وصيه صفيه 4

*****************************

بعد قليل كان صفوت يقف في إستقبال صديقه وأبنائه وإلى جواره علي … رحب صفوت بسعيد الذي سلم عليه ونظر إلى جواره قائلا بإبتسامة: اكيد انت علي … فيك شبه كبير من عزت الله يرحمه

صافحه علي قائلا بود: حمدالله على السلامة يا عمي… حضرتك نورت مصر

سعيد بإمتنان: منورة بأهلها يا ابني … اخبارك إيه وأخبار الست والدتك وإخواتك… عمك صفوت قالي انك عندك أخت اصغر من لبنى اسمها لمياء تقريبا … اصل انا لما سافرت ماكانتش لسه اتولدت

على: ايوه يا عمي وكلهم كويسين وبخير الحمدلله

سعيد: إبراهيم ابني يا علي مش عارف حتكون لسه فاكره ولا لأ

مد علي يده مصافحا إبراهيم وقال مرحبا به: آه طبعا فاكره … انا كان عندي تمن سنين وقت حضرتك ماسافرت وسبت مصر …ازيك يا إبراهيم أخبارك إيه?

إبراهيم: بخير والحمد لله

سعيد وهو يشير إلى ابنته: ودي سوزان بنتي خلفتها فامريكا

رحب بها علي ثم سأل إبراهيم قائلا: وانت درست إيه بقى فامريكا يا إبراهيم?

إبراهيم: انا معايا دكتوراة فإدارة الأعمال … وانت درست إيه

اسرع صفوت يجيبه قائلا: علي مهندس ديكور يا إبراهيم وهو نائب رئيس مجلس إدارة الشركة بتاعتي وتقدر تقول إنه دراعي اليمين اللي ماقدرش استغنى عنه ابدا

علي: متشكر اوي يا عمي

بعد قليل كانت نورا تهبط الدرج إلى الأسفل حيث سلمت على الجميع ورحبت بهم واستأذنت لتطلب من الخدم تحضير المائدة … وبعد قليل التف الجميع حول مائدة الطعام وشرعوا في تناول الطعام والتحدث في أمور عدة…حتى وجه إبراهيم سؤاله إلى نورا التي كانت تجلس بجوار علي قائلا بإهتمام: والأنسة نورا بتدرس إيه ?

سعل علي بشدة عند سماعه لسؤال إبراهيم فناولته نورا كوب الماء الموضوع إلى جوارها وما إن هدأ قليلا حتى التفت إلي إبراهيم قائلا: كنت بتقول إيه بقى يا دكتور ?

إبراهيم بدهشة: أنا كنت بسأل الأنسة نورا عن دراستها

التفت إليه سعيد قائلا: إيه اللي بتقوله ده بس يا ابني?

ازدادت دهشته وهو يجيب قائلا: إيه يا جماعة بتبصولي كده ليه ? هو انا قولت حاجة غلط ?

سعيد: انسة إيه بس ? يا ابني نورا تبقى مرات علي

شعر إبراهيم بالحرج الشديد فنظر إلى علي قائلا: أنا اسف اوي يا باشمهندس… ماحدش قالي والله

علي بضيق: خلاص ماحصلش حاجة

صفوت لإبراهيم: كمل اكلك يا ابني… ماحصلش حاجة ومافيش داعي للأسف