الشقه الجديده روماني مكرم ٢
الشقه الجديده ٢
رانيا مش مجرد شريكة.. رانيا تبقى أخته من الأم! الكلمة نزلت عليا زي الصاعقة. — أخته من الأم؟! — أيوه! سامح ورانيا إخوات غير أشقاء، السجل التجاري بتاع شركة التسويق العقاري دي مجرد ستار، ورانيا هي اللي بتمسك الفلوس الكاش، وسامح هو اللي بيجيب “الضحايا الضامنين” اللي عندهم أملاك مسجلة عشان البنك يوافق على التسهيلات الائتمانية.
ولما القرض يتصرف، الفلوس تطلع على حسابات أوفشور أو تتحول لدولارات وذهب، والشركة تعلن تعثرها، والبنك ينزل بالحجز على الضامن اللي هو أنتِ.. أو أنا قبلك! كنت حاسة إن الأكسجين بيقل في المكان، كل الألغاز كانت بتركب فوق بعضها زي قطع الموزاييك المرعبة. — طب ومين الشريك الثالث اللي في البنك؟
— مدير فرع البنك الأهلي اللي اتمول منه القرض.. اسمه الأستاذ مدحت. مدحت ده هو اللي كان بيسهل خروج التسهيلات من غير ما يتدقق في وجود الضامن بشخصه، وهو اللي بيغلوش على المعاينات وبيستلم البصمات على أوراق رسمية خارج مقر البنك مقابل نسبة من قيمة كل قرض!
مسكت إيدها وأنا بترعش: — أنتِ معاكِ إثبات للكلام ده يا نهى؟ المحامي بتاعي الأستاذ حسام مستنيني جوه المحكمة، ولو معانا دليل على كلامك ده.. النيابة العامة هتقلب القضية من مجرد نزاع مدني وشهر عقاري لجناية أموال عامة وتشكيل عصابي!
طلعت نهى من شنطتها فلاشة صغيرة وحطتها على الترابيزة ودزتها ناحيتي: — الفلاشة دي عليها تسجيلات صوتية بين سامح ومدحت مدير الفرع، ونسخ من تحويلات بنكية خرجت من حساب رانيا لحساب زوجة مدحت مدير الفرع.. أنا فضلت أتبعهم من سنين عشان آخد حقي، ولما عرفت عن طريق واحد صاحبي في الشهر العقاري إن فيه حظر تصرف ينزل على اسمك أنتِ بالذات، عرفت إن سامح كرر نفس اللعبة القذرة معاكِ.
مسكت الفلاشة زي ما أكون ماسكة أثمن حاجة في حياتي. وفي اللحظة دي.. لمحت حركة غريبة عند باب الكافيه. كان سامح! واقف بره، لابس نظارته وشكله هيتجنن، وبيبص في أنحاء الكافيه. لما عينيه وقعت عليا وعلى نهى قاعدين مع بعض، وشه اتقلب ألوان وأتغير لملامح شيطانية.
زق باب الكافيه ودخل بخطوات واسعة وسريعة. نهى وقفت بسرعة وقالت بحدة: — خدي الفلاشة واجري على المحكمة فوراً للأستاذ حسام! أنا هعطله هنا! — مش هسيبك لوحدك! — اجري يا ندى! لو أخد الفلاشة دي منك حياتك انتهت! جريت ناحية الباب الخلفي للكافيه اللي بيودي على الممر المؤدي للمحكمة.
