انتي حقي سمرائي ٣

قالت هذا وتركته تدخل الى البيت وهى تُمحى أثار دموعها
توجهت مباشرةً الى الغرفه الموجوده بها عقيله وتحدثت بتعسف:عاطف فين خلينا نرجع لأسيوط أحنا لازم نرجع أسيوط الليله.

تحدثت عقيله بسخريه وهى تنهض من على الفراش:ليه أيه السبب أنتى الى أتشعلقتى وقولت هاجى معاكم طنط وجيده وحشتنى،أيه الى أتغير؟

ردت سولافه بربكه:مفيش حاجه أتغيرت،بس انا أفتكرت انى عندى سكشن مهم بكره وواحده زميلتى من شويه فكرتنى بها عالتليفون،ولازم أحضره لأنه عليه درجات أعمال سنه.

لم تصدقها عقيله فهناك أثار لدموع أسفل عين سولافه،كما أن بصوتها حشرجه كأنها كانت تبكى
ولكن تخابثت قائله:ومين سمعك خلينا نرجع انا مش طايقه أفضل هنا دقيقه واحده،
عاطف أنا اتصلت عليه من شويه قالى أنه كان عند صديق له بيزوره وفى السكه راجع لهنا وكنت لسه هجيلك أقولك تحضرى نفسى علشان هنرجع أسيوط الليله،وخلى سى عاصم يعمل الى هو عاوزه بسمره هى غبيه وتستاهل،الله أعلم وجيده ولا عاصم عملوا فيها ايه طفشت وسابت لهم البيت الغبيه بدل ما كانت تجى لعندى وأنا أجيب لها حقها من عين عاصم ووجيده راحت لخالتها.
ردت سولافه:سمره تروح مكان ماهى عايزه هى حره،خلينا فى نفسنا أنا تقريباً جاهزه هروح أجيب شنطتى من الاوضه الى كنت فيها.

قالت سولافه هذا وخرجت
تحدثت عقيله:مفكرانى مش فاهماكى يا روح أمك الدموع فى عينك واضحه زى الشمس بس كويس علشان تعرفى ولاد وجيده الى كان نفسك أخوكى يبقى زيهم،وحياتك مفيش فرق غير حبة الفلوس وهى الى عامله المكانه الى عندهم.

بعد عدة دقائق ببهو المنزل
تحدث حمدى:الوقت أتأخر يا عقيله الساعه تقريباً قربت على عشره ونص خلوكم للصبح
نص سواقة الليل خطر.
ردت وجيده:قول كل سواقة الليل خطر،وكمان الطريق فيه جزء صحراوى ومقاطيع الجبل.

ردت عقيله:لأ أنا كنت جايه أطمن وأعرف فين سمره وليه سابت البيت، بس عاصم أبنك قالى بلاش أدخل وانا هسمع كلامه أنا مش هدخل بين راجل ومراته هما أحرار بس الحمد لله أطمنت أنها بخير.
رد عاطف بتشفى:مالوش لازمه وجودنا خلاص طالما سمره أتعرف طريقها،ومتخفش يا خالى أنا معايا سلاح ومش أول مره أمشى عالطريق ده بالليل وربنا بيستر.

لفت أنتباه وجيده صمت سولافه وكانت ستتحدث لولا مجئ عامر.

الذى قال متعجباً: واقفين كده ليه عند الباب!
ردت سولافه بحده: أحنا ماشين دلوقتى.