حماتي 1

الحلقه الاولى

========

ونبداء بقى الحكايه

من حوالى 4 سنين كنت لسه متخرجه من الجامعه وخالتو طلبت منى اروحلها الشغل عشان جيبالى شوية طلبات للبيت مهى كانت بتساعدنى بعد وفــ,,ـــــاه ماما وبتشتريلى طلبات البيت معاها بس اول مره كنت اروحلها الشغل كانت دايما بتعديهم عليه فالبيت

المهم بقى لبست وروحتلها زى متفقنا ودخلتلها المكتب كنت مكسوفه جدا بصيت حواليا ملقتشى غير مكاتب كتير فاضيه ومفيش حد قاعد عليها غير وحده بس ومركزه اوى فاللى بتعمله

قربت منها بكسوف : السلام عليكم

من غير متبصلى حتى : وعليكم السلام

انا : لو سامحتى هى مدام ايمان فين

بصت على مكتبها وبعدين بصتلى : هى عند المدير بتمضى شوية ورق …اى خدمه ممكن اقدمهالك

انا بكسوف : لا شكرا …. ممكن استناها

…..: اتفضلى

قاعدت شويه وانا ببص حواليا ومكسوفه اوى وهى كل شويه تبصلى من تحت النضاره باستغراب وبعدين ترجع تبص فى اللى قدامها تانى

شويه وخالتو دخلت علينا

ايمان وهى بتخدنى فى حــ,,ـــــضنها : اهلا اهلا … ازيك ياحبيبتى اخبارك ايه …معلشى اتاخرت عليكى

انا بابتسامه : ازيك ياخالتو …انا الحمد لله تمام

ايمان وهى مساكه ايدى : تعالى يا نهى اقعدى هنا … تشربى ايه بقى

انا : لا شكرا مش عاوزه … يادوبك الحق اروح عشان اعمل الغداء لبابا انتى عارفه

ايمان : لا طبعا مينفعشى اشربى العصير وامشى على طول

وقبل مرد مسكت التليفون وطلبت العصير

الموظفه : قربتك دى يا ايمان ؟

ايمان بابتسامه : اه دى نهى بنت المرحومه اختى … انتى مش عرفاها … انتى شوفتيها قبل كده

الموظفه وهى بتفتكر : اها افتكرتها بس ده كان من زمان اوى كانت لسه صغير بس ما شاء الله كبرت اهوه وبقت عروسه زى القمر

انا بكسوف : ميرسى

ايمان :دى بقى طنط سهير كانت تعرف ماما وبتخروج معانا وانتى صغيره وصاحبتى من زمان

انا : اهلا بحضرتك

سهير بفضول : انتى بتدرسى ولا خلصتى واتخطبتى ولا لسه

انا : لا ياطنط مخلصه تربيه ولسه محصلشى نصيب

سهير بابتسامه : ان شاء الله نفرح بيكى قريب

وقامت من مكانها

سهير : ايمان هعمل تليفون وهجيلك

ايمان : ماشى

وخرجت سهير

ايمان : ها يانهى اخبار بابا واخواتك ايه

انا : الحمد لله كويسين …حضرتك مش هتيجى تقعدى معانا شويه

ايمان : معلشى يانهى انا عارفه انى مأثره معاكى بس والله الشغل والبيت والعيال مجننانى