وعد وعلي الجزء ٦
وعد وعلي الجزء ٦
رضوان فضَل باصص له لحظة، وكأنه بيحاول يقرأ وشه أو يكشف كدبة مستخبية. بعدين قال بهدوء:
طب… راقبهملي.
مالك بحذر:
علي ولا وعد؟
رضوان بصرامة:
علاقتهم. راقبلي علاقتهم.
قال كده ومشي، وساب مالك واقف ساكت، ملامحه هادية ومافيش أي كدبة بانِت عليه.
—
في الفيلا في المطبخ، كانت رنا بتغسل الأطباق وعينيها كل شوية تروح على فاطمة. سألتها بفضول:
“مالك يا طنط فاطمة؟”
فاطمة ردت بسرعة وببرود:
“مفيش حاجة.”
رنا ما اقتنعتش وقالت:
“إنتي ساكتة من امبارح… لما نزلتي من عند رانيا هانم تديها القهوة. هي قالتلك حاجة زعلتك؟”
فاطمة هزت راسها:
“لا يا رنا.”
رنا فضلت تلحّ:
“أمال في إيه؟ ولا زعلانة عشان وعد مش هنا؟ أنا سمعت البيه الكبير وهو بيكلمها امبارح، وبيقولها ترجع.”
فاطمة التفتت لها بعصبية:
“قولتلك متتصنتيش على حد هنا، عشان متحطيش نفسك في مشاكل أكبر منك.”
سكتت رنا فورًا وهزت راسها بخوف:
“حاضر… خلاص.”
تنهدت فاطمة، كانت بتفتكر الكلام الى سمعته ع الباب ورانيا بتقول لبدران نص الى حصل وبتغلط وعد
دخلت رئيسة الخدم بسرعة وقالت:
“على بيه داخل!”
الكل اتوتر وبصوا لبعض باستغراب.
وبالفعل دخل علي، هيبته مالية المكان.
وقف في نص المطبخ وقال بنبرة حادة:
“فين فاطمة؟”
بصّت رنا لفاطمة بقلق…
فاطمة رفعت عينيها وقالت بسرعة:
“أنا يا بيه.”
علي أشار لها:
“تعالي.”
مشت ورا بخطوات مترددة، ورئيسة الخدم بصتلها بحدة وهمست:
“عملتي إيه؟”
خرجت فاطمة مع علي للطرقة. وقفت قدامه وقالت بخوف:
“نعم يا بيه؟”
علي وقف بإيديه في جيوبه وسألها مباشرة:
“إنتي كنتي بتكلمي وعد لما رانيا كلمتها؟”
فاطمة اتلخبطت:
“كانت بتكلمها قدامنا كلنا… مش أنا بس.”
علي ضيق عينيه وقال:
“بس وعد كانت بتتكلم معاها على انفراد.”
ترددت فاطمة لحظة وقالت:
“آه.”
سأله تاني ببرود واضح:
“سمعتي حاجة من الكلام اللي بينهم؟”
فاطمة سكتت… وسكوتها فضحها.
ابتسم علي ابتسامة صغيرة بس مرعبة وقال:
“يبقى سمعتي الكلام اللي اتقال لوعد.”
كانت ملامح فاطمة حزينة ومتوترة، حاولت تتهرب لكنها قالت بصوت واطي:
“آه.”
في اللحظة دي اتفاجئت لما سمعت صوت بدران من وراها:
“قالتلها إيه؟”
التفتت بدهشة إنها لقت بدران واقف، هيبته ووقاره ماليين المكان.
قال علي بنبرة جدية:
“لو خايفة من رانيا… بدران بيه بنفسه بيقولك اتكلمي.”
