ملح بطعام السكر 1

يأخذ رياض يد عمه براحة كفه ويقبلها ”
حاضر يا عمي، بس عمي مهما حوصل هيفضل له احترامه ومجامه الكبير عندى، يمكن مريض ومجدرش يتصرف معاها مجدرش اسئ الظن فيه عمي منصور راجل وعمره ما يجبل علي روحه العار يطوله ويدنس توبه
عن اذنك يا عمي واول ما اعرف الحكاية هتصل ابلغك
يودعه عمه وقلبه يشتعل من الغضب ويجافيه النوم خوفا من عار قادم يدنو له الجبين ولا يعرف سببه
••••••••••••••••••••••••••••••••••••••••••••☆
يصل رياض الي مصر في صباح اليوم التالي ومعه سباعي احد رجاله الاشداء الذي كان يقود السيارة ليترك رياض يرتاح وينام له ساعه علي الاقل لكي يصفي ذهنه للقادم ،
ينبهه بعد ان وصل الي احد المدائن الكبري ليبلغه ”
رياض بيه وصلني مصر ،لفيني العنوان اللي هنجصده

ينفض رياض عن جسده الكسل ويفرك عيناه بشدة لتجول فيما حول ويبتسم بغضب مكتوم

تمام يا سباعي ، انزل انت هنا، وانا لما اخلص مشواري هجي اخدك او اتصل بيك تجيلني لو احتاجتك

ينفذ سباعي الامر بدون جدال ، ينزل ويعطيه مفاتيح السيارة ”
تحت امرك يا بية هجعد في انتظارك
يتركه رياض وينطلق الي وجهته راسا الي بيت عمه
____________
قبلها بساعه تقريبا ، تستيقظ ورد وترتدي ثيابها الغير محتشمه كعادتها في الفترة الاخيرة، لتخرج الي الصاله استعداد للخروج لتري امها جالسه وبادي علي ملامح وجهها انها لم تتتذوق طعم النوم
لتنهض عندما راتها وتسالها بخوف”
علي فين رايحه اكده علي الصبح؟ اكيد مش علي الكلية بلبسك الفاضح ده !
لتقف امامها وتقبض علي ذراعيها بقوة”
جوليلي فيكي ايه واتبدل حالك اكده ليه ،حرام عليكي يا بتي انت بتعملي ليه اكده عايزه تموتيني بحسرتي عليكي

تزيح ورد يد امها عن ذراعيها بحدة وتصيح بغضب”
انا كده ومش هتغير، وبعد طردك لمودي امبارح قطعتي كل صلتك بيا،اقولك انا هريحك وهتجوزه النهاردة وهجيبه يعيش معانا هنا، لو عجبك تعيشي معانا ماشي مش عجبك اعملي اللي انتي عايزة، انتي لازم تفهمي دي حياتي وانا حره فيها

تلطم امها خدها وتنهار صارخه فيها”
يامرك يا حفيظه ،ليه اكده يا بنتي تجلبي العار ليا ولابوكي ، بجي ده ذنبنا اننا كنا بنعملك كل اللي نفسك فيه
حرام عليكي انا مستهلش ده منك ، انا امك حبيبتك

تضغط ورد علي اسنانها بعصبية”
لو امي حبيبتي تعملي اللي يريحني، وتخليني اتجوز الانسان اللي بحبه ويحبني، وملكيش دعوه وحش ولا حلو ده اختيارى وانا متحملاه لكن ، ازاي عرقك الصعيدى رافض اني اعيش حياتي زي ما انا عايزة، خلي بقي اصلك اللي متحكم فيكي ينفعك ، بعد ما خلتيني اخرج عن طوعك وهعمل اللي يرضيني انا وبس فاهمه انا وبس محدش ليه عندى حاجه بعد بابا، اما انتي روحي عيشي في حزنك وسبيني اعيش حياتي بطريقتي