حمل بالتراضى ج الاخير

_ ايه !!!!

فكيت ايديه من عليا فاجأة.. لقيته ابتسم ورجعني تاني وحاوطني تاني

_ بس انتي بالذات كنت بحب اشوفك … كانت أوقات ورديتي تخلص و اغير هدومي وابقى هراوح بس افضل اقعد مع عم خيري اقوله هشرب معاك الشاي وبعدين همشي وافضل مستني اشوفك وانتي راجعة مكشرة ومتنرفزة كالعادة بس اطمن عليكي و بعدين امشي.

_ انا أول مرة أعرف الكلام دة!!

قولت كدة بحماس و انا مبسوطة قوي قوي من كلامة.. مش عارفه ازاي مش قالي الكلام دة قبل كدة!

بصلي شوية تاني وبعدين قرب وطبع بوسه خفيفه على شفايفي

_ بحبك…

ابتسمت اكتر بعدين اتعدلت وقربت انام في حضنه تاني ضمني قوي بدراعة و لحظات وكنت نايمة و انا حاسه اني معايا سعادة الدنيا كلها في اللحظة دي….. بس هو !! كنت حاسه بيه… تقريبا منمش معرفش بيفكر في ايه بس كل شويه اقلق على ضمته ليا وكانه بيفتكر حاجه فبيرجع يفكر نفسه اني هنا معاه و في حضنه .

الفصل التاسع عشر
حمل بالتراضي
روايات رانيا أبو خديجة

دخلنا النيابه و انا قلقانة… انا عمري ما دخلت الاماكن دي ابدا … قولت لاحمد قبل ما نخرج من البيت اني مش عايزة أجي بس هو قالي ان الظابط لما كلمة الصبح قاله ان دة تحقيق بصفه رسميه ولازم اتكلم عن علاقتي السابقة بعمي وولادة … ويمكن دي اصعب حاجة في الموضوع.. دخلنا فعلا و الحمد لله سمحوا لاحمد يحضر معايا بصفتة هو كمان كان حاضر كل اللي حصل وطرف فيه كمان

الظابط بدا بأسئلته ليا ولأحمد عن اللي حصل يومها .. و فاجاة..
_ ايه علاقتك بيه من الأساس و لية يجيلك المستشفى في الوقت دة بالذات؟

_ مفيش اي علاقة غير انه ابن عمي وبس… و انا مكنتش اعرف انه جاي اصلا واتفاجات اما لقيته في اوضتي لما صحيت على صوت خناقة مع احمد.

_ بس هو بيقول كان فيه خطوبه بينكم قبل كدة ؟

بصيت لاحمد القاعد قدامي هزلي راسه بمعنى ردي ومتخافيش.

_ ايوا. . كنا مخطوبين فعلا من فترة كبيرة بس الحقيقة انها مستمرتش كتير و فسخنا الخطوبه

_ امتى أخر مرة شفتي فيها المتهم قبل ما يجيلك المستشفى ؟

_ من اربع خمس شهور تقريبا… بعد وفاة والدتة بأيام … وقفلي بعربيته وانا في طريقي للكومباوند وقالي انه محتاج اننا نرجع الفترة دي عشان هو محتاجني جنبه … بس دي مكنتش اول مرة يحاول اننا نرجع تاني ويكلمنى في نفس الموضوع