عش الزوجية حكايات روماني مكرم ج الاخير

بصيت لسامح وقلت له بكلام هادي وزي الثلج:

— “أنا نازلة يا سامح.. نازلة المرة دي، بس عشان أوريهم منار البنت اللي دخلت بيتهم هتعمل إيه، والرد مش هسيبه لك.. الرد هيكون مني أنا.”

فتحت باب الشقة ونزلت على السلم، ولما وصلت الحوش لقيت حماتي وأمل واقفين، وحماتي في إيدها المكنسة وجردل المية، وبتبصلي بابتسامة نصر وتحدي..

#الكاتب_رومانى_مكرم

نزلت على السلم بخطوات أثقل من الجبال، بس المرة دي ما كانش فيه دموع في عيني. الخوف اللي كان ماليني امبارح تحول لشيء تاني خالص.. تحول لبرود ووجع مكتوم وكرامة بتصرخ.

أول ما وصلت الحوش، لقيت حماتي واقفة ومربعة إيدها، وبتبصلي بابتسامة نصر وقالت بنبرة شمتانة:

— “أيوة كده! من بدري.. هو ده العقل والرزانة. يلا يا شاطرة، أمل جهزت المية والعلف، ادخلي معاها الزريبة واكنيسي تحت المواشي الأول وبعدين اطلعي للطيور.”

أمل سلفتي قربت مني وبصتلي بنظرة كلها أسف ورجاء إن الموقف يعدي، وقالت بصوت واطي:

— “تعالي معايا يا منار.. أنا عملت نص الشغل والله، اقفي بس معايا عشان ما تعملش مشكلة.”

بصيت لأمل وابتسمت لها ابتسامة خفيفة، وبعدين التفتت لحماتي اللي كانت واقفة مستنية تشوفني وأنا بمسك المقشة وبوطي رأسي. قفزت خطوتين للقدام، وبدل ما أمد إيدي للجرادل والمقشة، وقفت في نص الحوش بصدر مرفوع، وقلت بصوت واضح وقوي رن في الدوار كله:

— “أنا نزلت يا حاجة عشان أقولك كلمتين قدام ربنا وقدام أمل وسلفي اللي واقف هناك ده.. أنا بنت ناس متعلمة، دخلت بيتكم معززة مكرمة، وأبوي اشترط عليكم شرط يضمن كرامتي، وأنتو وافقتوا ورجعتوا في كلامكم من أول أسبوع. أنا مش هكسر كلمة أبوي، ومش هشتغل في الزريبة ولا هخدم البيت ده تحت الإهانة والتهديد!”

حماتي اتصدمت من النبرة، وشها اتغير ولونها اتخطف من الجرأة، وعينيها برزت من الغضب:

— “انتِ بتعلي صوتك في بيتي يا بت أنتِ؟ وبتقولي لأ في وشي؟ هي دي تربية البندر؟”

في اللحظة دي، كان حمايا نازل على السلم وسامح طالع من الشقة وراه على صوتي. حمايا صرخ وهو نازل بالعكاز:

— “في إيه اللي بيحصل هنا؟ الصوت ده طالع ليه من الصبح؟”

حماتي راحت جري على حمايا وشاورت عليا وهي بتصنع البكاء والانكسار:

— “شايف يا حاج؟ شايف العروسة اللي جيبينها لسالم؟ نازلة من الصبح تعلي صوتها عليا وتغلط فيا وفي تربيتي، وتقولنا أنتم ناس معندكوش كلمة وأنها مش هتحط إيدها في حاجة في البيت ده!”