حمل بالتراضى 1

لقيتني بستغل تقل نومها وبشدها بشويش وبحضنها احاول أشبع من قربها على الأقل .

…………………………

الحمد لله بقى دلوقتي بيحاول يلتزم بالاتفاق وبنفطر ونتعشى مع بعض وأحيانا بلاقيه جي في نص اليوم ومعاه اكل من برة ويقولي قولت أجي اتغدى معاكي في فترة الغدى بتاعتي بجد بكون فرحانه قوي لما بحس باهتمامه بيا كدة

بس في حاجة غريبة النهاردة بعد ما اتعشينا لقيته جايب ورق وكُتب كتير وقاعد شكلة بيعمل حاجه مهمة

_ هو انت بتعمل ايه ؟!!
رد وهو مشغول في كتابة الورق اللي بيعمله دة
_ دة بريزينتيشن لمشروع مهم كان مركون بقالة فترة فبحاول اظبطه دلوقتي .

بريزينتيشن !!!!! لايه ومشروع ايه دي
_ هو انت خريج ايه يا احمد ؟
بصلي فاجاة كدة بمعنى طبعا ماانتي متعرفيش حاجه عنيي .. ولو مهتمة كنتي عرفتي لواحدك.

_ أنا دارس إدارة أعمال خريج بتقدير جيد جداً وكنت قدمت السي ڤي بتاعي في كذا مكان وآخرهم من ست شهور في الشركة دي ولسه بعتلني ان أنا السي ڤي اتقبل بشكل مبدئي لسه الانترفيو وتقديم بريزينتيشن محترم .. ادعيلي بقى ربنا يوفق.
_ من ست شهور يعني قبل ما تيجي الكومباوند بفترة مش كدة ؟
_ أيوا .
فضل مركز قوي في اللي بيعملة وكأني مش موجوده تقريباً .. بس اتضايقت اني فعلا معرفش عنة حاجة أنا لازم أتعرف عليه وعلى حياتة أكتر من كدة .

_ تحب أساعدك في حاجة ؟
_ اه خليكي قاعدة معايا لحد ما أخلص وبعدين أقولك فكرتة وتقوليلي اذا كانت كويسه او لأ.

……. …………….

امبارح فضل سهران طول الليل تقريباً يظبط في كل حاجة خاصه بالأنترفيو بتاع النهاردة دة لدرجة اني تعبت فعلا من السهر وسبتة ودخلت نمت وعشان كدة سمعت صوت المنبه وصحيت قبلة … ايه دة انا اول مرة اصحى قبلة لقيتني نايمة في حضنة وهو ضاممني بين دراعاتة الأتنين بشكل اداني احساس غريب…. انا بقيت مبسوطه وهو بينام جنبي احساس بالأمان والحماية بقى بيزورني من وقت ما بدء يبقى معايا بشكل أكثر من الاول.

صحيتة وبدء يفوق بالعافيه ودخلت أعملة فطار وقهوة لقيتة متعصب وشكلة بيدور على حاجه مش لاقيها دخل الحمام وخرج بسرعه يسالني

_ مشوفتيش مكنة الحلاقة بتاعتي .. كانت هنا في درج التسريحة دة .

انا فعلا شلتها من مكانها وانا برس حاجتي .. ايوا افتكرت جريت بسرعة اشوفهالة فين وفعلا لقيتها اخدها مني بسرعة ودخل الحمام بصيت عليه وهو لسه هيبدء يحلق لقيتني بدخل بسرعة وراه