حمل بالتراضى ج الاخير

_ نعم!

_ مالك … من وقت ما جينا وانت ساكت … الحمد لله محصلش حاجه.. لية بقى حالتك كدة من وقتها

فضل ساكت برضه يبصلي وبس

_ احمد ليه ساكت … الحمد لله اهو هياخد جزاته وهيتحبس ومش بتهمه واحدة بتهمتين الظابط قال يودوا في داهيه و ميخرجش منها دلوقتي خالص … ايه بقى يا احمد مالك .. انا مش عايزه أشوفك كدة … احمد في ايه؟
بصلي شويه وبعدين مرر ايدة في شعري تاني و اتكلم بتعب

_ من اول مرة شفته فيها في المستشفى وانا حسيت في نظرته انه مستكترك عليا و عينة كانت هتطلع عليكي .. مش عارف ازاي سمحتله يمشى قبل ما اصفيهاله عشان ميشوفكيش بيها تاني .

غصب عني ابتسمت رغم الألم اللي بيتكلم بيه بس انا فعلا مبسوطة وانا شايفه في عنيه حبه و خوفه وغيرته عليا .. كمل كلامه وايده لسه في شعري

_ بتضحكي على ايه … انتي متعرفيش انا جوايا ايه دلوقتي من وقت ما شفتة بيلمسك في الفيديو

ابتسمت اكتر وايدي بتلعب في زراير بيجامته

_ احمد … بتغير بتحبني و تخاف عليا قوي كدة ؟

لقيتة اتنهد

_ مش عارف اعمل ايه … لو أطول اخبيكي و محدش يشوفك غيري .. والله اعملها …. مش عارف ليه انتوا بتعملوا فينا كدة .. ليه متخلقتوش تكونوا بتختفوا ومتظهروش بس غير للي بيحبوكوا .

ضحكت على كلامة و لقيتني بتنهد انا كمان و بعدين اتعدلت و بقى وشي فوق وشه و بلعب برجلي في الهوا بمتعه بكلامه اللي دخل قلبي دة

_ تخيل كدة لو كنت بختفي و محدش يشوفني غيرك كنت هتعمل ايه؟

بصلي تاني وهو نايم كدة وساند ضهره للسرير و بعدين شدني بايديه عليه اكتر

_ كانت هتبقى راحة غريبه … غير الغلب اللي انا فيه دلوقتي.

حطيت ايدي الاتنين تحت ضهره كاني حضناه و لسه بلعب برجلي في الهوا

_ احمد… انا بحبك ونفسي تفضل معايا علطول… انت كمان بتحبني و مش هتسيبني ابدا صح؟

سألته بجد وانا عيني بدمع اني دلوقتي وحالا موجودة في حضن حد بيحبني و يخاف عليا كدة .. انا بحب ربنا قوي بجد عشان رزقني بيه هو كان عارف اني محتجاله محتاجة لسند زيه وربنا عشان جميل وكريم قوي وقعه في سكتي ووقعني في سكته … يارب يفضل معايا علطول… يارب يفضل معايا علطول..

شدني قربني عليه اكتر وبعدين احتواني بدراعاته الاتنين

_ انا يا سيرين عمري ما عرفت يعني ايه حب غير لما شفتك…انا الدنيا كانت مقفله في وشي وقوي كمان كنت بنام واقوم ادعي ربنا يرزقني باي شغل بس عشان خاطر امي واخواتي تقريبا عمري ما فكرت في نفسي اني اتجوز كنت فاكر ان اللي زيي يوم ما يفكر يتجوز لازم يكون شعره شاب … الا لما شفتك لما جيت الكومباوند مش عارف ليه انتي بالذات اللي لفت نظري مع ان الكومباوند وقاعدة الامن دي بيعدي علينا كل دقيقة ناس داخله وخارجة و منهم اللي زي القمر طبعاا زيك كدة