خطايا برئيه ٤

——————-

بعد مرور ساعات الصباح الأولى التي قضتهم صاحبة الفيروزتان في جلسة علاج مع طبيبها النفسي الذي كان يسعى جاهدًا أن يحفزها على الصمود ويساعدها كي تغير مسار أفكارها وأولوياتها.

فكانت تشعر براحة عارمة في كل مرة عن ما قبلها. حتى انها تعودت أن تذهب دون أبيها وقررت أن تعتمد على ذاتها فقرار التغير نابع من ذاتها ولابد أن تتحمل تبعاته وحدها،

أما هو فكان ينتظرها بلا كلل أسفل بناية الطبيب وعندما أتت لموضع السيارة وصعدت بجانبه تساءل بنبرة مهتمة:

-إيه الأخبار طمنيني؟

هزت رأسها ببسمة واسعة وأخبرته وهي تجلس بزاوية المقعد بمواجهته:

-كله تمام …مقدرش اقولك ببقى مرتاحة أد ايه بعد ما باجي هنا وبيبقى عندي طاقة إيجابية تكفي العالم كله

بادلها بسمتها وعقب بتحفيز:

-طب ياريت بقى نوفر الطاقة الإيجابية الجميلة دي للمذاكرة علشان خلاص الأمتحانات على الأبواب

أجابته هي بنبرة مفعمة بلأمل:

-انا فاتني كتير بصراحة بس هحاول أعوض الأيام اللي جاية

اومأ لها وإن كاد يشعل موقد السيارة تساءلت بريبة:

-هتوديني فين؟

رفع منكبيه وقال بإعتيادية:

-هروحك…

نفت برأسها وأخبرته وهي تلملم خصلاتها خلف أذنها بخجل:

-مش عايزة أروح…

لتتلجم لهنيهة تحت وطأة نظراته المتأهبة لباقي حديثها وتستأنف بعدها:

-انا عايزة اروح معاك البيت

صُدم من مطلبها، وخُيل له أنها تمزح ليس أكثر فمن المؤكد أنها ليست بتلك الوقاحة كي تقصد ما وصله، ولذلك تدخل عقله و هدر قائلًا بكامل صوته الأجش وبحدة أجفلتها:

-بيت مين…أنتِ أكيد بتهرجي صح …هو عادي كده تروحي مع أي حد بيته فوقي الله يخليكِ وقولي كلام منطقي انتِ بنت ناس وميصحش

شهقت بتفاجئ من ما استشفه بالخطأ من مطلبها وهدرت بغيظ شديد تدافع عن ذاتها وهي ترفع سبابتها بوجهه:

-انت بتقول إيه … يظهر أنك أنت اللي اتجننت انا مكنش قصدي اللي وصلك كل الحكاية أن طمطم وحشتني وكنت عايزة أشوفها واقعد معاها و اتعرف على أختك … بس يظهر أنك فسرت كلامي غلط وبجد ندمانة إني طلبت طلب غبي زي ده…واتفضل تقدر تروحني

قالت أخر جملة وهي تعتدل بجلستها وتشيح بنظراتها عنه، مما جعله يزفر حانقًا ويلعن تسرعه، ويعتذر قائلًا:

-أنا آسف..بس اصل انتِ ساعات بتعملي وبتقولي حاجات بتطير برج من عقلي ..يعني مينفعش تقولي لشاب هروح معاك البيت اكيد لازم يفهم غلط