امي ماكنش معها فلـ.ـوس
امي ماكنش معها فلوس
الصمت نزل على الصالة زي الموت.. صمت ثقيل ومحمل بوجع قلب ورعب. كريم أخويا كان بيبص لمراته وكأنه بيشوفها لأول مرة في حياته.. راجل اشتغل وعرق وشقي عشان يبني بيت ويسعد مراته ويكرمها وفي الآخر يكتشف إن الإنسانة اللي عاشرها وشاركها حياته استغلت طيبة أمه ودست إيدها في حويشة عمرها اللي شايلاها للزمن والتعب.
كريم قرب منها بخطوات بطيئة وصوته كان بيترعش من القهر والغل.
”نسرين.. رد عليا.. الحكي ده صح؟ أنتِ أخدتي فلوس أمي اللي شايلاهم لمرضها وتعبها ولليوم الأسود؟ الفلوس اللي شقت طول عمرها عشان تحوشهم وتأمن بيهم نفسها وهي قاعدة لوحدها في كبرها؟ عملتي بيهم إيه؟ الشنطة اللي في إيدك دي بكام؟ الهدوم والفساتين والخروجات اللي كل يوم والتاني دي منين؟ نسرين انطقي بدل ما أتصرف تصرف مش هيعجب حد!”
نسرين انفجرت في العياط وانهارت وقعدت على الأرض عند رجلين أبوها وبقت تبكي بحرقة وتترجاه.
”سامحني يا بابا.. سامحني يا كريم.. والله الشيطان غواني.. أصحابي في النادي والمجموعات على الفيس والستوريهات كانوا كلهم بيلبسوا ماركات ويعيشوا في مستوى عالي وأنا ما كنتش قادرة أحس إني أقل منهم.. كنت عاوزة أبان قدامهم غنية ومبسوطة وأشتري الشنط والساعات الذهبية البراندات وأسافر معاهم.. الفلوس كانت تحت إيدي وقلت أم كريم ست كبيرة ومش محتاجة حاجة وهي أساساً قاعدة في البيت مش بتخرج ولا بتصرف إيه يعني لما آخد الفلوس وأبقى أرجعها على مهلي..”
أول ما قالت الجملة دي.. أنا ما قدرتش أمسك نفسي. خطوت خطوتين ناحيتها وقلت بصوت حاد وواضح يزلزل المكان.
”شرابات مش كده؟ مش دي الكلمة اللي قلتيهالي في التليفون البارح يا نسرين؟ لما قلت لك تلاجة أمي باظت واللبن بيعفن جواها والمية بتخر في المطبخ قلتِ لي وهي أمك محتاجة ميتين وخمسين ألف جنيه في إيه هي بتصرفهم على إيه في شرابات؟!”
الحاج عبد المجيد غمض عينيه بوجع شديد ودمعة نزلت من عينيه على خده.. راجل مربي وشقيان ويشوف بنته بالبشاعة والدناءة دي قدام الناس. فتح عينيه وبص لنا وقال بصوت ثابت ومحسوم.
”أنا ندمان على اليوم اللي تساهلت فيه معاكي يا نسرين.. ندمان إني ربيتك وميزتك وعملت لك كل اللي نفسك فيه لحد ما بقيتي إنسانية جشعة وعينك فارغة ومش شبعانة وتدوسي على القريب والغريب عشان مظاهر كدابة وفارغة.”
