حماتي 1
حماتي 1
انا : لا يا خالتو حضرتك عامله اللى عليكى وزياده ربنا يخليكى ليا … انا مكنتش هعرف اعمل حاجه بعد المرحومه ماما من غيرك
ايمان بحزن : ربنا يرحمها يارب
انا : امين يارب
قاعدت شويه وشربت العصير
ايمان : بصى يانهى انا جبتلك شوية خضار وفاكهه وطلبات للبيت …معلشى بقى مش هعرف اوصلهملك البيت عندى شغل كتير ويدوبك الحق اروح بعد كده
انا بابتسامه : كتر خيرك يا خالتو …. انا عارفه والله … انا هاخد تاكسى وروح على طول متقلقيش عليا
ايمان : ماشى ياحبيبتى ربنا معاكى
شويه ودخلت علينا سهير وهى ماسكه دماغها
سهير : اه اه
ايمان قامت بسرعه من على مكتبها : فى ايه يا سهير ايه اللى حصل
سهير بتعب : مش عارفه لقيت نفسى دوخت فجاءه تقريبا الضغط مش مظبوط
ايمان : طيب قولى للاستاذ حسين واستاذنى وروحى احسن
سهير : مانا قولتله وطلبت حسام وهيجى يخدنى دلوقتى
ايمان : طيب تعالى اقعدى لحد ميجى
وقاعدت سهير وهى عينها عليه
انا : خالتو انا همشى بقى … والف سلامه على حضرتك يا طنط
ايمان : ماشى ياحبيبتى خالى بالك من نفسك
سهير : استنى يانهى …بدام نزله استنى انزل معاكى عشان لو دوخت تانى
ايمان باستغراب : مش هتستنى حسام
سهير : هستناه تحت …عشان نهى تبقى معايا … معلشى ياحبيبتى هتعبك معايا
انا باحراج : لا يا طنط مفيش تعب ولا حاجه
وفعلا شلت الحاجات ونزلت معاها وفضلنا واقفين مع بعض حوالى 10 دقايق بس كنت ملاحظه انها وقفه عادى ولا باين عليها تعب ولا حاجه بس قولت خلينا وراء الكداب لحد باب الدار
شويه ووقفت قدامنا عربيه ونزل منها شاب وسيم جدا بصراحه يعنى انا تنحت مش هكدب عليكو وبعدين بعدت عينى عنه قبل ما اتفضح
الشاب بقلق: ماما انتى كويسه
سهير : الحمد لله بقيت احسن
وبعدين بصتلى : ربنا يخليها نهى صممت تقف معايا لحد متيجى
بصتلها بكل اسبهلال انا ..انا صممت يمكن برده
حسام باحترام : شكرا اوى يا انسه
انا بكسوف : لا ابدا مفيش حاجه … بعد اذنك بقى ياطنط عشان امشى
سهير : هتمشى فين تعالى نوصلك انتى معاكى شيل كتير
انا : شكرا ياطنط انا هاخد تاكسى من هنا … شكرا اوى بجد
سهير : لا والله ميحصل … كفايه مذنباكى معايا من ساعاتها … مش هسيبك تروحى ابدا لوحدك
وبعدين بصت لابنها : حق يا حسام يصح برده
حسام بصلى بصه خلت قلبى يدق : طبعا مينفعشى اتفضلى معانا
