روايه نوفيلا جديده

بعد شهر كامل..

طول الشهر بيحاولوا يوصلوا لرد من مها وهي ردها لسه بفكر, لحد ما اخيرًا ابوها كلمه وقاله انها وافقت, وراح قعد معاها والفرحة مش مسايعاه ووشه رجع نور من تاني وده خلى امه تحس بالذنب اكتر انها عيشته أيام صعبة بسببها وبسبب اللي عملته.

-اطلبي اللي انتِ عوزاه يا ست البنات.

قالها برضا تام منه بعد ما مها بلغته ان ليها شروط.

-أولا مش هقعد مع ارملة اخوك في بيت واحد, يا تجبلي انا شقة بعيد يا تطلعوها هي من البيت.

-ليه؟

سألها باستغراب لانه عارف انها متعرفش اللي عملته مروة.

-مش هبقى مرتاحة وانتَ طول الوقت قدامها, وكلمة ولا وقفة ولا نظرة ليها هتجنني وهتحرق دمي, اصلاً كل ماتخيل ان امك كانت عوزاك تتجوزها بتجنن وضغطي بيعلى.

خلصت كلامها بعصبية فقال بيحاول يهديها:

-حاضر.. انا ماقدرش اطلعها من شقتها عشان البنت لازم تكون مع امي, لكن هجهز شقة اهلي اللي في بيتنا القديم ونقعد فيها, إيه رأيك؟

-المهم انه بعيد عنها… ومش عاوزه كلام بينك وبينها, في حاجة تبلغها لامك تبلغك مش استهبال بقى واصل ريم عاوزه وريم كذا وكذا, البنت على راسي وتعملها اللي تعوزه بس امك اللي تبلغك مش هي.

-حصل.

بصتله بابتسامة حاولت تداريها من رده وطريقته, وكملت:ناهد خالد

-وبالنسبة لامك فسبني لحد ما هدى من ناحيتها, لا تقولي كلميها ولا روحيلها ولا اعملي ولا سوي… سبني لحد ما اهدي وانسى وانا هرجع اتعامل معاها زي الأول.

بصلها بضحكة وقال:

-مانا سايبك… بدليل عمالة تقوليلي امك امك وساكت.. مادام مش هتعملي اللي يهينها او يزعلها مش هتدخل.

رفعت راسها بغرور:

-اهلي ربوني اني ماتعاملش مع حد كبير بطريقة مش مناسبة, ولو عندك شك يبقى نفضها احسن.

-يا ستي ده انتِ متربية احسن مني, شك إيه بس!

فضحكت وضحك معاها وكان النصيب غلاب ورغم كل المعوقات في حكايتهم إلا انهم كملوا.

عزيزي القارئ.. النصيب ماحدش يقدر يوقف قدامه, رزقك سواء في شغل او زواج او أولاد او فلوس او أي شيء هتاخده ولو اهل الأرض كلهم وقفوا في وشك… مادام هو نصيبك ورزقك ومكتوبلك….

دمتم بخير يا حلوين

تمت بحمد الله ♥️

كلمة/

انا مش من انصار الفكرة اللي طالعة جديد في الروايات اللي يتجوز ارملة اخوه ويحبها ويكتشف انه دايب فيها والعته ده…

الانسان مشاعره بتتكون بناءً على العلاقة من البداية

فمش بسهوله ابدا انه يشوف مرات اخوه مراته ويتقبل لا وكمان يحبها والعبث اللي بنشوفه

اه في الواقع بيحصل.. لكن بيكون مجرد جواز عشان استقرار العيلة ولو في يوم الحياة استقرت بينهم بتكون بالموده والاحترام

لو حصل حب ده بيكون بعد مدة طويلة اوي

وبرضو بيكون بالمعاشرة

لكن اللي بنشوفه من انه مجرد ما يقرر يتجوز ارملة اخوه هوب فترة قصيرة ويكونوا عشاق رقم واحد فده بجد منتهى العبط..

والموضوع مبيكونش ابدا ابدا بالسهولة اللي الروايات دي بتوصلهلنا…

#