عم مراتك باعتلك جواب ج الاخير

في شقة كوكو.

كان عامر وشريف وميرفت متجمعين وبيتكلموا ويتفقوا ازاي يكشفوا عزيز قدام ميسرة وعامر بقى شبه متأكد ان عزيز هو اللي بعت الرجاله اللي ض*ربوا شريف!

تليفون عامر رن فجأة برقم الحارس اللي عند آيات وعامر رد عليه بقلق والحارس قاله على الحديث اللي حصل بين آيات والمزارع وعامر اتصدم لما عرف وقفل التليفون واتكلم قدام شريف وميرفت: مش معقول!! ازاي المصايب بتحصل ورا بعضها كده!

ميرفت وشريف سألوه ايه اللي حصل واول لما عامر اتكلم شريف قاطعه وقاله: اه فعلا ابن عم آيات كان جه الشركة عشان يتكلم معاك في الموضوع ده وانا قابلته وحكالي وكان قالي ان آيات مطلوبه في التحقيقات وانت مكنتش موجود وانا قولتله يقول انها مسافرة مع جوزها لحد ما انت ترجع عشان تكون جمبها في الموقف الصعب ده.

اتكلمت ميرفت بحزن: يعيني عليكي يا بنتي.. زمان قلبها مكسور بعد إللي عرفته!!

عامر بص قدامه بتفكير هو متخيل حالة آيات دلوقتي.. وانها فعلا هتكون محتاجة له جمبها!

رواية مكتوبة على إسمي بقلمي ملك إبراهيم.

في البلد.

آيات دخلت بيت عمها وهي منهارة وبتبكى وكان عمها ومراته قاعدين.

آيات قربت منهم واتكلمت ببكاء: عمي.. هي صباح فعلا اللي ابويا؟؟ شربته سم ووقفت تتفرج عليه وهو بيموت قدام عينيها؟

عمها بصلها بصدمة ومرات عمها قالت بحزن: منها لله ربنا انتقم منها وشربت من نفس السم وبكره ابن خالتها يتعدم هو كمان.

آيات بكت بنهيار وقالت: يعني الكلام بجد!! طب إزاي!؟ وامتى ؟ وإزاي محدش حس بيه ولحقوه! ؟

رد عمها: عملت كده في اليوم اللي انتي هربتي فيه.. خافت انك تفضحيها وعرفان يطلقها واتفقت هي وابن خالتها انهم يشربوه السم وسابته يموت لحد الصبح.. ده الكلام اللي سيد قاله في اعترافاته قدام النيابه.

آيات بكت وقالت: يعني انا اللي .. انا لو مكنتش هربت مكانتش صباح هتقدر تعمل كده ولو كانت عملت كده كنت انا هلحقه!

مرات عمها طبطبت على كتفها وقالتلها: متشليش ذنب مش ذنبك يا بنتي.. ده قدر ومكتوب.

آيات ببكاء: لا يا مرات عمي.. انا اللي عملت في أبويا كده.. انا اللي هربت وسيبته للحيه دي تعمل فيه كده!! انا السبب في كل حاجة.. يارتني ما كنت هربت.. يارتني ما كنت اتجوزت عامر ولا اتكتبت علي اسمه ولا عرفته في حياتي كلها.. هو السبب في كل اللي حصلي.. هو السبب اني اهرب.. هو السبب في موت ابويا وهو اللي دمر حياتي كلها.