حمل بالتراضى ج الاخير

همستلها بالقرب من ودنها

_ سيرين … سيرين … انا احمد..

_ ااه … احمد..

_ روح احمد….انا هنا اهو…معاكي..

كنت بنطق كل كلمة وانا بضمها في حضني تاني وبعصرها بين ايدي وايديها مبتفارقش شفايفي ابوسها بلهفه وخوف جوايا بقالة كتير عليها

_ اا…. كن…كنت فين … صحيت سألت عليك مكنتش هنا

_ حقك على عيني … اسف اني مكنتش معاكي في كل اللي فات… بس ربنا يعلم انا كنت بتقطع ازاي عشانك و عشان اكون جنبك و…

بصيت لوشها لقيتها غمضت عنيها وغابت عن الوعي تاني

عدلتها على السرير وحكمت الغطا عليها …. وخرجت لأي حد يطمني مالها وليه بتغيب عن الوعي كتير كدة

…………………..

بعد ما دخلت للدكتورة وعرفت منها انها لسة تحت تأثير مجموعة أدوية شديدة عليها هي السبب في انها بتغيب عن وعيها كدة سألتها عن حالة البنت وانا خايف من الرد …

_ شوف انا مش هخبي عليك خصوصاً انك كنت عارف كل حاجه وانا كنت محذراك بنفسي قبل كدة… البنت اتولدت اعضائها الداخلية شبة مدمرة بسبب الادوية اللي كانت بتوصلها عن طريق الام ودة اللي انا قولتهولك قبل كدة … بس الحمد لله معجزة من ربنا انها اتولدت عايشة اصلا …كمان نشكر ربنا ان التشوهات دي كانت داخلية بس… وليها علاج .

_ طيب حالتها دلوقتي وصلت لايه … وهل فيه امل تبقى كويسة ؟!

سألت ومن كتر ردودها اللي بتنزل عليا زي المطرقة وانا خايف …يارب سلم

_ احنا اجرينا ليها عدة عمليات فور ولادتها وهي حاليا في العناية المركزة لحديثي الولادة

_ حضرتك بتقولي عمليات؟!!!!!

_ متتخضش كدة احنا هنا في المستشفى عندنا قسم كامل لعمليات حديثي الولاده والتشوهات ما بعد الولادة للأطفال… والحمد لله حالياً وبالنسبة لحالتها يعتبر مستقرة

_ أقدر أشوفها..

لقيتها سكتت شويه

_ حاليا مينفعش بس ممكن تبص عليها في العناية من بعيد

…………..………….

لبسوني لبس المستشفى المعقم وجوارب طبية بلاستيك في رجلي وأيدي و كمان على شعري وطبعا ماسك على بقي
ودخلت اوضة العناية وقفت قدام حاجز زجاجي كبير ابص عليها مع اطفال كتير قوي … شاورت للممرضة وانا عيني كلها دموع من صعوبة المواقف اللي بتمر عليا النهاردة وهمستلها من بعيد اني عايز اشوفها عن قرب

قربتني من حاجز زجاجي مباشر لسرير واحد في طفل على وشة جهاز التنفس ومتوصل فيه خراطيم اكبر من حجمة هو بس بيتحرك بهدوء وبيحرك رجلة وكانه بيعترض باللي يقدر عليه على اللي مكتفه دة