فداء

فداء كانت لسه مكملتش تمانية وعشرين سنة لما الدنيا قررت تقلب بيها مرة واحدة. جوزها العوض مات في حادثة على الطريق وهو راجع من شغله، سايبها بطفلين، ياسمن عندها خمس سنين وحنان لسه يدوب تلات سنين ونص، وسايبها كمان في بيت عيلة كلها عيون بتبص عليها مستنية تشوف هتعمل ايه.

العوض كان راجل طيب وغلبان، بيحب فداء حب العمر كله، وكان دايما يقولها انتي بنتي قبل ما تكوني مراتي. لما مات، فداء حست ان ضهرها اتكسر، بس مكنش عندها وقت تعيط كتير، كان لازم تقوم تمسح دموعها وتشوف هتربي العيال ازاي.

بعد الاربعين على طول، حماتها بدأت تلمح. يا فداء يا بنتي، البيت من غير راجل زي المركب من غير ريس. واخو جوزك فؤاد موجود، راجل ومالي هدومه، وطول عمره بيحب العوض وبيحب عياله. فؤاد ده كان صعيدي صعيدي، كلمته سيف على رقبة الكل، وشنبه واقف وعينه حامية، وكان متجوز قبل كده ومراته ماتت وسايباله عيل واحد، وطول عمره شايف ان الست الارملة مكانها بيت جوزها، ولو هتتجوز يبقى اخو جوزها اولى بيها عشان يلم لحمه.

فؤاد دخل على فداء في يوم وهو شايل كيس فاكهة وشايل معاه ابوه الحاج حمدي. الحاج حمدي راجل كبير، صوته تخين وكلامه قليل بس لما يتكلم الكل يسكت. قالها بصي يا فداء، احنا مش هنسيبك تتلطمي في الدنيا لوحدك، انتي مرات ابننا وام عيالنا، وفؤاد عايزك على سنة الله ورسوله، يربي عيال اخوه ويصونك.

فداء كانت قاعدة وضامة ياسمن وحنان في حضنها، وقلبها بيدق جامد. هي عمرها ما شافت فؤاد غير انه اخو جوزها الكبير اللي بتخاف منه، عمرها ما حست ناحيته باي حاجة غير انه راجل شديد. قالت بصوت واطي بس مسموع، يا حاج حمدي انا مقدرة كل كلامكم فوق راسي، بس انا لسه خارجة من حزن كبير، ولسه مش قادرة افكر في جواز، انا عايزة اربي عيالي وبس.

فؤاد وشه احمر، وحس انها بترفضه قدام ابوه. قالها وانتي فاكرة الجواز لعبة؟ احنا بنقول نلم لحمنا بدل ما الغريب يطمع فيكي. انتي صغيرة وحلوة والناس عنيها وحشة.

الكلمة وجعت فداء اوي، حست انهم شايفينها لحمة في السوق وخايفين عليها تبوظ. بس سكتت وقالت ربنا يسهل، سيبوني افكر.

من الناحية التانية كان في حكاية تانية بتتولد من غير ما حد ياخد باله. ياسمن بنتها كانت تعبانة شوية، عندها كحة جامدة مش بتروح، فداء خدتها وراحت الوحدة الصحية اللي في المركز. هناك شافت دكتور جديد، اسمه محمد، دكتور اطفال، ابن بندر، لابس نضارة وشكله هادي وطيب، وكلامه حنين اوي مع العيال.