في اللحظة الموبايل رن فيها

اللحظة اللي الموبايل اتقفل فيها، كانت الصالة هادية هدوء يسبق العاصفة. فريدة كانت لسه ملوحة بؤها بابتسامة صفرا، وأمي بتبص لي بقرف وهي بتهز رجلها، وفاكرين إن اللي عملته ده شو حريمي أو شوية عيال بيواسوا نفسهم في لحظة قهر. وفجأة، الموظفة اللي كانت واقفة ورا جهاز الكمبيوتر وشها جاب ألوان. الكمبيوتر قدامها بدأ يصفر، وسيستم الحسابات كله اتقلب أحمر. البنت اتزجرت في مكانها وبدأت تض.رب على الكيبورد بـ غشم، عرقها بدأ ينزل وهي بتبص لأمي وأبويا بنظرات رعب. في نفس الثانية، تليفون أبويا رأفت رن.. نغمة الموبايل بتاعته كانت عالية ومزعجة، طلع الموبايل من جيبه وهو لسه عاقد حواجبه، بس أول ما شاف الاسم، ملامحه اتغيرت. ده كان البنك، وبنفس الوقت تليفون أمي اتهز برنتين ورا بعض.. رسايل سحب وإلغاء. “فيه إيه يا رأفت؟” أمي سألته بـ توتر لما شافت وشه بقى زي الليمونة المخللة. أبويا مردش عليها، فتح الخط وصوته كان بيرعش: “أيوة يا متر.. أيوة يا فندم.. يعني إيه الفيزا اتقفت؟ وإيه اللي الحساب المحجوز للرحلة اتميد؟ يا فندم أنا لسه ساحب منه الصبح!” المحامي على الناحية التانية كان بيزعق وصوته طالع من السماعة من كتر الفزع: “يا حاج رأفت، الشركة الدولية سحبت التفويض اللي كانت عاملاه لسيادتك، والآنسة مريم بلغت الإدارة القانونية إن كل المصاريف المفتوحة على حساب الشركاء تتجمد فوراً لعدم استيفاء الأوراق! الأرصدة كلها اتعمل عليها بلوك لحين مراجعة الأرباح!” أبويا نزل الموبايل من على ودنه ببطء، وعينه كانت بتلف في الصالة كأنه بيدور على هوا يتنفسه. في نفس اللحظة، مدير قطاع العلاقات العامة في الفندق، راجل لابس بدلة شيك جداً ووراها اتنين من أفراد الأمن، جه جيرى علينا. ملقاش في وشه غير أمي وأبويا. “مساء الخير يا فندم.. أنا عادل حلمي، مدير عام التشغيل.” الراجل قالها بـ لهجة ناشفة وميري جداً، مفيهاش ريحة الترحيب اللي كان بيوزعها من شوية، “إحنا جيلنا إخطار حالا من الإدارة المركزية لمجموعة ‘الشرقاوي ومصطفى للاستثمار’.. كل الحجوزات الخاصة بحضرتك، الحاج رأفت الشرقاوي، والمدام تهاني، والآنسة فريدة، تم إلغاء تغطيتها المالية من الشركة.” فريدة برقت عينيها وصوتها طلع مسرسع: “إنت بتقول إيه يا جدع إنت؟ إحنا حاجزين الجناح الملكي! وحماتي جاية في الطريق هي وحمايا! إنت عارف حمايا يبقى مين؟” المدير بصلها ببرود أشد من تكييف الفندق: “يا فندم، الجناح الملكي ليلته بـ 45 ألف جنيه، وحضراتكم حاجزين أسبوع، ده غير قاعة العشاء المفتوح لـ 50 فرد بكرة بمناسبة الخطوبة. الإجمالي داخل في حوالي 400 ألف جنيه.. والشركة سحبت الضمان البنكي. لو حابين تكملوا الإقامة، لازم تدفعوا المبلغ كاش حالا، أو بالفيزا الشخصية.. بس ياريت تكون فيزا شغالة، لإن السيستم رافض الكروت اللي اتسجلت في الدخول.” أمي صرخت وجت عليا وهي بتشاور بصابعها في وشي: “إنتي! إنتي عملتي إيه يا مقصوفة الرقبة؟ إيه الهبل اللي قولتيه في التليفون ده؟ ومن امتى وأنتي ليكي كلمة في الشركة بتاعة أبوكي؟” أنا رجعت خطوة لورا، وفردت ضهري، وابتسمت لأول مرة من ساعة ما رجلي عتبت الفندق. ابتسامة هادية، صافية، وفيها كل الغل اللي كتمته في قلبي سنين. “شركة أبويا؟” قولت الكلمة وضحكت بـ صوت مسموع، “لأ يا تهاني هانم.. دي مش شركة أبويا. دي الشركة اللي ستي نبيلة الله يرحمها كتبتها باسمي كاملة، كـ بيع وشراء من خمس سنين، لما لقيتكم بتسرقوا ورثها وبتعاملوها كأنها دادة في البيت عشان تاخدوا فلوسها وتصرفوا على لبس ومظاهر فريدة الهانم. أبويا شريك بالإدارة بس، والتوكيل اللي معاه بيخليه يصرف من أرباحه.. بس لما الأرباح تتجمد عشان فيه ‘شبهة تبديد أموال شركة في مصاريف شخصية’، يبقى ملوش حق يمس مليم واحد من فلوس الكيان الكببير.” أبويا رأفت وشه اسود، وبدأ ينهج: “مريم.. إنتي بتخربي بيت أبوكي؟ عشان حتة أوضة؟ عشان بنهزر معاكي؟” “تهزروا؟” صدمت صوتي وعيني جت في عينه، “إنتوا لغيتوا أوضتي ورميتوا شنطي وكان شكلكم هيمو.ت من الفرحة وأنا بتبهدل قدام الناس. قولتوا لي روحي نامي في لوكاندة ورا المحطة، صح؟ وأنا بقى بقولكم.. وروني هتدفعوا الـ 400 ألف جنيه دول منين حالا، عشان عيلة اللواء اللي جايين في الطريق ميتفرجوش عليكم وإنتوا بتطردوا من الفندق!” فريدة قعدت على الأرض فجأة، فستانها الستان اتبهدل من تراب الصالة، وبدأت تصوت من غير دموع: “مستقبلي بيمو.ت! حمايا لو عرف إننا منملكش تمن الأوضة هيفركش الجوازة! يا ماما اتصرفي! يا بابا اعمل أي حاجة!” أمي لفت حوالين نفسها زي الفرخة المذبوحة، طلعت كارت الفيزا بتاعها وادته للموظفة: “خدي.. خدي جربي دي.. دي فيها فلوس جمعية وفيها قرشين شايلاهم للزمن.” الموظفة مررت الكارت.. الماكينة طلعت صوت “بـيـيـب” طويل ورفضت العملية. الموظفة هزت رأسها بـ أسف: “الرصيد غير كافي يا فندم.. الكارت فيه 30 ألف جنيه بس.” أمي بصت لأبويا: “فين فلوسك يا رأفت؟ فين الشهادات؟” أبويا قعد على أقرب كرسي وخبا وشه بين إيديه: “الشهادات كلها بضمان قرض قاعة الفرح اللي في القاهرة.. أنا معاييش كاش فك يغطي ربع المبلغ ده هنا.. أنا كنت مسند على حساب الشركة!” المدير بصلهم وقال بلهجة حاسمة: “معاكم نص ساعة يا فندم.. يا تدفعوا الحساب، يا إما الأمن هيضطر يطلب من حضراتكم تخلوا الصالة، وتنزلوا الشنط من الجناح الملكي لإن فيه حجز تاني عليه.” في اللحظة دي، برة الفندق، وقفت عربية “مرسيدس” سودا فخمة جداً، ونزل منها راجل وقور بـ شنب أبيض، ولابس بدلة رسمية، وجنبه مراته اللي باين عليها العز والمنظرة، ومعاهم عريس فريدة، “ديجو” أو زي ما مسمينه في البطاقة “مدحت”. أهل العريس وصلوا! فريدة شافتهم من قزاز الصالة، وشها بقى أبيض زي الملائكة من الرعب، قامت جيرت عليا ومسكت في فستاني وهي بتبوس إيدي: “ببوس رجلك يا مريم.. أبوس إيدك بلاش تفضحيني قدامهم! أنا أختك الصغيرة.. لو الجوازة دي باظت أنا همو.ت نفسي! قولي للبت بتاعة التليفون ترجع كل حاجة، وبكرة الصبح هتنازل ليكي عن الأوضة الكبيرة في شقة مصر، وهعملك كل اللي إنتي عايزاه!” أمي جيرت هي كمان، وبقت تتكلم بنبرة أول مرة أسمعها في حياتي.. نبرة شحاتة ومذلة: “يا مريم.. يا بنتي.. أنا أمك.. أنا اللي حملت وولدت.. يرضيكي شكلنا يبقى زبالة قدام المستشار واللواء؟ عدي الليلة دي، وحسابي معاكي بعدين.. قصدي، هصالحك باللي تطلبيه.. بس بلاش فضيحة!” أنا بصيت لهم، وشفت في عينيهم الخوف الحقيقي.. مش الخوف عليا ولا على زعلي، ده الخوف على “منظرهم” قدام الناس اللي بيتمسحوا فيهم. وقفت بكل ثبات، وشيلت إيد فريدة من على فستاني ونفضته كأن عليه تراب: “أنا ماليش أخوات.. ومحدش فيكم افتكر إنه أبويا وأمي وأنا بدفع دم قلبي عشان رحلتكم وفي الآخر بترموني في الشارع. زي ما قولتوا لي.. محدش غصبكم على المنظرة الكدابة.” أهل العريس دخلوا الصالة، اللواء بيبص حواليه ومبتسم، ومدحت العريس بيجري على فريدة: “فريدة حبيبتي! إحنا وصلنا.. إيه ده؟ مالكم واقفين كده ليه بالشنط؟” أمي حاولت تبتسم وبدأت تتلعثم: “أهلاً.. أهلاً يا فندم.. منورين شرم الشيخ.. أصل.. أصل حصل لخبطة بسيطة في الحجز.. والـ..” المدير قاطعها بـ صوت عالي ومسموع للكل: “يا فندم، مفيش لخبطة، الحساب ملوش تغطية مالية، وحضراتكم لازم تخلوا المكان فوراً لإن الأمن هيتصرف.” مدحت العريس بلم، وأبوه اللواء ابتسامته اختفت وبدأ يبص لأبويا بنظرات استحقار: “يعني إيه ملوش تغطية؟ إنتوا مش قولتوا إنكم حاجزين الجناح الملكي بالكامل وعاملين حفلة استقبال؟ إيه المخرطة دي يا حاج رأفت؟” أبويا كان باصص في الأرض ومش قادر ينطق بكلمة. في اللحظة دي، المدير سابهم كلهم، وتوجه ليا أنا.. انحنى بـ احترام شديد وقال بصوت واضح: “الآنسة مريم الشرقاوي؟” أنا: “أيوة أنا.” المدير: “نيرمين هانم من الإدارة القانونية كلمت رئيس مجلس الإدارة حالا.. الجناح الخاص برئيس المجلس، الجناح الإمبراطوري اللي فوق، مفتوح لسيادتك طول فترة إقامتك، وكل المصاريف والخدمات على حساب الفندق ترحيباً بيكي كشريكة رئيسية في المجموعة.. والشنط بتاعتك اتنقلت فوق فعلاً.” أنا بصيت لأمي وأبويا وفريدة اللي كانوا واقفين بيبقوا عليا وعينيهم هتطلع من مكانها من الصدمة، وبصيت للواء وابنه اللي بدأوا يفهموا إن القوة والفلوس الحقيقية مش مع العيلة الكدابة دي.. القوة معايا أنا. ابتسمت للكل، وقولت للمدير: “شكراً جداً يا فندم.. ياريت بس الأمن يخلص إجراءات إخلاء الصالة من الناس دي، عشان عندي اجتماع مهم فوق في الجناح، ومش عايزة أي دوشة تعطلني.” شيلت شنطتي الصغيرة على كتفي، ومشيت بـ خطى ثابتة وكعب جزمتي بيعمل صوت رنان في الصالة، وسيبت ورايا صراخ فريدة، وعياط أمي، ونظرات الذهول من أهل العريس اللي بدأوا ينسحبوا وهم بيزعقوا لمدحت وبيقشروا الفاتحة على الجوازة الكدابة. طلعت الأسانسير الزجاجي، وبصيت عليهم من فوق وهم بيتصاغروا لحد ما بقوا زي النمل.. ونفسي اللي كانت مكتومة من سنين، أخيرًا عرفت تتنفس. دخلت الجناح الإمبراطوري، الفخامة فيه تخ.طف العين، فتحت البلكونة الكبيرة وبصيت على البحر الواسع، الهوا طير شعري وحسيت بـ راحة مفيش بعد منها. قعدت على الكرسي الهزاز وطلعت الموبايل عشان أكلم نيرمين أشكرها. لكن أول ما فتحت الشاشة، لقيت رسالة مبعوتة على الواتساب من رقم مجهول.. رسالة خلت الدم يتجمد في عروقي، والراحة اللي حسيت بيها تختفي في ثانية. الرسالة كانت صورة مأخوذة حالا من كاميرا مراقبة الفندق.. صورة ليا وأنا قاعدة في البلكونة! وتحتها كلام مكتوب بالبلدي: “فاكرة إنك كده خلصتي حقك يا مريم؟ اللعبة الكبيرة لسه مبدأتش.. وستي نبيلة متمتتش مو.تة ربنا.. اسألي أبوكي رأفت عن اللي حصل في الليلة الأخيرة في المستشفى.. والورق اللي إنتي فاكرة إنه بيحميكي، هو نفسه اللي هيدخلك السجن بكرة الصبح.. استنيني، أنا في الأوضة اللي جنبك.” لفيت راسي بـ رعب وبصيت على الباب الفاصل بين جناحي والجناح اللي جنبي.. وسمعت صوت خبطات خفيفة ومنتظمة بتدق على الخشب.. تـك.. تـك.. تـك..

مقالات ذات صلة

نعيمى وجحميها1

حماتي

من أجمل القصص 👇

روايه رومانسيه ج الاخير

عذراء في ليله ج الاخير

روايه رائعه جديده ٤

اترك تعليقاً إلغاء الرد