل يخوف. رجعت أبص للست، وقلت وأنا بترعش: “إنتِي مين؟! وإيه اللي بيحصل هنا؟! وعايزين مني إيه؟!” ردت بمنتهى الهدوء: “متخافيش… محدش هيأذيكي.” صرخت: “أمال إنتِي عايزة إيه؟!” قربت مني خطوة، وقالت: “عايزاكي تنفذي وعدك.” “ولو ما نفذتوش؟” سكتت. ولأول مرة، اختفت الابتسامة من على وشها. وقالت: “ساعتها… مش هسيبك.” سألتها وأنا بحاول أتماسك: “إنتِي مين أصلًا؟” رفعت عينيها ناحيتي وقالت: “أنا ملكة عشيرة الجن الأحمر.” حسيت إن الأرض بتتهز تحت رجلي. كملت: “هربت من عشيرتي… عشان حبيت إنسي زيك واتجوزته وعشته أحلى أيام حياتي. بس لما عرف إني حامل اتخلى عني وقالي إنه مينفعش يقول لأهله إنه بيحب جنية وهيخلف منها، محدش هيصدقه، وإن ممكن أمه تروح فيها. وسابني أواجه مصيري لوحدي، وأنا عشان بحبه مقدرتش أأذيه وسبته. وللأسف طلع كلام عشيرتي صح عنه، واختارت أواجه قدري لوحدي ومرجعش عشيرتي تاني.” سكتت لحظة، وبعدين قالت: “هتسأليني ليه مرجعتيش؟ هجاوبك وأقولك أنا خوفت أرجع ليهم عشان خوفت على ابني يموتوه لأنه هيبقى نصه إنسي ونصه التاني جني.” حطت إيدها على بطنها، وبصتلي نظرة غامضة: “أنا خالفت قوانينهم… وعشان كده هما بيدوروا عليا ومش هيسبوني.” بصيت للأربع بنات اللي واقفين وراها، وبعدها رجعت أبص لها: “طب وأنا ذنبي إيه؟” قربت مني لحد ما بقت قدامي مباشرة، وقالت: “إنتِي الوحيدة اللي وعدتيني تساعديني.” همست: “وعدك هو الشيء الوحيد اللي لسه رابطني بالعالم ده.” كنت لسه هسألها: “يعني إيه؟” لكن فجأة… سمعت صوت خبطة قوية جاية من جوه شقتنا. لفيت بسرعة ناحية الصوت. واتجمدت في مكاني… لأن صوت أمي جه من آخر الطرقة، وهي بتصرخ باسمي: “إلحقييييني!” بصيت ناحية أمي… وبعدين بصيت للست. لكن الغريب… إنها ما اتفاجأتش. بالعكس… قالتلي: “ساعديني بسرعة… عشيرتي وصلوا. ولديني وخدي ابني أمانة عندك، وسبيني أنا هتصرف معاهم لوحدي.” بصيتلها وأنا حاسة إن مخي وقف. “ابنك؟! إنتِي بتقولي إيه؟! هو أنا هقدر أشيل ابن جنية؟!” بصتلي بعينين مليانين خوف لأول مرة، وقالت: “لو فضل معاهم… مش هيعيش.” اتسمرت مكاني. الكلمة دي بالذات خلتني أنسى كل حاجة. نسيت إن اللي قدامي ملكة من عالم مش فاهمة عنه حاجة، ونسيت إن أربع بنات واقفين وراها مش بني آدمين، ونسيت حتى إني كنت عايزة أقفل الباب في وشها. كل اللي قدرت أقوله: “مين اللي وصل؟” قبل ما ترد، سمعنا صوت تاني من جوه الشقة. المرة دي كان صوت خطوات. خطوات تقيلة… بطيئة… جاية من ناحية أوضة أمي. بصيت ناحية الطرقة، وبعدين رجعت أبصلها. “هما دخلوا البيت؟!” هزت راسها وقالت: “أيوه.” صرخت: “إزاي؟! الباب كان مقفول!” ردت بهدوء غريب: “هما مش محتاجين أبواب.” حسيت بقشعريرة مشيت في جسمي كله. وفجأة واحدة من الأربع بنات اتحركت. قربت من الست، وانحنت قدامها وقالت بصوت منخفض: “مولاتي… لازم نتحرك.” الست بصتلها بغضب: “مش من غير ابني.” البنت رفعت عينيها ناحيتي وقالت: “لو اتأخرنا… هما هيلاقوه.” بصيت للست وأنا مش فاهمة: “هيلاقوا مين؟!” حطت إيدها على بطنها وقالت: “ابني.” وفي اللحظة دي… حصلت حاجة خلت الدم ينشف في عروقي. بطنها اتحركت. مش حركة جنين عادية… الحركة كانت قوية لدرجة إن العباية نفسها اتهزت. حطت إيدها عليها بسرعة، ووشها اتغير. صرخت واحدة من البنات: “هو حاسس بيهم!” بصيت لها: “حاسس بمين؟!” لكن قبل ما حد يجاوب… سمعت صوت أمي تاني من جوه. المرة دي صوتها كان أضعف: “بنتي… متدخليش…” جريت ناحية الطرقة من غير ما أفكر. لكن الست مسكت إيدي بقوة. “متروحيش.” بصيتلها بعصبية: “دي أمي!” قالت: “لو روحتي دلوقتي… ممكن تخسريها.” اتجمدت. “إنتِي عارفة إيه عن أمي؟!” ما ردتش. بس بصت ناحية الطرقة. وبصتها لوحدها كانت كفاية تخليني أفهم إن اللي جوه مش طبيعي. فجأة… النور قطع. البيت كله غرق في الضلمة. سمعت صوت أختي وهي بتصرخ من أوضتها: “مين طفى النور؟!” وبعدها سكتت. صرخت: “سارة؟!” ولا رد. “سارة!” برضه مفيش رد. الست قربت مني وهمست: “دلوقتي فهمتي ليه جيتلك؟” قلت وأنا على وشك أعيط: “أنا مش فاهمة أي حاجة!” قالت: “هتفهمي… بس لازم تختاري بسرعة.” “أختار إيه؟!” مدت إيدها ناحيتي. “إما تساعديني وأديكي ابني… أو تسيبيهم ياخدوه.” بصيت لإيدها. وبعدين بصيت للطرقة المضلمة. وفجأة… ظهر ظل طويل على الحيطة قدامنا. ظل شخص واقف في آخر الطرقة. لكن الغريب… إن مفيش حد كان واقف هناك. الست سحبتني وراها بسرعة، والأربع بنات وقفوا قدامها. وبصوت لأول مرة أسمع فيه رعب حقيقي، قالت: “وصلوا.” سمعت صوت رجل من آخر الطرقة بيقول: “يا بنتي… كفاية هروب.” الست اترعشت. بصيتلها باستغراب: “ده مين؟” همست: “دا أبويا، ملك الجن.” حسيت إن قلبي وقع. وقبل ما أستوعب كلامها، ظهر شخص في آخر الطرقة. ما شوفتش ملامحه… بس شوفته واقف قدام أوضة أمي. وبصوت هادي جدًا قال: “لو مش هترجعي بإرادتك… هنرجعك غصب.” الست قربت مني وهمست: “لما أقولك اهربي… خدي ابني وروحي على أوضة أختك.” بصيت لها: “بس إنتِي قولتي إنك هتولدي هنا!” قالت: “أنا هولد.” وبصت ناحية الطرقة. “بس مش هنا.” قبل ما أسألها تقصد إيه… صرخت واحدة من البنات: “مولاتي!” بصينا كلنا ناحيتها. كانت بتبص للأرض. وفي اللحظة دي… بدأت أسمع صوت غريب جاي من تحت رجلينا. صوت خربشة… وبعدين خبطة… وبعدين خبطة أقوى. الست بصتلي، ووشها اتغير تمامًا. وقالت: “هو مش تحت…” سألتها وأنا مرعوبة: “مين؟” بصتلي وسكتت. وفجأة… الأرض تحت رجلينا بدأت تتحرك. وأنا لسه مش فاهمة اللي بيحصل، سمعت صوت أمي من جوه الأوضة للمرة الأخيرة: “متصدقيهاش يا بنتي…” بصيت ناحية صوت أمي. لكن قبل ما أتحرك… الست شدت إيدي بكل قوتها وقالت: “متسمعيش كلامها، دي مش أمك اللي بتتكلم.” اتخضيت: “إنتِي عرفتي منين؟!” قالتلي: “انتي نسيتي إني منهم.” وبصتلي نظرة غريبة جدًا. نظرة خلتني لأول مرة أشك… إن الحكاية كلها ممكن تكون أكبر بكتير من مجرد جنية هربت من أهلها وبتدور على حد يساعدها تولد. وفجأة… الباب اللي ورايا اتقفل لوحده. والأربع بنات اختفوا من قدامي. والست وقعت على الأرض وهي بتصرخ: “الحقيني… هو بدأ يخرج!” أما أنا… فوقفت مكاني مش عارفة أعمل إيه. لحد ما سمعت أول صرخة طالعة من بطنها… صرخة بيبي بس صوته أعلى من أي صوت بيبي سمعته في حياتي. وفي اللحظة دي عرفت… إن الليلة دي مش هتنتهي بولادة طفل وبس. دي كانت بداية حاجة… أنا لسه ما كنتش أعرف إن حياتي كلها هتتغير بسببها. الصرخة شقت ضلمة الشقة ووصلت لآخر عظم في جسمي. صوت طفل بيعيط، بس العياط كان له صدى مرعب بيغروش في الإذن كأنه صوت ألف طفل بيصرخوا في نفس الوقت! الأرض تحت رجلي اتنفضت نفضة خفيفة، والست مرمية على أرضية الصالة بتئن بصوت مكتوم، ماسكة بطنها وبيطلع منها نور أحمر باهت طالع من تحت عبايتها. كانت بتتنفس بصعوبة وشفايفها أزرقّت، بصتلي بعينين نص مقفولة وقالت بنبرة رجاء مشقوقة: “اطفي… اطفي النور اللي في إيديكي… النور بيأذيه!” أنا أصلًا ماكنتش ماسكة كشاف ولا موبايل، بس استوعبت إنها تقصد الخوف اللي مشلول في جسمي. إيدي كانت بترتعش لدرجة إني مش عارفة أثبت على رجلي. صوت خطوات أبوها في الطرقة كان بيبعد وبيقرب، كأن الشقة بقت متاهة من غير حيطان. سمعت صوت أمي تاني من جوه الأوضة، بس المرة دي الصوت كان جاي من السقف: “افتحي الباب واجري يا بنتي! دي مش ولادة… دي تعويذة!” بصيت للست اللي على الأرض، لقيتها بتشد عبايتها بكل قوتها، وجسمها بيترعش. وفجأة، طلعت إيد صغيرة من تحت الفستان… إيد بني آدم صغيرة جداً، بس صوابعها أطول من الطبيعي وضوافرها سودا كأنها مطفية في حبر. قلبي ضرب في زوري. نسيت العقل، نسيت أمي، ونسيت الصوت اللي في السقف. منظر دم الست ونظرة الترجي في عينها خلت غريزة البقاء تحركني. نزلت على ركبتي قدامها بسرعة، إيدي بتترعش وأنا بمدها ناحيتها. “أعمل إيه؟! قلولي أعمل إيه؟!” صرخت فيها بصوت واطي ومجهد. قالتلي وهي بتضغط على إيدي بصرخة مكتومة: “مسكيه… ما تخليهوش يلمس الأرض! لو لمس أرض الشقة… أبوي هيحس بريحة دمه وياخده!” مديت إيدي تحت العباية، حسيت بسخونية مرعبة، كأني بدخل إيدي في مية بتغلي. مسكت الجسم الصغير. كان خفيف، بس تقيل بروح غريبة. أول ما شيلته وبين إيديا، صرخة الطفل سكتت تماماً. الهدوء اللي حل في الصالة كان أرعب من الصريخ. الطفل كان ملفوف بقماش أسود ناعم زي الحرير، بصيت لوشه… كان بني آدم كامل، ملامحه هادية وجميلة، بس لما فتح عينه… كانت عينيه كاملة السواد، مفيهاش أي بياض، صافية وبتلمع زي حجر الليل. بصلي وابتسم… ابتسامة طفل، بس كأنه عارفني من سنين. الست أخدت نفس طويل وعميق، كأن الروح ردت فيها، وقامت وقفت على حيلها بسرعة خرافية مش حركة ست لسه والدة حالًا! العباية الحمرا نزلت من عليها، وظهرت قدامي بطولها، شعرها أسود طالع منه ضي أحمر، وملامحها حادة وجميلة بشكل يوجع العين. بصتلي وقالت بصوت مفيش فيه أي ضعف: “أنتي نفذتي وعدك… ودلوقتي دوري.” قبل ما أسألها عن أمي وأختي، التفتت ناحية الطرقة. الظل الطويل اللي كان واقف عند الأوضة بدأ يتقرب ببطء، وفي لحظة، الأربع بنات اللي اختفوا ظهروا تاني، بس المرة دي كانوا واقفين حوليا أنا والطفل، عاملين حلقة مقفولة. الست وقفت قدام الظل وقالت بنبرة تهديد هزت الشبابيك: “الطفل ده في حماية العهد… اللي هيلمسه هيتحرق بحق عهد الإنس والجن!” صوت الراجل المبحوح من الطرقة ضحك ضحكة واطية، صوتها كان زي حك الحجارة في بعض: “العهد يتربط باللسان يا ملكة… وهي نطقت بالوعد، بس أنتي ما قولتيش ليها التمن.” اتسمرت مكاني. بصيت للست وضغطت على البيبي في حضني: “تمن إيه؟! إنتي قولتيلي هتحميني!” الست ما لفتش وشها ليا، بس صوتها جالي هادي وبارد زي التلج: “ابني مش هيعيش في عالمنا… ولا هيعيش في عالمكم زي البني آدمين. عشان يفضل عايش، لازم يتربى بين الإتنين… في بيتكم.” سمعت صوت باب أختي بيتفتح ببطء، وسارة خرجت منه… بس ما كانتش سارة. كانت ماشية خطوة بخطوة، عينيها متغيمة ومفيهاش أي تعبير، ووراها أمي طالعة بنفس الطريقة، الاتنين واقفين زي التماثيل في آخر الصالة. الست شاورات بإيدها، والنور رجع فجأة للشقة بشكل طبيعي، بس الضلمة فضلت محبوسة جوة عيون أمي وأختي. قربت الست مني، حطت صباعها على جبهة الطفل، وبعدين بصتلي في عيني وقالت بابتسامة غامضة: “من الليلة دي… أنتي مش لوحدك في الشقة دي. هو ابنك، وحارسك… والتمن إن الباب ده مش هيتقفل تاني في وش حد من عندنا.” قبل ما ألحق أصرخ أو أرفض، الست والأربع بنات اختفوا في غمضة عين، كأنهم كانوا دخان وhissed في الهوا. فضلت واقفة في نص الصالة، النور شغال، الشقة ساكتة، أمي وأختي واقفين بصينلي بفراغ… وفي حضني طفل صغير، عيونه سودا بالكامل، لابس أسود، وبيعص أصبعه بهدوء وكأن مفيش أي حاجة حصلت. وفجأة… جرس الباب رن تاني. رنة الجرس المرة دي ما كانتش زي المرات اللي فاتت. كانت دقة منتظمة، هادية… ورزينة بشكل يقلق. أمي وأختي يادوب تحركوا، خطوتهم كانت تقيلة كأنهم مجذوبين بسلاسل مخفية، ووقفوا ورايا بظبط، عينيهم متثبتة على باب الشقة من غير ما يرمشوا. الطفل اللي في حضني تحرك خفيف، ومص صباعه بطل، ورفع عينه السودا كاملة للباب… كأنه عارف مين اللي واقف بره. قربت من الباب بخطوات مرعوبة، كل حتة في جسمي بتتنفض. مديت إيدي ورجلي بتخبط في الثانية، وبصيت من العين السحرية. المرة دي الممر كان منور بنور العمارة العادي، بس قدام الباب… كان واقف راجل. لابس بدلة كحلي كلاسيك، مظبوطة عليه بالشعرة، شعره أبيض مظبوط، وحاطط إيده في جيبه. شكله يدي على مدير بنك أو راجل أعمال متقاعد، ملامحه هادية جداً وشيك، بس الحاجة الوحيدة اللي كانت غلط… إن مالوش ظل على الأرض. النور فوقه، بس الأرض تحته فاضية تماماً. قبل ما أسأل أو أنطق، صوت جالي من ورا الباب، مش صوت الراجل… ده كان صوت الست اللي اختفت من ثواني! الصوت كان طالع من ودني أنا، كأنها بتهمسلي جوه دماغي: “متفتحيش… ده مش من عندي، وده مش أبويا. ده اللي اتجوزته… ده أبوه.” بلعت ريقي وأنا حاسة إن قلبي هينط من صدري. بصيت للطفل اللي في حضني، ولقيت وشه اتغير. ملامحه اللي كانت هادية بدأت تتشنج، وصوابعه الصغيرين مسكوا في القماش الأسود بقوة. صوت الراجل جه من ورا الباب، نبرته كانت دافية وبسيطة جداً، عكس كل الرعب اللي بيحصل: “يا بنتي… افتحي. أنا مش جاي أضر حد. أنا جاي أخد ابني وأمشي. هي ضحكت عليكي… هي ما هربتش عشان بتحبني، هي هربت عشان أخدت حاجة مش بتاعتها.” بصيت لأمي، لقيتها فتحت بؤها ولأول مرة نطقت بصوت مش صوتها، صوت متقطع ومبحوح: “افـ…ـتحي… يا… بنـ…ـتي…” وأختي سارة رفعت إيدها الخشابية وشاورت على المقبض! الراجل بره كمل كلامه بنفس الهدوء المرعب: “لو فضلت عندك… الشقة دي مش هتشوف النور تاني. الطفل ده بيتغدى على خوف اللي حوليه… بصي في عين أختك وأمك وأنتي تفهمي.” بصيت لأمي وسارة… شفايفهم كانت بتزرقّ، وخطوط سودا رفيعة زي العروق الميتة بدأت تظهر على رقبتهم وبتطلع على وشهم ببطء! الطفل في حضني بدأ يضحك… ضحكة مكتومة، هادية، وصافية جداً، وفي نفس اللحظة العروق السودا في وش أمي وسارة كانت بتكبر وتنتشر أكتر. حسيت إني محصورة بين نارين: ست جنية اختفت وسابتلي أمانة مرعبة، وراجل بشري -أو بيعد نفسه بشري- واقف على الباب ومالوش ظل، وأمي وأختي بيموتوا قدام عيني في كل ثانية التأخير فيها بتمن حياتهم. إيدي اترعشت على المقبض… حركت المفتاح نص لفة، وصوت التكة رن في الشقة كلها. الطفل سكت فجأة، وبصلي بنظرة أول مرة أشوفها… عينه السودا تحولت للون أحمر دموي! حسيت برودة العيون الحمرا بتخترق صدري، وكأن الواد بيحذرني… أو بيكشف لي عن وش تاني خالص. التكة الثانية للمفتاح لفت في الباب، ومقبض الباب نزل لوحده ببطء. الباب اتفتح شبر… الهواء اللي دخل من الممر كان ساقع زي التلج، وريحة شبه ريحة الكبريت المحروق ملت المكان. الراجل أبو بدلة كحلي ابتسم ابتسامة عريضة جداً… ابتسامة واسعة بشكل مش طبيعي، لدرجة إن أطراف شفايفه قربت توصل لودانه. قال بنبرة صوته اتغير وبقى فيها صدى معدني يخوف: “عفارم عليكِ يا شاطرة… سلّمي الأمانة.” مد إيده جوه الشقة. صوابعه كانت طويلة ونشفت في ثانية، وضوافر حادة سودا طلعت منها. قبل ما إيده تلمس القماش الأسود الملفوف بيه الطفل، صوت الست الجنية يرن جوه دماغي بصرخة جابتلي صرع: “إياكِ! ده مش أبوه… ده خادم العشيرة الملعون! لو خد الطفل حرق الشقة بيكم!” الدم اتجمد في عروقي. بصيت لوش الراجل… ملامحه البشرية الشيك كانت بتتلاشى، وجلده بيتقشر زي الورق المحروق وبيتساقط على السجادة، وتحته جلد أسود مقشف زي حراشيف التعبان. في نفس اللحظة، أمي وأختي -اللي العروق السودا كانت غطت نص وشهم- اتحركوا فجأة! مسكوني من دراعاتي بآلية مرعبة، ومش بيسحبوني لورا… لأ، دول كانوا بيزقوني ناحية الراجل! سيبوني! ماما!! سارة!!” صرخت بأعلى صوتي. لكن مفيش فايدة… كانوا زي الضلوع الخشبية، مسكتهم على دراعي تقيلة وتوجع، وعينيهم المتغيمة كانت باصة للفراغ. الراجل قرب صوابعه أكتر، والطفل اللي في حضني نزل من عينه الحمرا دم بدل الدموع. صرخة بيبي طفولية جداً طلعت منه… المرة دي صرخة وجع حقيقي. في اللحظة دي، الغضب والغل غلبوا الخوف جوايا. بجسمي كله، وبلفة واحدة، زقيت الراجل بكتفي بكل قوتي وضربت الباب برجلي. الباب اتخبط في وشه بصوت قنبلة، وسفخ صوابعه الأسود المروّس فاتحبس في قفلة الباب وتكسر زي الحطب الناشف! صوت صرخة حادة بره الشقة هزت السلم كله، والنور الممر بره فرقع واللمبات اتدشمت! رجعت لورا، وأمي وأختي وقعوا على الأرض زي العرايس المقطوعة خيوطها، العروق السودا بدأت تهدا في وشهم ببطء لكنهم كانوا غايبين عن الوعي تماماً. الطفل في حضني عينيه رجعت سودا تاني، ودموعه مسحت الدم من على وشه. بصلي واستكان… وفي ثواني، القماش الأسود الملفوف بيه بدأ يتحل لوحده ويترمي على الأرض. الطفل ماكنش لابس حاجة… وفي وسط صدره الصغير، كانت فيه علامة محفورة بتنور بنور أحمر خفيف. علامة غريبة، شبه نجمة متداخلة مع حروف مش عربية. صوت خبطات مرعبة بدأت تضرب في باب الشقة من بره… مش خبط بإيدين، ده كان خبط بأجسام ثقيلة، كأن فيه وحوش بترمى نفسها على الباب عشان تكسره. الباب الخشب بدأ يتشقق من النص! مسكت الطفل بكتفي، وجريت على أوضة أختي عشان أستخبى فيها أو أطلب نجدة من البلكونة. أول ما دخلت الأوضة وقفلت الباب بالمفتاح، بصيت ناحية البلكونة… الست الجنية، بالعباية الحمرا، كانت واقفة بره البلكونة… طايرة في الهوا قصاد السور، وعينيها بتشع نور أحمر، ومشيّرة صباعها ناحيتي. قالت بصوت هز زجاج الأوضة: “الوقت خلص يا بنتي… افتحي البلكونة، يا إما الباب اللي بره هيتدمر، وهما مش حيدخلوا الشقة بس… دول هياخدوا روحك أنتِ وأهلك!” وقفت في نص الأوضة، الخبط على باب الشقة بيزيد والباب بيتدمر، والست واقفة في البلكونة مستنية… والطفل حط إيده الصغيرة على رقبتي، وحسيت بنبض قلبه السريع بيمشي في جسمي أنا! يتبع الجزء التاني

مقالات ذات صلة

و.فاة شقيق نهال عنبر في أمريكا.. وطلب عـ،ـاجل من الفنانة للجمهور

اختي التوام كانت مديرة قصر المافيا حكايات شروق خالد ٣

امي في المستشفى محتاجه ١٥٥ الف جنيه١

مراتي بترضع ابني

نواره

المكالمه

اترك تعليقاً إلغاء الرد