حمل بالتراضى 1
حمل بالتراضى 1
…………………
دخلت بيها البيت على بالليل بعد ما قعدت بيها في المستوصف لحد ما الدكاترة طمنتني انها الحمد لله لسة بخير…
_ احمد … طمنا يا ضنايا .. عامله ايه دلوقت ؟
رديت وانا طالع اوضتنا بصوت مش طالع من الرعب اللي اتعرضتلة النهاردة على ايديها …
_ الحمد لله يا امي … قدر ولطف .. ربنا عالم بيا .
دخلت الاوضة وأول ما دخلت لقيت امي بتقول
_ استنى يا ابني دي محتاجة تغير هدومها وتتحمم من مية الترعة… يلا يا بنات ساعدوني نعمل لمرات اخوكوا اللازم
دخلت الاوضة بعد ما خلصوا كانت لسه نايمة وباين على وشها التعب … قعدت جنبها عالسرير ولقيت نفسي بشدها براحة وباخدها في حضني… ضمتها جامد .. كنت هخسرها لتاني مرة .. مش قادر استوعب اللي كان ممكن يحصل النهاردة… الحمد لله. … ربنا قدر ولطف.
_ اااه .. ااااه جسمي بيوجعني .
بعدت وشي عن حضنها وانا ببتسم بفرحة اني سمعت صوتها تاني
_ ربنا ما يحرمني من صوتك ومن اهاتك دي ابدا.
لقيتها بتعيط بوجع
_ ااااه… احمد … جسمي كلة بيوجعني قوووي .
اخدتها في حضني تاني بدون تفكير وضمتها قوي
_ الف سلامه عليكي يا روح احمد ..
_ اااه …. اوعى انت بتوجعني زياااادة .
_ حاضر … انا اسف .. اهووو .
بعدت عنها فعلا ومريت بايدي على وشها امسحلها دموعها و عرق التعب اللي مغرق وشها
_ حاسه باية دلوقتي ؟!
لقيتها بتحاول تتعدل ساعدتها
_ هو ايه اللي حصل يا احمد… انا مش فاكرة غير اني كنت بتفرج عالترعة وهي بتسقي الارض وبعد كدة مش عارفه حصل ايه .. لقيت نفسي مقلوبة في الترعة
خلصت كلامها وانفجرت في عيااط زي الاطفال
اخدت راسها على كتفي و قولت وانا ببوس راسها
_ حقك عليا… اخر مرة اسيبك تخرجي من البيت لواحدك تاني….لازم بعد كدة اكون معاكي .. حقك عليا أسف.
سمعت خبط على باب الاوضة….. دخلت امي وشايلة في ايديها صنية…. ومعاها اخواتي البنات
_ سمعت صوتها يا ضنايا قولت صحيت اجبلها لقمة تاكلها .
_ تعالي يا حبيبتي.
_ عاملة ايه دلوقتي يا بنتي .
_ الحمد لله يا ط…يا امي… كويسة .
_ تستاهلي الحمد يا ضنايا … لكن قوليلي ايه بس اللي وداكي ناحية الترعة … انا مش قولتلكوا تروحوا بس للجيران اللي نواحينا هنا .
_ والله يا اما قولتلها كدة بس هي اللي فضلت تتحايل عليا نروح هناك .
