غيبات تمر بالعشق الجزء التالت

الفصل الحادى عشر
مشاعرها بعد زيارة هالة لها أصبحت مثل البركان المدمر بعثت إلى شقيقها وانفجرت في وجهه حتى أن صوتها الحاد الغاضب وصل إلى مسامع العاملين بالمشفى. نجحت هالة في إثارة الغضب لديها عندما ذكرتها بالواقع المرير لها. بضعة سنوات أخيرة قامت بتدمير كل شئ حتى كرامتها بداية من إهمال زوجها ليترتب عليه اندفاعه نحو النساء ليسد فراغه منها. حقًا استحقت لقب المرأة الفولاذية الباردة مثلما يتحدثون عنها صديقاتها لتحكمها في كل شئ زوجها وشقيقها وابن أخيها حتى ابنتيها عندما قررت زواجهما ونفيهما للخارج وتريد الآن أن تكمل سيطرتها الكاملة على ابنها الوحيد من سوء ما تعايشته وهي صغيرة في بيئة اجتماعيه معدمة قررت عندما ارتفعت ألا تعود للاندماج مع تلك الطبقة مرة اخرى بداخلها حقد طبقي لا تريد العوده مثلما كانت.
حاول شقيقها تهدئتها ولكن دون جدوى ليستدعي قصي الذي جاء يرتجف مهرولًا و يبتلع ريقه ليصطدم بصفعتها القوية وهي تقول : أنت للدرجة أعمى عايز تأذي زيدان وعلشان مين علشان حته بنت سنكوحة. أنا قلتلك اخطفها مش تروح تخطفها وهي معاه يا حيوان.
وضع قصي يده على وجهه يتحسس أثار الصفعه قائلًا بغيظ : لا كان لازم تكون معاه..علشان ميشكش فينا وكنت خلاص هقرب من هدفي وكانت هتتخطف بس هربت وهو كان هيخلص عليهم.
جذبته من تلابيبه قائلة : وهنعمل ايه ؟ ده مسجل ليهم. أنا شخصيًا عمره ما هيأذيني، لأني أمه أما أنت بقا بغبائك حطيت رقبتك تحت رجليه ولسه ده مش بعيد يقتـ,,,ـلك.
أزاح يدها قائلًا : أنا معاكي في مركب واحد يا عمتى احنا دافنينه سوا وبعدين هو معاه اعتراف من اتنين مسجل خطر كبيره هيهددك بيه مش أكتر.
أخذت تفرك يديها بغيظ قائلة : أنا مش عايزة أي حاجة تهد اللي بنيته اللي عملته ده كله علشانه وهو غبي رمرام زي أبوه. وأنت مفيش منك رجا زيك زي أختك.
زفر قصي بحنق قائلًا : وأنا مالي أنا واختي ؟ أنتِ اللي غلطانة. أنا كنت مرتاح وكانت ريحانة معايا كويسة. ايه مكنتيش عايزاها تطلق طبعًا ما أنتِ مش فارق معاكي.
نظرت إليه بسخرية قائلة : ولا عمرك أنت ولا هي ولا أختك ولا شذى تفرقوا معايا. هو بس اللي يفرق معايا ولعلمك يوم ما حد فينا هيقع هيبقا أنت يا حلو أنا لا.
هز رأسه بوعيد قائلًا : ماشي يا عمتى أنتِ اللي ابتديتي والبادي أظلم بس خلي بالك افتكري شكل ريحانة لما كانت عندك أخر مرة أنا مشوفتهاش بس أبويا قالي إنها هتولعها.
لوت شكران شفتيها بامتعاض قائلة : ولا تفرق بالنسبة ليا لا هي ولا أنت. أنا اللي في دماغي هعمله حتى لو قبل جوازهم بدقيقة هنفذ ما هو مش هيقدر يحميها مني وهو ايده في ايد المأذون.
ضحك قصي بسخرية قائلًا : ألا قوليلي يا عمتى هو أنت هتحضري الفرح ازاي وهتعزمي صحباتك تقوليلهم ايه ؟ ولما يعرفوا إنها كانت مراتي وضعك هيكون ايه ؟
ابتسمت شكران بسخرية قائلة : ومالك متأكد أوي إنهم هيوصلوا إنهم يعزموا لفرحهم مش جايز أنابدأت ألعب وأتصرف من ساعة ما أنت فشلت للأسف أنت كارت محروق.
قطب قصي جبينه قائلًا : لما أنا بقيت كارت محروق وأكيد أمير مش هيبقا في صفك ده صاحب عمره وسمر فاشلة زي مين بقا يا عمتى ؟ واحد من اجواز بناتك؟
تعالت ضحكاتها قائلة : ولا حتى دول أنا مش عبيطة أسلم دقني ليهم دول ما يصدقوا ينهشوا في لحمي أنا اتفقت مع واحد وبصراحة حلال عليه ريحانة.
ليستشيط غضبه ويتأكل من الغيظ عندما قالت : ايه رأيك مش أحسن منكم كلكم بصراحة اللي عندي ده دايب فيها من زمان وعاجب السنيورة أمها أوي هي أه مش بتحب أمها بس هتخاف من الفضيحة.
توتر قصي قائلًا : ايه اللي بتقوليه ده ؟ أنا مش عايزها تتجوز حد أنا عايزها ترجع لحضني. أنتِ بدوري على مصلحتك وبس، لكن أنا لا ريحانة دي بتاعتي.
لوت شكران شفتيها بسخرية قائلة : ولما هي بتاعتك وكنت خايف من يوم انها تبقى لغيرك مش كنت تحافظ عليها ؟ ..أنا مش مستغربة ابني لأنه حاططها هدف ووصل ليه.
قبض على يديه بعصبية قائلًا : هقـ,,ـتله وهقتـ,,,ـل أي واحد يقرب ليها، وحطي في بالك الكلام ده، ولو حاولتي تقربي الزبالة اللي معاكي منها هقول لزيدان على كل حاجة.
ارتبكت شكران قائلة : أنت أجبن من إنك تعمل كده وحتى لو حصل ولا يهمني أنتم كلكم سفله ووصوليين. وفي النهاية هبان اني كنت بخاف عليه مش ضده.
ظل ينظر إليها بمكر وخبث لتخشى بطشه فسألته قائلة بلا مبالاة مصطنعة : قولي كده لما أنت تروح تقوله الحقيقة هيعمل فيا ايه ؟ ولا حاجة بالنهاية أنا أمه يا قصي وبلاش تدخل بينا. لأحسن نارنا تلسعك.
ابتسم قصي بخبث قائلًا : أنتِ أول واحدة هتتلسعي يا عمتى وريحانة بايدها الاتنين هي اللي هتلسعك هتخلص القديم والجديد وأمها دي كفيلة تدفعها لكده.
تعالى هرمون الخوف لدي شكران ولكن تماسكت قائلة : شمس أمها دي زيها زي هالة أمك ست جعانة وطماعة مش بيطمر فيها. أنا هسففهم التراب واحد واحد وهتشوف أنا ولا هما حتى أنت.
هز قصي رأسه بخبث قائلًا : وماله خلينا نشوف كلنا بركات الدكتورة شكران منك نستفيد يا عمتى العبي في ملعبك وأنا كمان هلعب والبقاء للأقوى والأقوى أنا.
خرج قصي عازمًا أمره على الوصول إلى ريحانة من جديد حتى إن كلفه الأمر قتـ,,,ـل زيدان.
أما عن شكران فقد وضعت رأسها بين كفي راحتيها غير مستوعبة أن فعلتها ارتدت لها مرة أخرى وأن تخلصها من شذى لا يعادل تخلصها من ريحانة فريحانة أقوى بوجود زيدان في محيطها ولتأكدها الشديد من نقاء وصفاء ريحانة كل ذلك يقلقها يجعلها تعيد التفكير مرة أخرى فيما تفعله مقدمًا.