حماتى وعلبه البسكويت

أنا جمدت قلبي وبصيت له وبقيت أتحرك ببطء لورا وأنا ماسكة الأوراق والصك بقوة:

أنا: يعني إنتو عشتوا طول السنين دي بفلوس حرام والأرض دي كلها قايمة على دم أخوكم

توفيق عينيه ضيقت وبصلي بشر:

توفيق: الأرض دي حقي وحق عيالي والورق اللي في إيدك ده يا بنت الناس مش هيطلع بره الشقة دي سيبوا الورق والصك وأنا هنسى إنكم عرفتوا حاجة وهتفضلوا عايشين في خير الأرض زي ما أنتو

أحمد صوته علي وكان مليان غضب ووجع وعينيه دمعت على أبوه وعمه اللي افتكرهم سنين طويلة سند ليه:

أحمد: لأ يا عمي مش هناخد قرش واحد حرام تاني أمي سابت العلبة دي عشان تريح ضميرها قبل ما تموت وإحنا مش هنشيل الذنب ده مكانكم الورق ده هيروح للشرطة وحق عمي إبراهيم لازم يرجع والناس كلها لازم تعرف الحقيقة

توفيق ملامحه اتقلبت وبقى شكله زي المجنون وقرب بسرعة وحاول يشد الورق من إيدي وزق أحمد جامد

أحمد مسك فيه وبقوا يزقوا بعض ويوسف كان بيصرخ من الخوف وأنا استغليت الفرصة وجريت بسرعة على الباب وفتحته وبقيت أصرخ في السلم بأعلى صوتي:

أنا: الحقونا يا ناس يا هووووي الحقونا عمي توفيق هيموتنا

صوتي هز العمارة كلها وفجأة لقيت الجيران طالعين يجروا على السلم والكل كان مخضوض من المنظر

توفيق لما شاف الجيران والناس بتتفرج تراجع وخاف وبص لأحمد بنظرة كلها تهديد ووعيد وخرج من الشقة وهو بيبرطم بكلام مش مفهوم ونزل بسرعة بره البيت كله

أحمد قعد على الأرض وهو منهار تمامًا وكاتم دماغه بين إيديه ومش مصدق إن عيلته اللي كان بيفخر بيها طلعت كابوس بالشكل ده

بعدها بيومين أحمد أخد الصك والرسالة والصورة وراح بيهم للنيابة وقدم بلاغ رسمي وأعادوا فتح التحقيق في قضية اختفاء وموت عم إبراهيم من 37 سنة وعم توفيق اتقبض عليه وبدأ يتحقق معاه في كل اللي حصل

أحمد قرر يتنازل عن نصيبه في الأرض الكبيرة دي كلها ويتبرع بكل الفلوس اللي جت منها للجمعيات الخيرية والمستشفيات كأنه بيطهر اسم أبوه وأمه من الذنب اللي عاشوا بيه

عقدنا في الشقة القديمة وبصيت لعلبة البسكويت الصاج اللي كانت فاضية على التربيزة

أنا: تفتكر يا أحمد كدا البركة هترجع للبيت فعلاً زي ما كانت حماتي بتقول

أحمد بص للعلبة وابتسم بوجع بس براحة لأول مرة من يوم ما فتحناها:

أحمد: البركة عمرها ما كانت هتدخل بيتنا طول ما الحقيقة مستخبية يا سمر أمي كان عندها حق العلبة دي كانت شايلا البركة فعلاً لأنها رجعت الحق لأصحابه وفوقنا من وهم كبير كنا عايشين فيه الحقيقة مرة بس أحسن بكتير من عيشة قايمة على دم وظلم وصمت ملوش معنى