حمل بالتراضى 1
حمل بالتراضى 1
_ الحقيقة مش بس في شغل البيت.. هو علمني حاجات كتير قوي واهمها انكوا كاستات بتتعبوا قد ايه .
قال كدة وهو بيبتسم بضحك
_ الحمد لله اول مرة اعرف راجل بيعترف ان شغل البيت دة شغلانة اصلا.
قال وهو بيمسح الطربيزة اللي اكلنا عليها
_ لا متقلقيش رجالة كتير عارفه كدة بس عمرهم ما يقولوا.
………..…..…..……..……
بالليل طلبت منة نقعد في البلكونة شوية عشان نتكلم زي كل يوم وفعلاً شالني كالعادة وقعدني وقعد هو كمان قدامي بعد ما عمل حاجه نشربها …
_ البلكونه بتاعتك حلوة و هواها حلو قوي.
وبعدين بصيت حواليا
_ صراحة شقتك كلها حلوة ومريحة نفسياً قوي … بقيت بحبها وبحب وجودي في كل ركن فيها
دة هي اللي بتحبك والله …هي وصاحبها كمان
كان نفسي يبقى في فرصه اقولها كدة لكن…
_ بقالك كتير عايش فيها؟!
_ اه من فترة كبيرة … بس انا عموما عايش لواحدي من زمان من اول ما دخلت الجامعه وجت جامعتي هنا في القاهرة .
_ طب ليه عايش لواحدك.. لية مامتك واخواتك مجوش يعيشوا معااك؟!
وبعدين بقى عمالة تسألني عن حياتي وانا هموت واسألها مين سيرين اللي ظهرت في حياتي دلوقتي دي وازاي واحدة بالجمال والشخصية إللي تخطف دي وحيده كدة حاسس ان في حاجات كتير معرفهاش عنها .
الفصل السادس حمل_بالتراضي
_ احنا كل يوم بنتكلم عني … خليني النهاردة اسمعك انتي .
_عايز تعرف إيه وانا اقولك؟!
_ بحكم شغلي في الكومباوند بقالي فترة … كنت طول الوقت بشوفك لواحدك … فين قرايب والدك و الدتك؟!
سكتت شوية… لأ كتير وبصت من البلكونة بشرود وحزن وبعدين بصتلي
_ ماما مكنتش مصريه عشان كدة ملهاش قرايب في مصر وبابا ملوش غير أخ واحد بس دة بقى انا اللي مش عايزة أعرفه.
قالت كدة وبصت من البلكونة مرة تانية … امممم واضح فعلا اني لسة معرفش عنها حاجة
_ لو مش عايزة تقولي عمك دة ضايقك في ايه مزعلك كدة ..انا مش هضايقك واسألك.
سكتت … سكتت كتير …فهمت انها مش عايزة تتكلم
وفاجاه بصتلي وقالت بأهتمام
_ صحيح … ازاي متقوليش اول ما جيت على نتيجة الانترفيو ..
_ لأ انا مدخلتش الانترفيو اصلا..
_ ليه ؟؟!!!
_ يعني تقدري تقولي اني بقى عندي خبرة وعارف ان دخولي من عدمة مفيش منه فايدة.
_ ازاي ..مش فاهمه….
_ يعني تقريبا كنت عارف مين هيتقبل ومين ولا كأنه جه.
