حمل بالتراضى ج الاخير

كنت واقفه بعيد شويه سانده عالحيطة بالعافيه بس اول لما سمعت الكلمة دي .. حسيت الدنيا بتلف بيا و بعدين ما حسيتش بنفسي!!

_ الحقي يا امل !!!! الحاله!!!!…

سمعت صوتها بتقع مش عارف ليه حسيت انها هي ودة صوت وقوعها رغم اللي انا في وان كان كل همي في اللحظة دي اخلص عليه و اموته لما لقيتة واقف جنب سيرين ومعرفش عمل ايه والا كان هيعمل ايه…هتجنن!!!!!

لقيتها هي اللي وقعت والممرضه بتحاول تشيلها ..

_ سيرين!!!

مش عارف ازاي خرجت من حوالين الامن اللي محاوطيني بيحاولوا يخلصوا الحيوان دة من ايدي و سبته و جريت عليها … اشوف مالها .. ليكون جرالها حاجة هي او اللي في بطنها !!

ساندتها على رجلي احاول افوقها … يارب انا عارف هي مش حمل كل دة.
_ سيرين… سيرين.. فوقي انا احمد … سيرين..

لقيت الامن اللي واقفين سابوا التاني وجم يساعدوني ويصرخوا في الممرضه تتصل باي دكتور تجيبة ..

_ سيرين!!!! فيكي ايه…. ردي عليا!!!!

في لحظه عيني لمحت الحيوان دة بيتحامل على نفسه رغم هزلانه وضعفه و بيحاول يستغل الموقف ويهرب

_ امسكواااا… دة مينفعش يمشي … !!!

اول ما سمع صوتي سرع في خطوته يحاول يجري .. لقيت اتنين من فرد الأمن طلعوا وراه

قومت وقفت وشيلتها على ايدي و دخلت بيها اوضتها وانا قلبي بيصرخ من القلق ليكون جرالها حاجه في اللحظة دي

حطيتها عالسرير والتفت للممرضه الموجودة

_ عايز الدكتورة بتاعتها بسرعه … من فضلك كلميها!!

_حالا اتصلنا بأكتر من دكتور … والمتواجد فيهم هييجي.

_ لأ… انا عايز الدكتورة بتاعتها.. وياريت بسرعة!!!

……………………………..

_ الحمد لله… مش عايزاك تقلق دة هبوط عادي من خضتها بس اما شافت اللي حصل مع تقل الأدوية اكيد مقدرتش تتحمل

_ يعني هي الحمد لله كويسه هي واللي في بطنها!

_ متقلقش… الحمد لله و انا هتابع معاها الفترة دي اكتر لان في حاجة في دماغي كدة لازم اصارحك بيها

_ في ايه يا دكتورة ؟

_ مش وقته دلوقتي …ابقى عدي عليا في المكتب بعدين.

بعد ما خرجت الدكتورة المريبة دي … قربت وقعدت جنبها عالسرير

لقيت في عنيها دموع حسيتني بالقهر عليها

_ سيرين.. خلاص مفيش حاجة.. مالك بس في ايه.

بصتلي شويه بنفس الدموع اللي في عنيها

مش عارفه اقولة اني خايفه ولا بلاش احسن ازود المشكله