من حفر حفره لمراته ج الاخير

لمحة نيوز

والتليفون اللي عليه صور التحويلات والعقد في إيدي التانية.
نزلنا السلم وكان البواب طالع بالصدفة، راجل عجوز اسمه عم محروس، شاف منظر مريم وإيدها الورمانة وعينيها المحمرة
خير يا ست مريم؟ في حاجة يا بنتي؟
طارق طلع على بسطة السلم فوقينا، وحاول يرسم وشه الهادي الكذاب
مفيش حاجة يا عم محروس، شوية زعل حريم وأختها جاية تسخنها.
مريم وقفت وبصت لعم محروس بصوت واضح سمعه سكان العمارة كلهم
عم محروس، لو حد سألك عني، أنا رايحة عند أهلي، وشهادتك مطلوبة لما الشرطة تيجي تسألك على الضرب والبهدلة اللي كنت بتسمعها هنا.
طارق فوق وشه بهت ومردش، ودخل وقفل الباب برزعة هزت السلم كله.
أول ما وصلنا الشارع، كان قلبي بينبض في وداني. أخدت مريم في تاكسي وطيران على مستشفى المحلة العام. مكنش فارق معايا ورق ولا طارق ولا شقق، كان كل همي نطمن على الحمل وعلى إيدها.
قعدنا في الطوارئ تلات ساعات كأنهم تلاتين سنة.
الدكتورة عملت سونار لمريم، وأول ما شافت النبض سمعتهولنا… تكة سريعة وصغيرة في الشاشة السودا، مريم حطت إيدها على وشها وانفجرت في عياط هستيري، بس المرة دي مكنش عياط قهرة، كان عياط خلاص، كأنها بتغسل كل الخوف اللي عاشته السنين اللي فاتت.
الجنين سليم الحمد لله ومفيش نزيف الدكتورة قالت بجدية بس إيدك فيها شرخ بسيط في عظمة المعصم من لوي الدراع، ولازم تتجبس أسبوعين، ومفيش أي مجهود ولا حركة.
كتبت التقرير الطبي. والتقرير ده كان أول مسمار في نعش الأستاذ طارق.
طلعنا من المستشفى بإيد متجبسة، وتقرير رسمي بيقول اشتباه اعتداء بالضرب أدى لشرخ، ومن باب المستشفى على قسم أول المحلة.
مريم كانت خايفة من خطوة القسم، الستات في بلدنا بيخافوا من دخلة الميري وبيحسوا إنها عيبة في حقهم، بس أنا قعدت معاها على دكة القسم وفهمتها
يا مريم، لو متغديتيش بيه النهاردة، هيتعشى بيكي وبابنك بكره. الراجل ده مفلسع، ومعاه الورق الأصلي، وهيجري يتصرف في الشقة ويثبت إنك سبتي البيت ويهددك بالطلاق عشان تتنازلي عن كل حقوقك ونفقة ابنك. إحنا هنثبت الحالة أول بأول.
دخلنا عند أمين الشرطة، وبعدها عند الظابط النوبتجي.
اتعمل محضر رسمي إثبات حالة طرد من مسكن الزوجية، واعتداء بالضرب مع وجود تقرير طبي مرفق، وإثبات واقعة تبديد أموال بموجب إيصالات التحويل البنكية اللي صورناها وشهادة البنك بأن القرض متسدد من ١٤ شهر وهو بيخصم من مرتبها.
الظابط كان راجل فاهم، بص في الورق وقال
محضر الضرب والنفقة ده هيمشي مساره في النيابة، بس موضوع الفلوس والتحويلات للشقة دي قصة تانية خالص، لازم ترفعوا دعوى رد مبالغ مالية بدون وجه حق وخيانة أمانة زوجية، وده عايز محامي شاطر في قضايا الأسرة والأموال.
خرجنا من القسم على صلاة العشا.
أخدت مريم على بيت العيلة، بيت أمي الله يديها الصحة في حي سكة زفتى. أمي أول ما شافتنا بالجبس والشنطة، قعدت تلطم على صدرها، بس مريم كانت خلاص اتصلبت عودها، قعدت جنب أمي وحكتلها كل كلمة من طقطق لسلامو عليكم، من غير ولا دمعة واحدة.
أمي مسحت وشها وقالت بصوت مليان غضب أمهات الدنيا كلها
اللي يمد إيده على بنتي ويستحل شقاها، ميقعدش على فرشتي ولا ليه في بيتي مطرح. بكره الصبح يا دينا تاخدي أختك وتطلعوا على مكتب الأستاذ عبد الرازق، محامي المرحوم أبوكم.
تاني يوم الصبح، الساعة مكنتش جت تسعة، وتليفون مريم رن.
كان رقم غريب. فتحت الاسبيكر وأنا جمبها.
ألو… مريم؟
الصوت كان ناعم، فيه ارتباك واضح وتوتر مش مضبوط. صوت ست.
مين معايا؟ مريم ردت بحزم.
أنا… أنا نجلاء زميلة طارق في الحسابات.
بصيت لمريم وعيني وسعت. مريم شالت التليفون وحطته على ودنها وبصتلي بإشارة إني اسكت واسمع
خير يا ست نجلاء؟ بتتكلمي بصفتك إيه؟
نجلاء صوتها بدأ يرتعش في التليفون
مريم والنبي اسمعيني، طارق جالي الشغل الصبح مقلوب وعايزني أسحب كل الفلوس اللي في حسابي وأبيع الشقة لواحد صاحبه توكيل فوري النهاردة! أنا مبقاش فاهمة حاجة، وهو بيهددني إنه لو الشقة متسجلتش هيعملي مصيبة في الشركة ويقول إني مختلسة أقساط منه!
مريم ضحكت بسخرية
وإنتي مش مختلسة يا نجلاء؟ مش بتاخدي تلتين شقايا أنا وهو كل أول شهر وتكتبي الشقة باسمك؟
والله العظيم طارق فهمني إنه مطلقك من سنة! نجلاء صرخت في التليفون، والكلمة دي نزلت علينا إحنا الاتنين زي الصاعقة قالي إنه مطلقك شفهي ومستني يخلص الشقة عشان يكتب عليا ويسكن معايا فيها! وقالي إن الفلوس دي فلوس جمعيات خاصة بيه وشغله الإضافي! أنا مكنتش أعرف إنك لسه على ذمته ولا أعرف إن الفلوس دي من مرتبك إنتي! ده وراني وصل أمانة على بياض قالي إنه ضامن حقه بيه!
مريم بصتلي وأنا حسيت بغثيان من كمية القذارة. الراجل مكنش بس بيسرقها، الراجل كان بيجهز عش الزوجية التاني بدم قلب مراته اللي شغالة في الوردية جنبه في نفس المصنع، ومفهم التانية إنه مطلق وضحية!
اسمعيني كويس يا نجلاء صوت مريم كان حاسم زي حد السيف طارق متسجل عليه محضر في القسم من إمبارح، ومعايا صور كل التحويلات من حسابي لحسابك. لو روحتي الشهر العقاري وعملتي أي توكيل أو بيع، اسمك هيدخل في قضية غسيل أموال وخيانة أمانة ومشاركة في نصب