حمل بالتراضى 1

_ احمد… شكرا بجد على كل حاجه.

رفع رأسه وبصلي شويه وبعدين قالي

_ انا اللي عايز اعتذرلك كل اللي جرالك النهاردة كان بسببي .. حتى الكلام اللي سمعتية كنت انا السبب فية .. انا اسف بجد يا سيرين.

ايه دة هو في حد ممكن يبقى مؤدب كدة … لقيتني عايزة احضنة والله من كمية أسفاته وادبة دة.

كمل وهو لسة بيطهرلي الجرح اللي في راسي
_ انا عارف ان الوقت بيمر و انتي قولتيلي ان الدكتورة قالتلك ان مفيش وقت عشان كدة اوعدك اول ما تخفي هعملك اللي انتي عايزاة عشان ميفوتش الاوان وابقى انا السبب .

هو لية بيتكلم وهو زعلان كدة .. ده أنا مبسوطه قوي أخيرا حلمي هيتحقق وهبقى أم ومش هكون لواحدي تاني بعد ما يسبني … ااااه اهي دي اوحش حاجه في الموضوع انه الحنية دي كلها والرجولة اللي عمري ما شفت زيها هتسيبني …

_ انا كدة خلصت … خليني اشوف رجلك كمان عشان لو كانت عليها ميه أشوف ممكن اعمل فيها ايه .

بعد ما خلص لقيتة راح ناحية التسريحة وجاب المشط اللي بعمل بية شعري

_ هتعمل ايه .

_ هسرحلك شعرك عشان ميبوظش .

ابتسمت من اهتمامه … على فكرة انا اول مرة حد يهتم بيا كدة خصوصاً من بعد ما بقيت لواحدي… فضل يسرحلي براحة قوي وبعدين قالي بالقرب من ودني

_ اسيبهولك مفرود كدة ولا المه .

ابتسمت
_ هتعرف تلمه ؟

_ واعرف أعمل ضفيرة كمان .

_ واتعلمتها ازاي دي بقى ؟!!

رد وانا حاسه ان ايدة بدءت في الضفيرة فعلا

_ يااااه من زماااان من وانا صغير وامي كانت تخليني اسرح لاخواتي يوم العيد بالليل عشان هي ما كانتش بتبقى فاضيه ولحد دلوقتي ريم تخليني اعملهالها .

حسيت اني حابة اسمع اكتر عنة وعن اخواته

_ شكلك بتحب اخواتك قوي.

_ مريم وريم دول أغلى حاجه بابا سبهالي .

_ باباك متوفي من زمان؟؟

_ للأسف وبعمل كل حاجه عشان مخلهومش يحسوا بغيابة و نفسي ربنا يقف جنبي ويرزقني لحد ما اوصل مريم لبيتها و ريم تكمل تعليمها و تبقى صحفية كبيرة زي ما بتحلم.

_ ومامتك؟

_ ماما دي بقى أقرب واحدة ليا في الدنيا كل تفاصيلي تقريبا معاها دايما تقولي بتفكرني بأبوك … لما يعني نكون قاعدين مع بعض بنفكر و ونظبط امورنا عشان البنات .. عشاان كدة انا عارف هي حست بايه لما عرفت عن جوازنا

لقيتة اتنهد اكتر وكمل بحزن

_ حاسس اني مخنوق من ساعة ما مشيت وهي زعلانه مني.