حب اعمي 2
حب اعمي 2
قاطع أفكاره صوت هاتفه ليلتقطه بملل ولكن ما ان رأى اسم محدثه حتى رد سريعا قائلا فى لهفة:
جبت العنوان؟
استمع لمحدثه ليغمض عينيه بقوة يلعن غبائه ليفتحهما مجددا وهو يقول:
انت متأكد؟
استمع الى محدثه مجددا ليقول بحزم:
تمام ..لو اتأكدت من كلامك..هحولك الفلوس على حسابك فى البنك..سلام دلوقتى
أغلق هاتفه لينظر الى صورة زوجته الرابضة على مكتبه قائلا:
ازاى مخطرش فى بالى انك ممكن تكونى عندها..يمكن عشان عارف انك مبتطيقيش نزار ومش هتروحى عنده
ليشعر بالغيرة فجأة تمزق قلبه وهو يقول:
والهانم بقى قاعدة فى بيته كدة عادى
ليلوم نفسه على تفكيره مستطردا:
ده بيت صاحبتها ياشهاب مش بيته لوحده
ليزفر بقوة وهو يمرر يده فى شعره بعصبية قائلا:
بس هو قاعد معاهم ومش بعيد دلوقتى يكونوا قاعدين مع بعض بيضحكوا وهو بيتغزل فى عينيها الخضرا اللى ممكن تسحر اى راجل ..خصوصا لو راجل عينيه زايغة زى نزار
لينهض قائلا بغضب:
انا هقوم حالا وأروح اجيبها من شعرها
ليأخذ نفسا عميقا وهو يجلس مجددا فى مكانه قائلا لنفسه:
اهدى كدة ياشهاب..ومتتسرعش..الموضوع عايز هدوء أعصاب عشان تعرف تفكر هتتصرف ازاى..اهدى ياشهاب..اهدى
الفصل الثالث عشر
**********
ساد الصمت للحظات بعد ان أفضت ضحى بمكنون قلبها وحكايتها مع شهاب كاملة…ثم قالت نوران بهدوء وهى توجه حديثها الى صديقتها:
بصى ياضحى ..انتى مش بس صاحبتى وبس..انتى اختى اللى ربنا عوضنى بيها عن يتمى ووحدتى.. وواجبك علية مش انى اطبطب عليكى واقولك ان كل اللى بتعمليه صح وأنا شايفاكى غلطانة..لأ.. واجبك علية لو شفتك غلطانة أوجهك وأقولك فين الغلط..وانتى عملتى أكبر غلطة فى حياتك ..غلطة مش سهلة ومينفعش نعديها
نظرت اليها ضحى بدهشة وكادت ان تقول شيئا لتسرع نوران قائلة:
اسمعينى بس..انا مش بدافع عن شهاب على فكرة لأنه غلط غلطة كبيرة بس غلطته كنتى انتى السبب فيها..مش هعيد كلام سمعتيه منى قبل كدة وأكيد سمعتيه منه..وانا متأكدة انك عارفة غلطاتك كويس..بس فيه حقيقة كلنا عارفينها ومستحيل ننكرها..احنا كلنا متأكدين ان شهاب مش بس بيحبك ده بيموت فيكى ياضحى..واذا كان غلط فأكيد مكنش فى وعيه واكيد بيندم فى اليوم ألف مرة..كلنا بنغلط ياضحى ومحدش فينا معصوم من الغلط..غلطة شهاب كبيرة ومش سهلة بس محتاجة قلب كبير زى قلبك ياضحى..عشان يغفر ويسامح
