دموع ممنوعه ج الاخير

ابتسم عادل بعد أن تبادل نظرة معينة مع عمه قائلا … لسة برده غشيم فى الادارة ياعصام …

.. ازاى بقى …

… زى الناس ، وهو اغشم منك انه وافق ، مش بس وافق ، ده هو اللى تقريبا طلبه بنفسه ، يمكن فعلا المصنع ده بالذات انتاجيته أفضل ، بس مصنع اعتمادى ، من غير باقى المجموعة دى هينهار ، غير باقى المصانع هنا ، أى مصنع فيهم ممكن ينفصل بسهولة من غير خساير ، مش بس كدة ، ده يكمل ويقف وينجح لوحده ، انما التانى احنا اللى بنوردله تركيباته ، واحنا اللى بنوزع واحنا اللى بنصدر ، غير عقوده اللى مرتبطة بينا من سنين ، وأظن انت عارف احنا قد ايه تعبنا عشان نوفر للمصنع ده مواده الخام ، لدرجة المزرعة اللى اتعملت وجبنالها أكبر وأهم مختصبن فى الزراعة عشان ننفذها ، وصرفنا ملايين ، ومشوفنلهاش إنتاج غير بعد ست سنين ، ولو حاول يجيب المواد والنباتات دى من برة ، مش هيعرف ، وأن عرف هيلاقيها بملايين ،
ببساطة كدة كل عقود التوريد كانت قبل كدة بأسعار قليلة جدا ، لأن ده مصنعنا اصلا ، وكان انتاجنا الاساسى ، وارباحه للكل ، مش محتاجين تغلية، لكن مادام اتقسم ، يبقى هنشتغل بكل المواد بتاعنا بأسعار السوق العالمى ، يعنى كل مصنع عندنا هيبقى نقطة إنتاج لوحده ، وعندنا عروض فعلية بأرقام وهمية لكل مصانع الكريمات على مستوى العالم …

قال عصام بزهول … فعلا ..

أجابه أكرم قائلا .. واكتر من كدة ، والمزرعة كمان ، مش ملاحقين عروض وطلبات ، غير أن فى خطة متكاملة لتوسيع إنتاجها ،
وبمجرد ما تنتهى العقود الحالية مع مصنع الكريمات اللى خده إبراهيم ، وده على أول السنة طبعا ، هنجددها بأسعار السوق العادية ،
وكمان هندرس بعض العروض اللى عندنا ونبدأ نوسع التوزيع …

قال مجدى بفرحة ..، معنى كدة أن المصنع مش هيبقى نقطة إنتاج رئيسية ، ده بالعكس ، لو بيكسب مليون ، هيبقى ربع …

أجابه عادل …وأقل من كدة وحياتك ، احنا تقريبا كنا بنوردله أغلى مواد خام فى العالم ببلاش ، لأن ده كان مصنعنا ، يعنى بنعوض انتاجية كل مصنع بالتانى ، دلوقتى احنا مؤسسة منفصلة ، هنشتغل بالأسعار العادية ، ولو مش عاجبه يروح يجيب من مكان ما يحب ، واحنا الف جهة هتمو,ت على انتاجنا …

ابتسم الجميع فرحا ، فقال عادل
… يلا كل واحد على مصنعه ، وزى ما اتفقنا كل المستجدات أعرفها اول باول ، واجتماعنا هنا مرتين فى الاسبوع ، الاتنين والخميس …