بالهوى هيطلقك روايه جديده ج الاخير

انتفضت عبير وهي تشعر بالباب يُفتح ….

نهضت عبير وهي تنظر الى جواهر التي كفها ينزف والدموع تغرق وجنتيها ….

اندفعت عبير وعانقتها بقوة وهي تبكي …كانت تعانقها بلهفة وكأنها وجدت شئ كانت تبحث عنه لسنوات…

ابتعدت عبير عن جواهر وهي تمسك كفها وتسحبها نحو الأريكة وتقول :

-الحمدلله الجرح مش عميق …

وبعدها دخل عامر هو ورجل لكسر الباب فقالت عبير :

-عم عامر روح جيب قطن وشاش عشان الجرح بتاعها

هز عامر رأسه وذهب….

….

بعد قليل …

ساعدت عبير جواهر على الاستلقاء بعد ان ضمدت جرحها وذهب عامر وقررت ان تتسطح بجوارها …

ابتسمت عبير وهي تنظر إليها وتقول:

-حاسة ان بقالي عيلة…لو أمير زعلني هجيلك انتِ واخليكِ تدافعي عني زي ما دايما بتدافعي …

ابتسمت جواهر وهي تنظر إليها …رغم الاختناق التي كانت تشعر به ولكن سعادة طفيفة طغت داخلها …

أمسكت عبير كفها وقالت وهي تضحك بخفوت:

-وأنتِ كمان لما تتجوزي عدي ويزعلك تعاليلي وأنا هقف معاكي …هخلي اللي ما يشتري يتفرج عليه …

تجهم وجه جواهر وقالت بصوت ضعيف:

-معتقدش أنا وعدي لينا فرصة مع بعض ..

عبست عبير وقالت:

-ازاي ملكومش فرصة مع بعض …انتِ بتهزري …الواد بيمـ,ـوت فيكي …ده مسابكيش ثانية الا للشغل بتاعه وعشان يشوف اخته…مكانش بينام كويس ولا ياكل كويس …مكانش بيعمل حاجة الا يبص عليكي وانتِ نايمة وبس …عمل اللي ميتعملش عشانك …رغم اني أنا كنت موجودة بس رفض يمشي …حتى أنه قال لكل اللي هنا انه خطيبك وهتتجوزوا قريب …

-هو عايز يتجوزني شفقة و…

ضـ,ـربتها عبير على كتفها وقالت:

-شفقة ايه يا بنت أنتِ متبقيش عبيطة كده …الراجل بيحبك اتلمي …اياكي يا جواهر لما يطلب منك الجواز تتقلي …توافقي علطول ..لا تفكري ولا بتاع أول ما يقولك تتجوزين…قبل ما يكمل الكلمة قوليله موافقة علطول ..

عبست جواهر وقالت:

-مش هيقول عليا كده اني واقعة…

-طيب ما أنتِ واقعة فيه ليه الكدب ؟!هنخدع الراجل يعني ونتقل …اسمعي كلامي بس واعملي اللي بقولك عليه …

هزت جواهر رأسها وقالت:

-حاضر …

ابتسمت عبير وعانقتها وهي تربت على ظهرها….

….

بعد ساعة تقريبا…

كانت جواهر أخيرا خلدت للنوم …نهضت عبير وهي تتنفس براحة …ما عرفته اليوم صدمها حرفيا …لم تتخيل ان يكون والدها بتلك الحقارة !!!!

بدأت بترتيب الصالة التى دمرتها جواهر في ثورة غضبها فجأة جرس الباب رن ..اتجهت للباب وهي تنظر الى العين السحرية لتجده عدي وأمير …